سونىمەن جاڭا جىلدىڭ ار جاق, بەر جاعىنداعى قىدىرىستار كوپ ۇزاماي-اق «ناتيجەسىن» بەرە باستادى دەسەك تە بولادى. ەپيدەميالىق احۋال كۇردەلەنە كەلە, 15 قاڭتاردا الماتىدا 131 ادامنىڭ ىندەت جۇقتىرعانى انىقتالدى. ودان كەيىنگى كۇندەردە ىندەت جۇقتىرۋ سايابىر تاپقانداي كورىنگىنەمىن, جاعداي ءماز ەمەس.
الەمدە دە ەپيدەميالىق جاعداي ۋشىعا تۇسۋدە. بىرقاتار ەل ىندەتتىڭ ورشۋىنە جول بەرمەۋ ءۇشىن قوسىمشا شارالار ەنگىزۋگە ءماجبۇر بولىپ وتىر. مىسالى, وڭتۇستىك كورەيا ۇكىمەتى الەۋمەتتىك الىستاۋ دەڭگەيىن تاعى ەكى اپتاعا ۇزارتتى. 15 اقپانعا دەيىن ازاماتتارعا COVID-19 تارالۋىنىڭ جالعاسۋىنا بايلانىستى شەتەلگە ساپارلاردى بولدىرماۋ نەمەسە كەيىنگە قالدىرۋدى ۇسىنادى. جەكسەنبىدە اۋستريا ۇكىمەتى ۇلتتىق كارانتيندى 7 اقپانعا دەيىن ۇزارتاتىنىن جاريالادى. ۇلىبريتانيا 18 قاڭتاردان 15 اقپانعا دەيىن كوروناۆيرۋستىڭ جاڭا شتاممدارىنىڭ اكەلىنۋىنە جول بەرمەۋ ءۇشىن بارلىق تۋريستىك ءدالىزدى جابۋدا.
الماتىعا ورالاتىن بولساق, بۇگىنگە دەيىن قالادا كوروناۆيرۋس ينفەكتسياسىنىڭ 20 523 وقيعاسى تىركەلسە, ونىڭ 12 843-ءى سيمپتومدى جانە 7680-ءى سيمپتومسىز. سوڭعى مالىمەتتەرگە سايكەس, 18 قاڭتاردا 79 ادامنىڭ ىندەت جۇقتىرعانى تىركەلدى. ونىڭ ىشىندە 59 جاعداي سيمپتومدى, 20 جاعداي سيمپتومسىز. الماتىدا كوروناۆيرۋس ينفەكتسياسىنان ايىققاندار سانى – 18 484. جالپى, ينفەكتسيانىڭ كۇندەلىكتى ءوسۋى 0,3%-دى قۇرايدى. ۆيرۋستىڭ رەپرودۋكتيۆتىك كورسەتكىشى الماتى قالاسىندا 0,991 (رەسپۋبليكا بويىنشا – 1,1) قۇراپ وتىر.
قازىر قالانىڭ ينفەكتسيالىق ستاتسيونارلارىندا 763 پاتسيەنت بار, ونىڭ ىشىندە 16 ادامنىڭ جاعدايى وتە اۋىر, 141 ناۋقاستىڭ جاعدايى ناشار, 604 ادامنىڭ جاعدايى ورتاشا, 2 پاتسيەنت جەڭىل. قالا اكىمى باقىتجان ساعىنتاەۆتىڭ تاپسىرماسىمەن ەكىنشى تولقىنعا دايىندىق اياسىندا قالا بويىنشا توسەك قۋاتى 7 011 توسەكتىك 23 كوۆيدتى ستاتسيونار (ونىڭ ىشىندە 250 رەانيماتسيالىق) دايىندالعان. ەمحانالاردى مەديتسينالىق جابدىقتارمەن جاڭارتۋ جانە جەتە جاراقتاندىرۋ جۇرگىزىلدى. ەكى جاڭا ەمحانانىڭ قۇرىلىسى اياقتالدى. بۇلار – 500 توسەكتىك ورىنعا ارنالعان ينفەكتسيالىق گوسپيتال مەن 300 توسەكتىك ورىنعا ارنالعان مودۋلدىك ستاتسيونار. وسىلايشا, سوڭعى ءۇش ايدا ينفەكتسيالىق كەرەۋەت سانى ەكى ەسەگە ارتتى.
سونىمەن قاتار, العاشقى مەديتسينالىق-سانيتارلىق كومەك ۇيىمدارىنىڭ جۇمىسى كۇشەيتىلدى. 73 ەمحانادا 298 ءموبيلدى بريگادا جۇمىس ىستەيدى. مەديتسينا قىزمەتكەرلەرىنىڭ قاۋىپسىزدىگى مەن دايىندىعىنا ەرەكشە نازار اۋدارىلدى. جەكە قورعانىش قۇرالدارىنىڭ قورى قۇرىلدى. ەپيدەمياعا قارسى ءىس-شارالارعا تارتىلعان مەديتسينا قىزمەتكەرلەرىنەن باسقا 2 450 ماماننان تۇراتىن كادرلىق رەزەرۆ دايىندالدى.
تاۋلىگىنە 14 600 زەرتتەۋ جۇرگىزەتىن 23 پتر زەرتحاناسى جۇمىس ىستەيدى, بولاشاقتا 22 700 زەرتتەۋگە دەيىن ۇلعايتۋ مۇمكىندىگى بار. پاندەميا باستالعاننان بەرى الماتى اۋماعىندا ورنالاسقان زەرتحانالاردا بارلىعى 826 مىڭ پتر زەرتتەۋ جۇرگىزىلدى. سونداي-اق تاۋلىگىنە 3 056 زەرتتەۋ وتكىزۋ قۋاتى بار 12 يفت زەرتحانا جۇمىس ىستەيدى.
وكىنىشكە قاراي ىندەتتى سىرتتان اكەلۋ جاعدايلارىن تىركەۋ فاكتىلەرى جالعاسۋدا. 2020 جىلعى 6 قازاننان باستاپ وسى جىلدىڭ 18 قاڭتارىنا دەيىن الماتى حالىقارالىق اۋەجايىنا بورتىندا 109 724 جولاۋشىسى بار 773 رەيس كەلگەن. ونىڭ ىشىندە, COVID-19-عا تەرىس ناتيجەسى بار انىقتامالارمەن – 97 430, انىقتاماسىز – 12 294, ونىڭ ىشىندە پتر تالداۋدى تاپسىرعاننان كەيىن ارنايى كارانتيندىك ستاتسيوناردا 79 وڭ ناتيجە الىندى (تۇركيا – 30 جاعداي, ءباا – 18, مىسىر – 23, بەلارۋس – 5, ۋكراينا – 1, مالديۆ – 2 جاعداي). قالانىڭ حالىقارالىق اۋەجايىندا سانيتارلىق-ەپيدەميالىق باقىلاۋدى كۇشەيتۋ شارالارى جالعاسىن تاۋىپ وتىر. سونداي-اق انىقتامانىڭ جوقتىعىنان 31 شەتەل ازاماتى كەرى قايتارىلدى. قالا اۋەجايىندا سانيتارلىق-ەپيدەميالىق باقىلاۋدى كۇشەيتۋ بويىنشا شارالار جالعاسۋدا.
الماتى
