قازاقستاندىقتاردىڭ شەتەلدەن اقشا الۋى كۇرت ازايعان

ەكونوميكا • 21 قاڭتار، 2021

قازاقستاندىقتاردىڭ شەتەلدەن اقشا الۋى كۇرت ازايعان

418 رەت كورسەتىلدى

Ranking.kz-ءتىڭ مالىمەتىنشە، 2020 جىلدىڭ قاڭتار-قاراشا ايلارى ارالىعىندا اقشا اۋدارىمدارى جۇيەسى كومەگىمەن قازاقستاندىقتاردىڭ شەتەلدەن العان قاراجات كولەمى 18،5 پايىزعا قىسقارىپ، 258،4 ملرد تەڭگەنى قۇراعان، دەپ حابارلايدى Egemen.kz

اباي قازبەك ۇلى

وسىلايشا، شەتەلدەن قارجى اۋدارىمىن جاساۋ جۇيەسىن پايدالانۋشى قازاقستاندىقتار سانى ەكىنشى جىل قاتارىنان ازايعان. بيىل قاڭتار-قاراشادا ەڭ كوپ قارجى اۋدارىمدارى رەسەيدەن كەلگەن: 67،9 ملرد تەڭگە. سونىڭ ءوزى 2019 جىلدىڭ قاڭتار-قاراشاسىمەن سالىستىرعاندا 43،7 پايىزعا از. قازاقستان اۋدارىمدارىنداعى رەسەيدىڭ ۇلەسى ءبىر جىل ىشىندە 38،1 پايىزدان 26،3 پايىزعا ازايىپ كەتكەن. ەكىنشى ورىندا وڭتۇستىك كورەيا تۇر. اتالعان ەلدەن قازاقستانعا بيىل 47،1 ملرد تەڭگە اۋدارىلىپتى. اۋدارىم كولەمى 21،7 پايىزعا قىسقارعان. ال وزبەكستان مەن قىرعىزستاننان ەلىمىزگە اۋدارىلعان قارجى كولەمى كەرىسىنشە، 16،3 جانە 12،3 پايىزعا ارتقان.

اقشا اۋدارىمدارى جۇيەسىنىڭ اراسىندا ادەتتەگىدەي «زولوتايا كورونا» كوش باستايدى. بۇل جۇيە ارقىلى 125،5 ملرد تەڭگە جىبەرىلگەن. بۇل سوما بارلىق اۋدارىمدار كولەمىنىڭ تەڭ جارتىسىن قۇرايدى. ودان كەيىنگى ورىنداردا Western Union (61،7 ملرد تگ) جانە MoneyGram (31،1 ملرد تگ) جۇيەلەرى ورنالاسقان.

ەسكە سالايىق، «زولوتايا كورونانىڭ» الەمنىڭ 34 ەلىندە 50 مىڭنان استام قىزمەت كورسەتۋ بولىمشەسى بار. قارجىنى قولما-قول تۇردە (سەرۆيس سەرىكتەستەرىنىڭ بولىمشەلەرىندە، بانكتەردى قوسا ەسەپتەگەندە) جانە ونلاين تۇردە (سايتتا ارنايى فورمانى تولتىرۋ ارقىلى) جولداۋعا بولادى. قابىلداپ الۋشى ازامات وپەراتسيا اياقتالعان سوڭ ساناۋلى مينۋتتاردان كەيىن قاراجاتقا قول جەتكىزە الادى. از سوماعا كوميسسيا الىنبايدى. ۆاليۋتا كۋرسىن جۇيەنىڭ ءوزى انىقتايدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز