ايماقتار • 21 قاڭتار، 2021

ورالدا ءدىني بىرلەستىكتىڭ زاڭسىز قىزمەتى اشكەرەلەندى

14 رەت كورسەتىلدى

باتىس قازاقستان وبلىستىق پوليتسيا دەپارتامەنتىنىڭ ەكسترەميزممەن كۇرەس باسقارماسىنىڭ وكىلى ءدىني بىرلەستىكتى قۇرىپ، وعان باسشىلىق ەتكەن ەكى تۇرعىن جاۋاپقا تارتىلعانىن مالىمدەدى، دەپ حابارلايدى Egemen.kz

بقو پوليتسيا دەپارتامەنتىنىڭ ەكسترەميزممەن كۇرەس باسقارماسىنان تۇسكەن مالىمەتكە قاراعاندا، ءدىني بىرلەستىكتى قۇرىپ، وعان باسشىلىق ەتكەن ەكى تۇرعىن جاۋاپقا تارتىلدى. قر اكىمشىلىك قۇقىقبۇزۋشىلىق كودەكسىنىڭ 489-بابىنا سايكەس ورال قالاسىنىڭ 1988 جىلعى ن. جانە 1986 جىلعى ي. دەگەن تۇرعىندارىنا قاتىستى حاتتاما تولتىرىلىپ، ارقايسىسىنا 145 850 تەڭگە ايىپپۇل سالىندى.

ولاردىڭ ەكەۋى دە تىركەلمەگەن، پروتەستانتتىق باعىتتاعى ءدىني اعىمدى ۇستانعان. قالعان كەلۋشىلەرمەن الدىن الۋ اڭگىمەلەرى جۇرگىزىلدى. اتالعان ءدىني بىرلەستىك ەكسترەميزممەن كۇرەس باسقارماسى قىزمەتكەرلەرىنىڭ نازارىنا 2019 جىلى ىلىككەن. سول كەزدە بىرلەستىك باسشىلارى اكىمشىلىك جاۋاپكەرشىلىككە تارتىلىپ، ولارعا ءتيىستى ورگاندا مىندەتتى تۇردە تىركەلۋ كەرەكتىگى تۋرالى ەسكەرتىلگەن.

بيىل وسى ءدىني اعىمدى ۇستاناتىندار ن-نىڭ جەكە تۇرعىن ۇيدە جينالعان. پوليتسيا قىزمەتكەرلەرى بارعان كەزدە ۇيدە 15-تەن استام ەرەسەك ادام جانە ونعا جۋىق بالا بولعان. بارلىق قاتىسۋشىلار ءدىني ءاندى جاپپاي ايتىپ وتىرعان.

دەمالىس كۇندەرى قاتىسۋشىلار سانى بۇدان دا كوبەيەدى. ۇستالعانداردان اقپاراتتىق پاراقشالار مەن كىتاپشالار تاركىلەندى. بقو پوليتسيا دەپارتامەنتىنىڭ ەكسترەميزممەن كۇرەس باسقارماسى وبلىس تۇرعىندارىنا قىراعىلىق تانىتىپ، ءداستۇرلى ەمەس ءدىني اعىمدارعا ىلەسپەۋ، زاڭسىز جيىندارعا قاتىسپاۋ كەرەكتىگىن، مۇنىڭ سوڭى قاتەرلى جاعدايعا سوقتىرۋى مۇمكىن ەكەندىگىن ەسكە سالادى.

سوڭعى جاڭالىقتار

اۋليە اتا ءھام ۇلى جىراۋ

رۋحانيات • كەشە

ۇقساس جاڭالىقتار