حابارلامادا پرەزيدەنت سايلاۋى ناتيجەلەرىنىڭ رەسمي جاريالانۋىنا جانە سادىر جاپاروۆتىڭ پرەمەر-مينيستر وكىلەتتىگىن توقتاتۋ تۋرالى ءوتىنىش بەرۋىنە بايلانىستى تالانت مامىتوۆ ونى ۇكىمەت باسشىسى قىزمەتىنەن بوساتقانى اتاپ ءوتىلدى. جارلىق بويىنشا ۇكىمەتتىڭ قازىرگى قۇرامى وتستاۆكاعا كەتتى. ال ونىڭ مۇشەلەرى جاڭا قۇرام قۇرىلعانعا دەيىن ءوز مىندەتتەرىن اتقاراتىن بولدى. قىرعىزستان پرەمەر-ءمينيسترىنىڭ مىندەتىن ارتەم نوۆيكوۆ اتقارادى.
سادىر جاپاروۆتىڭ پرەزيدەنت سايلاۋىنىڭ رەسمي قورىتىندىلارى شىعارىلعاننان كەيىن پرەمەر-مينيستر وكىلەتتىگىن توقتاتاتىنى وسىعان دەيىن ايتىلعان ەدى. كونستيتۋتسياعا سايكەس ۇكىمەت تولىق قۇرامدا وتستاۆكاعا كەتۋى ءتيىس.
قىرعىزستان پرەزيدەنتىنىڭ مەرزىمىنەن بۇرىن سايلاۋى 10 قاڭتاردا وتكەن ەدى. ورتالىق سايلاۋ كوميسسياسىنىڭ رەسمي قورىتىندى مالىمەتىنە سايكەس جاپاروۆقا 1,1 ميلليوننان استام ادام نەمەسە سايلاۋ ۋچاسكەلەرىنە كەلگەن سايلاۋشىلاردىڭ 79,2 پايىزى داۋىس بەرگەن.
ەلدەگى بيلىكتىڭ اۋىسۋى بىلتىر 6 قازاندا حالىق نارازىلىعىنان كەيىن بولعان-دى. ناتيجەسىندە, سادىر جاپاروۆ پرەمەر-مينيستر بولىپ سايلانعان. كەيىنىرەك پرەزيدەنتتىك سايلاۋعا قاتىسۋعا نيەت بىلدىرگەن ۇكىمەت باسشىسىنىڭ وكىلەتتىگى ءبىرىنشى ۆيتسە-پرەمەر ارتەم نوۆيكوۆقا ۋاقىتشا جۇكتەلگەن-ءدى.
ال ەلدىڭ التىنشى پرەزيدەنتىن ۇلىقتاۋ ءراسىمى 28 قاڭتارعا بەلگىلەندى.
