«قاراعاندى-بالقاش» اۆتوجولىندا 59 جاستاعى «SHACMAN» جۇك كولىگىنىڭ جۇرگىزۋشىسى قاراعاندى قالاسىنا كەلە جاتقان «ۆاز» اۆتوكولىگىمەن سوقتىعىسقان. الدىن الا مالىمەتتەر بويىنشا, جۇك كولىگىنىڭ جۇرگىزۋشىسى ءرۋلدى باسقارا الماي, جولدىڭ قارسى جولاعىنا شىعىپ كەتكەن.
جەڭىل كولىكتى 35 جاستاعى پوليتسيا قىزمەتكەرى تىزگىندەگەن. جول اپاتى سالدارىنان «ۆاز» اۆتوكولىگىنىڭ جولاۋشىلارى, 30 جاستاعى پوليتسيا قىزمەتكەرى جانە 46 جاستاعى وبلىس تۇرعىنى العان جاراقاتىنان وقيعا ورنىندا كوز جۇمدى. «ۆاز» اۆتوكولىگىنىڭ جۇرگىزۋشىسى ءتۇرلى جاراقاتتارمەن بالقاش قالاسىنىڭ ورتالىق اۋرۋحاناسىنا جەتكىزىلدى.
«قاراعاندى وبلىسىنىڭ ىشكى ىستەر ورگاندارىنىڭ باسشىلىعى مەن جەكە قۇرامى قازا تاپقانداردىڭ تۋىستارى مەن جاقىندارىنا قايعىرىپ كوڭىل ايتادى. قازا تاپقان پوليتسيا كاپيتانى داۋرەن قابدىعاليەۆ 2009 جىلدىڭ مامىر ايىنان باستاپ قىزمەتتە, ۇيلەنگەن, ەكى بالاسى بار», دەپ حابارلادى قاراعاندى وبلىسى پد ءباسپاسوز قىزمەتى.
اتالعان فاكتى بويىنشا قر قك 345-بابى 4-بولىگىنە سايكەس, قىلمىستىق ءىس تىركەلدى. تەرگەۋ امالدارى جۇرگىزىلىپ جاتىر.
