مەموراندۋم كاسپي تەڭىزىندەگى «دوستلۋگ» كەن ورنىنىڭ كومىرسۋتەگى رەسۋرسىن يگەرۋ, جاساقتاۋ, بىرىگىپ بارلاۋدى ماقسات ەتەدى.
قوس مەملەكەتتىڭ پرەزيدەنتتەرى سەرىكتەستىك جوسپارىن كەڭەسىپ, اتالعان ايماقتىڭ وزەكتى ماسەلەلەرىن تالقىلادى. وسى رەتتە ازەربايجان سىرتقى ىستەر ءمينيسترى دجەيحۋن بايراموۆ تۇرىكمەنستانعا رەسمي ساپارمەن بارعانىن ايتا كەتكەن ءجون.
«وسى كەلىسىم نەگىزىندە ەكى ەل «دوستلۋگ» كەن ورنىنىڭ دامۋى جولىندا جۇمىس ىستەپ قانا قويماي, تۇرىكمەنستاننان ازەربايجانعا كاسپي تەڭىزى ارقىلى تاسىمالداناتىن تابيعي گاز ماسەلەسىن شەشۋدى دە جولعا قويادى دەپ سەنەمىن. بۇل تۇرىكمەنستان رەسپۋبليكاسىنىڭ ءوز ءونىمىن سەنىمدى نارىققا تاسىمالداۋى ءۇشىن دە ماڭىزدى دەگەن ويدامىن», دەدى جيىنعا قاتىسقان اقش-تىڭ ازەربايجانداعى بۇرىنعى ەلشىسى مەتيۋ بريزا.
يران سىرتقى ءمينيسترى مۇحاممەد دجاۆاد ءزاريفتىڭ دە جاقىن كۇندەرى ازەربايجانعا ساپارلاپ باراتىنى بەلگىلى بولدى. ودان ءارى مينيستر رەسەي, ارمەنيا مەن گرۋزيا ەلدەرىنە بارۋدى جوسپارلاپ وتىر.
جاڭا مەموراندۋم ەكى ەنەرگەتيكالىق دەرجاۆانىڭ كاسپي تەڭىزى ايماعىندا تۇراقتى ەكونوميكانىڭ دامۋىنا جاعداي جاسايدى دەگەن بولجام بار. بۇل تاقىرىپ گۋربانگۋلى بەردىمۇحامەدوۆتىڭ 2020 جىلى ناۋرىزدا باكۋعا ساپارى بارىسىندا تالقىلانعان-دى. تۇرىكمەنستان پرەزيدەنتى مەموراندۋمنىڭ «دوستلۋگ» دەپ اتالۋى جاقسى بەلگى, ەكى ەل اراسىنداعى دوستىقتى ودان ءارى نىعايتادى دەگەن سەنىمىن جاسىرمادى. سونىمەن بىرگە ونىڭ جاڭا ينۆەستيتسيالارعا باستاما بولاتىنى دا ءسوز ەتىلدى.
ايتا كەتەيىك, 2018 جىلى تامىزدا تەڭىزبەن شەكتەسەتىن 5 ەلدىڭ باسشىلارى اقتاۋ قالاسىندا باس قوسقان-دى. قازاقستان, ازەربايجان, تۇرىكمەنستان, رەسەي مەن يران پرەزيدەنتتەرى قاتىسقان 5-سامميتتە كونۆەنتسيا جوباسى ۇسىنىلىپ, كاسپي تەڭىزى جاعالاۋىندا ورنالاسقان مەملەكەتتەردىڭ قۇقىقتارى مەن جاۋاپكەرشىلىگى انىقتالعان بولاتىن.
