جامبىل وبلىسىندا سۋ باسۋى ىقتيمال 38 ەلدى مەكەن انىقتالعان

وبلىس اۋماعىندا 156 گيدروتەحنيكالىق قۇرىلعىلار ورنالاسقان. ونىڭ ىشىندە رەسپۋبليكالىق مەنشىكتە 36، كوممۋنالدىق مەنشىكتە 110 نىسان بار.

سونىمەن قاتار، وبلىستىڭ ەلدى مەكەندەرى مەن شارۋاشىلىق نىساندارى ءۇشىن قاۋىپ ءتوندىرۋى ىقتيمال 14 سۋ قويماسى بار ەكەن. ولاردىڭ قاتارىنا «تەرىس-اششىبۇلاق»، «تاسوتكەل»، «قاقپاتاس»، «اقكول»، «ىنتالى»، «قاراقوڭىز» سۋ قويمالارى جانە قىرعىز رەسپۋبليكاسىنىڭ اۋماعىندا ورنالاسقان «كيروۆ» سۋ قويماسى جانە تاعى دا باسقا نىساندار كىرەدى. «بۇل سۋ قويمالارى بوگەتتەرىنىڭ بۇزىلۋى بولعان جاعدايدا 234 مىڭنان استام تۇرعىنى بار 72 ەلدىمەكەندى سۋ باسۋ قاۋپى تۋىندايدى. سونىمەن قاتار، سۋ تاسقىنى مەن ەرىگەن قار سۋلارىمەن سۋ باسۋى ىقتيمال بولاتىن 38 ەلدى مەكەن انىقتالدى. سوڭعى 5 جىل ىشىندە سۋ تاسقىنىمەن جانە جەراستى سۋىنىڭ كوتەرىلۋىمەن بايلانىستى 7 وقيعا ورىن العان. ونىڭ سالدارىنان قورداي، جامبىل، ت.رىسقۇلوۆ اۋداندارىندا 104 تۇرعىن ءۇيدىڭ اۋلاسى، 25 تۇرعىن ءۇيدىڭ عيماراتى سۋ استىندا قالعان جانە جامبىل اۋدانىنان وتەتىن رەسپۋبليكالىق ماڭىزى بار اۆتوكولىك جولىنىڭ 515 شاقىرىمىندا جولدى سۋ شايىپ كەتۋ قاۋپى تونگەن»، دەيدى ەرمەك مومباەۆ.

بۇگىندە سۋ تاسقىنى قاتەرىن ازايتۋ ماقساتىندا «سۋ تاسقىنى قاتەرلەرىنىڭ الدىن الۋ جانە جويۋ جونىندەگى 2017-2020 جىلدارعا ارنالعان شارالار كەشەنى» جول كارتاسىندا وبلىستىڭ ەلدى مەكەندەرىن سۋ تاسقىنىنان جانە ەرىگەن قار سۋلارىنان قورعاۋ ءۇشىن 26 ۋچاسكەدە جاعالاۋدى قورعاۋ جۇمىستارىن جۇرگىزۋ جوسپارلانىپتى. ال، 2017-2020 جىلدارى جەرگىلىكتى بيۋدجەتتەن بولىنگەن 192،2 ميلليون تەڭگەگە 25 نىسان بويىنشا جۇمىستار تولىعىمەن اياقتالعان. سونىمەن قاتار، مويىنقۇم، سارىسۋ، ت.رىسقۇلوۆ، جۋالى، قورداي سياقتى بىرقاتار اۋدانداردا ورنالاسقان وزەندەر مەن سۋ قويمالارىنا جوندەۋ، تەرەڭدەتۋ جۇمىستارى جۇرگىزىلگەن. سول سياقتى، تاراز قالاسىنداعى تۇرعىن ۇيلەردى، اۋلالاردى جانە كوشەلەردى سۋ باسۋ وقيعالارىن بولدىرماۋ ماقساتىندا «قاپال»، «قاراسۋ-1»، «قاراسۋ-2»، «سەڭكىباي»، «ۇشبۇلاق»، «تۇيتە»، «بازارباي» كانالدارىنىڭ ارنالارى تازارتىلىپ، «شالعاي قاراسۋ» جانە «تايۆان» القابىنداعى كانالدارى تازالانعان. «سۋ تاسقىنىنا قارسى ءىس-شارالار جوسپارى اياسىندا 142 شاقىرىم درەناج جانە سۋارۋ كانالدارى، 185 شاقىرىم ارىق جەلىسى، تەمىر جانە اۆتوموبيل جولدارىندا 145 كوپىر جانە 789 سۋ وتكىزۋ قۇرىلعىلارى تازارتىلىپ، 5 گيدروتەحنيكالىق قۇرىلىستار مەن 19 رەتتەۋشى قۇرىلعىلارعا جوندەۋ جۇرگىزىلدى»، دەيدى دەپارتامەنت باستىعى. سونداي-اق، ول شۋ-تالاس باسسەيندىك ينسپەكتسياسى مەن «قازسۋشار» رمك فيليالى «تاسوتكەل» جانە «تەرىس-اششىبۇلاق» سۋ قويمالارىنان سۋ اعىزۋ مونيتورينگىن جۇرگىزۋدە ەكەنىن، شۋ-تالاس باسسەيندىك ينسپەكتسياسىمەن بىرلەسىپ قىرعىز رەسپۋبليكاسىنىڭ سۋ شارۋاشىلىعى جانە مەليوراتسيا دەپارتامەنتىمەن ءوزارا ءىس-قيمىل جۇرگىزىلۋدە ەكەنىن جەتكىزدى.

ايتا كەتەيىك، سۋ تاسقىنى سالدارىن جويۋ ءۇشىن جۇمىلدىرىلاتىن كۇشتەر مەن قۇرالدار توپتاماسىنىڭ قۇرامىندا 631 ادام، 53 بىرلىك تەحنيكا بار. سونداي-اق، 10 ءجۇزۋ قۇرالدارى مەن 41 موتوپومپا جاساقتالعان.        

جامبىل وبلىسى