قوعام • 21 قاڭتار، 2021

ەندى جۇرگىزۋشى كۋالىگىنسىز جۇرە بەرۋگە بولادى

466 رەت كورسەتىلدى

سەناتتا جۇرگىزۋشى كۋالىگىن الىپ جۇرمەۋگە مۇمكىندىك بەرەتىن زاڭ قابىلداندى، دەپ حابارلايدى Egemen.kz

ەندى كولىك جۇرگىزۋشىلەرى جۇرگىزۋشى كۋالىگى مەن تەحنيكالىق پاسپورتتى وزىمەن بىرگە الىپ جۇرمەيتىن بولدى. سەناتورلار وسىعان قاتىستى ءتيىستى زاڭ قابىلدادى. سوعان سايكەس پوليتسەيلەر جۇرگىزۋشىدە قۇجاتتاردىڭ بار ەكەنىن دەرەكتەر بازاسى ارقىلى تەكسەرەدى. ول ءۇشىن وزىڭمەن بىرگە جەكە كۋالىگىڭ بولسا جەتكىلىكتى.

وسى نورما بويىنشا ەندى اتالعان قۇجاتتاردى وزىمەن بىرگە الىپ جۇرمەگەن جاعدايدا سالىناتىن ايىپپۇلدار دا جويىلادى.

«مەملەكەت باسشىسىنىڭ رەفورمالارىن ساپالى زاڭدارمەن قامتاماسىز ەتۋ – پارلامەنتتىڭ باستى مىندەتى. پرەزيدەنتىمىز اتاپ وتكەندەي، قوعامدى الاڭداتقان ماسەلەلەر پارلامەنتتە تالقىلانۋى قاجەت. پارلامەنت وزەكتى ماسەلەلەردىڭ شەشىمىن تاباتىن ورتالىققا اينالۋعا ءتيىس. سوندىقتان ءار زاڭ جوباسىن تالقىلاعان كەزدە قوعامنىڭ پىكىرىن ەسكەرۋىمىز كەرەك»، دەدى ماۋلەن اشىمباەۆ.

الايدا، مىنا ءبىر جايتتى ەسكەرۋ كەرەك. ەگەر جۇرگىزۋشى شەتەلدىك نومەرى بار كولىكپەن جۇرسە نەمەسە جۇرگىزۋشى كۋالىگىن شەتەلدەن السا، جوعارىدا اتالعان قۇجاتتاردى وزىمەن بىرگە الىپ جۇرۋگە مىندەتتى. سەبەبى، قازاقستاندىق پوليتسەيلەر ءۇشىن شەتەلدىك دەرەكتەر بازاسى قولجەتىمسىز.

زاڭ قول قويۋ ءۇشىن مەملەكەت باسشىسىنا جىبەرىلەدى.

ايتا كەتەيىك، پرەزيدەنت ۇلتتىق قوعامدىق سەنىم كەڭەسىنىڭ وتىرىستارىنىڭ بىرىندە كولىكتى قۇجاتسىز جۇرگىزگەنى ءۇشىن جاۋاپكەرشىلىكتى الىپ تاستاۋ تۋرالى تاپسىرما بەرگەن ەدى.

سوڭعى جاڭالىقتار

ۇقساس جاڭالىقتار