ۇكىمەت • 20 قاڭتار، 2021

نۇرلان نىعماتۋلين جاقىن ارادا قابىلداناتىن زاڭدار تۋرالى ايتتى

18 رەت كورسەتىلدى

بۇگىن پارلامەنت ءماجىلىسىنىڭ توراعاسى نۇرلان نىعماتۋلين جاقىن ارادا قابىلداناتىن زاڭدار قاي سالالارعا نەگىزدەلەتىنىن ايتتى، دەپ حابارلايدى Egemen.kz

«جەتىنشى شاقىرىلىم قازاقستان تاۋەلسىزدىگىنە 30 جىل، ال پارلامەنت قۇرىلعانىنا 25 جىل تولاتىن ەرەكشە كەزەڭدە ءوز جۇمىسىن باستاپ وتىر. وسىعان بايلانىستى مەملەكەت باسشىسى سەسسيانىڭ اشىلۋىندا بۇگىنگى جەتكەن جەتىستىكتەرىمىزدى ساقتاپ، ودان ءارى دامىتۋ جولىنداعى جاڭا ماقساتتار تۋرالى ايتتى. ونىڭ ىشىندە الەۋمەتتىك-ەكونوميكالىق، قۇقىقتىق-ساياسي باعىتتارعا باسا نازار اۋداراتىن بولامىز»، دەدى ول ءماجىلىسىنىڭ جالپى وتىرىسىندا.

وسى ورايدا ن. نىعماتۋلين اتالعان باعىتتار بويىنشا ءتيىستى زاڭدارمەن پارلامەنت قامتاماسىز ەتەتىنىن اتاپ ءوتتى.

«سول ءۇشىن مەملەكەت باسشىسى سەسسيانىڭ اشىلۋىندا دەپۋتاتتاردان ساپالى زاڭداردى تالاپ ەتەتىنىن ەرەكشە اتاپ ءوتتى. ول زاڭدار ەڭ الدىمەن حالىقتىڭ ءومىر ساپاسىن، ءبىلىم، دەنساۋلىق ساقتاۋ سالالارىن جاقسارتۋعا، الەۋمەتتىك قامتاماسىز ەتۋگە، شاعىن جانە ورتا بيزنەستى قولداۋعا ىقپال ەتۋگە ءتيىس. سوندىقتان ءبىزدىڭ باستى ماقساتىمىز – جوسپارعا سايكەس ءوز ۋاقىتىندا حالىققا قاجەتتى، پايدالى زاڭداردى قابىلداۋ»، دەدى ول.

ەسكە سالا كەتەيىك، 15 قاڭتاردا مەملەكەت باسشىسى قاسىم-جومارت توقاەۆتىڭ VII شاقىرىلىمداعى پارلامەنتتىڭ ءبىرىنشى سەسسياسىندا بىرقاتار مىندەت جۇكتەگەن ەدى.

سوڭعى جاڭالىقتار

ۇقساس جاڭالىقتار