گۋمانيتارلىق ءبىلىم بەرۋ سالاسىندا كونتسەپتۋالدى ويلاۋ جۇيەسىن جەتىلدىردى

وقۋلىقتار گۋمانيتارلىق ءبىلىمنىڭ بارلىق باعىتىن قامتيدى. اتاپ ايتقاندا، فيلوسوفيا، الەۋمەتتانۋ، پسيحولوگيا، ديپلوماتيا، ءدىنتانۋ، لينگۆيستيكا، سەميوتيكا، پەداگوگيكا، عالامتور پسيحولوگياسى، مادەنيەتتانۋ، انتروپولوگيا، جۋرناليستيكا، ەكونوميكا، مەنەدجمەنت، ماركەتينگ، كاسىپكەرلىك، حالىقارالىق قۇقىق، ينتەللەكتۋالدىق قۇقىق، كينوتانۋ، تەاترتانۋ، شىعىس فيلوسوفياسى، كوشباسشىلىق، مەديا، ەتنوگرافيا سالالارى بويىنشا 100 وقۋلىق ەلىمىزدەگى  130 جوو كىتاپحاناسىنا تەگىن تاراتىلدى.

داۋلەتبەك راەۆ – دۇنيە ءجۇزىنىڭ ماڭدايالدى ۋنيۆەرسيتەتتەرىنىڭ وقۋ باعدارلاماسىنا ەنگەن ەڭبەكتەردى قازاق تىلىنە اۋدارۋعا ۇلەس قوسقان عالىمداردىڭ ءبىرى. ول فيلوسوفيا عىلىمدارىنىڭ دوكتورى، ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ پروفەسسورى. ءبىز عالىمنىڭ وتاندىق وقۋلىق اۋدارۋ تاجىريبەسى تۋرالى ويىن  سۇراپ-بىلدىك.

داۋلەتبەك راەۆ، فيلوسوفيا عىلىمدارىنىڭ دوكتورى: «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى وتاندىق ءارى تمد ەلدەرىنىڭ ءبىلىم بەرۋ سالاسىندا تەڭدەسى جوق تىڭ يدەيا بولعانى انىق. مۇنداعى باستى ماقسات – قازاق ءتىلدى ستۋدەنتتەرگە مەملەكەتتىك تىلىمىزدە ءبىلىم الۋعا جول اشۋ، الەمدىك بەدەلدى اۆتورلاردىڭ ەڭبەگىن قازاق تىلىندە وقۋعا مۇمكىندىك بەرۋ، جاستاردى الەمدىك ءبىلىم مەن مادەنيەت كوزدەرىنەن سۋسىنداتۋ»، دەپ ايتتى.

سونداي-اق داۋلەتبەك راەۆ وقۋلىقتاردى اۋدارۋ ارقىلى سالالىق جانە پاندىك وقىتۋدىڭ تەوريالىق-ادىستەمەلىك بازاسىن كەڭەيتۋگە مۇمكىندىكتەر جاسالىپ جاتقانىن تىلگە تيەك ەتتى.

«ويتكەنى ەلىمىزدە ءبىلىم الۋشىلار مەن ءبىلىم بەرۋشىلەردىڭ ءبارى بىردەي باتىس پەن شىعىس تىلدەرىن جاقسى بىلمەيدى. سوندىقتان شەتەلدىڭ تانىمال جوعارى وقۋ ورىندارىندا قولدانىلاتىن، بىرنەشە باسىلىم سۇرانىسىنا يە بولعان كىتاپتاردىڭ تۇپنۇسقادان تىكەلەي مەملەكەتتىك تىلگە اۋدارىلۋى – وتاندىق عالىم-اۋدارماشىلار ءۇشىن زور مارتەبە ءارى ۇلكەن ستيمۋل. بۇل اۋدارما ۇدەرىسى ەلىمىزدە اۋدارماشىلار مەكتەبىن قالىپتاستىرا الدى ءارى سول مەكتەپتە بىلىكتى ماماندار كاسىبيلىگىن ارتتىرسا، جاڭادان قوسىلعان جاستار تاجىريبە جينادى»، دەيدى داۋلەتبەك راەۆ.         

داۋلەتبەك راەۆتىڭ ايتۋىنشا، ءتىپتى اۋدارماشىلار الەۋمەتتىك ينستيتۋت رەتىندە ۇلكەن سىننان وتكەن.

«مەن بەلگىلى فرانتسۋز عالىمى رەمي حەسستىڭ «فيلوسوفيانىڭ تاڭداۋلى 25 كىتابى»، روبەرت تراگەردىڭ «ديپلوماتيا. كوممۋنيكاتسيا جانە حالىقارالىق ءتارتىپ نەگىزدەرى»، فرانتسۋز فيلوسوفى جيل دەلوزدىڭ «كينو 1. قوزعالىس-بەينە»، كينو 2. ۋاقىت-بەينە» دەپ اتالاتىن تۋىندىلارىن اۋدارۋ جۇمىسىنا عىلىمي رەداكتور رەتىندە قاتىستىم. بەرتران راسسەلدىڭ «باتىس فيلوسوفياسىنىڭ تاريحى» ەڭبەگى مەن بىرنەشە وقۋلىققا ساراپشى بولدىم»، دەپ ايتىپ ءوتتى عالىم.

جوبادا تۇپنۇسقاداعى ءار ويدىڭ تۇتاستىعى مەن دالدىگىن جوعالتپاي، دۇرىس اۋدارىلۋىنا باسا نازار اۋدارىلدى.

فيلوسوفيا عىلىمدارىنىڭ دوكتورى: «ۇلتتىق اۋدارما بيۋروسى وسىنداي اۋقىمدى جۇمىستى كاسىبي نەگىزدە ۇيىمداستىرۋعا بارىنشا تىرىستى. جالپى بىزدە سالالىق اۋدارماشىلار وتە از. سوندىقتان ءتىلدى جاقسى بىلەتىن اۋدارماشى مەن سول سالانىڭ مامانى بىرلەسە جۇمىس ىستەدى. اۋدارۋ جانە عىلىمي رەداكتور جۇمىسىندا قيىندىق بولمادى دەپ ايتساق، جالعان بولار ەدى. تۇپنۇسقا كىتاپتاردىڭ ءتىلى مەن ءستيلى كۇردەلى. سوندىقتان وسى كىتاپتارعا جاۋاپتى شىعارماشىلىق توپ تەرميندىك، سيمۆولدىق تۇرعىدا وتە كوپ ىزدەندى. بۇل ىزدەنىس اۋدارماشىلاردىڭ سەمانتيكالىق تانىمىن كەڭەيتتى، ويدى جەتكىزۋ مەن بايانداۋداعى كاسىبي شەبەرلىگىن ارتتىردى»، دەپ تولىقتىرىپ ءوتتى.

ايتا كەتەيىك، الەمنىڭ 100 وقۋلىعىن اۋدارۋ – گۋمانيتارلىق ءبىلىم بەرۋ سالاسىنداعى كونتسەپتۋالدى ويلاۋ جۇيەسىن جەتىلدىرۋگە نەگىز بولعان.

«ۇلتتىق تەرمينجاسام جۇيەسىن جانداندىردى. ەلىمىزدەگى اۋدارما سالاسىنىڭ سالالىق تىنىسىن اشا ءتۇستى ءارى گۋمانيتارلىق ءبىلىمنىڭ ءار سالاسىندا اۋدارماشىلار قاۋىمداستىعى قالىپتاستى دەسەك، قاتەلەسپەيمىز»، دەپ تۇيىندەدى داۋلەتبەك راەۆ.