الماتى تاۋلارى اسەمدىگىمەن، شاتقالدارىمەن ادامداردى وزىنە باۋرايدى. الايدا، ادامدار تاۋدا ءارتۇرلى توتەنشە جاعدايعا ۇشىراپ، جاراقات الىپ ءتىپتى ابايسىزدا كوز جۇمىپ جاتاتىن جاعدايلار دا كەزدەسەدى.

«كوبىنەسە، تاۋعا شىعۋعا دايارلانباعان ادامدار قيىندىققا تاپ بولادى. ينتەرنەتتەن كورگەن كوزدىڭ جاۋىن الاتىن كادرلارعا قاراپ، تاۋدا نە كۇتىپ تۇرعانىن باعامدامايدى. بارعالى تۇرعان باعىتى تۋرالى قاجەتتى اقپاراتتى بىلمەستەن، ارنايى جابدىقسىز، قيىن جولدى تاڭداي وتىرىپ، تۇستەن كەيىن تاۋعا شىعىپ، ومىرىنە قاۋىپ توندىرەدى. تۇنگى ۋاقىتتا تاۋدا جولدى تاپپاي قالۋى مۇمكىن»، دەيدى ۆەدومستۆو وكىلى.

2020 جىلى رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى تاۋدا 80-نەن استام ادامدى، ونىڭ ىشىندە بەس بالانى قۇتقاردى.

«ولارعا العاشقى مەديتسينالىق جانە پسيحولوگيالىق كومەك كورسەتىلدى. سونىمەن قاتار ىزدەستىرۋ كەزىندە كينولوگيا توپتارى كوپ كومەك كورسەتتى. ىزدەستىرۋ-قۇتقارۋ جۇمىسى كوبىنە تۇنگى ۋاقىتتا جۇرگىزىلەدى. ءارتۇرلى اۋا-رايى (جاڭبىر، قار، تۇمان)، كۇردەلى رەلەفتى جەر بەدەرى، تەڭىز دەڭگەيىنەن 4 000 مەترگە دەيىنگى بيىكتە جۇرگىزىلەتىن ىزدەستىرۋ وڭاعا سوقپايدى»، دەلىنگەن حابارلامادا. ءباسپاسوز قىزمەتى وسىنداي وقيعانىڭ بىرىنە توقتالدى.

وقيعا جازدا بولعان. ءتورت قاراعاندىلىق تۇستەن كەيىن، اۋا رايىنىڭ قولايسىزدىعىنا قاراماستان ۇلكەن الماتى كولىنە سەرۋەندەۋگە اتتانادى. الايدا، ىمىرت ءتۇسىپ، جاڭبىر جاۋىپ، كورىنۋ ناشارلاپ، اۋا تەمپەراتۋراسى كۇرت تومەندەپ، تۋريستەر باراتىن جەرىنە جەتە الماعان. قىزداردىڭ ءبىرى قۇلاپ، تىزەسىن جاراقاتتاپ الدى، ول وزدىگىنەن تاۋ ەتەگىنە تۇسە الماعان. قالعاندارعا ۇرەيگە بوي الدىردى. تۋريستەر رجقج قۇتقارۋشىلارىنان كومەك سۇرادى. مۇنداي جاعداي قۇتقارۋشى جۇمىسىندا ءجيى كەزدەسەدى.

«قىستا ادامدار تاۋ سوقپاقتارىندا سىرعاناپ، ءوزى نەمەسە وزگە بىرەۋدى قاعىپ كەتىپ، جاراقات الىپ جاتادى. تاۋدا قاجەتتى جابدىقسىز، ارنايى اياق كيىمسىز ادامنىڭ ۇسىك الۋ قاۋپى بار. مىسالى تاۋدا جوعالىپ كەتكەن تۇركيا ازاماتىنىڭ ەكى اياعىن II دارەجەلى ۇسىك شالىپ، سول جاق اياعى سىنعان. سول كەزدە شەتەلدىك ازاماتتى الماتى قالالىق ءىىد قىزمەتكەرلەرى ىزدەستىرىپ جاتقان بولاتىن. الايدا، تاۋ بەدەرىنىڭ ەرەكشەلىكتەرىن جانە ارنايى دايىندىق قاجەتتىلىگىن ەسكەرە وتىرىپ، تاۋداعى ىزدەستىرۋ-قۇتقارۋ جۇمىستارىن جۇرگىزۋگە رجقج قۇتقارۋشىلارىنا جۇگىندى. شەتەلدىكتى ۇلكەن الماتى شاتقالىنىڭ شىعىس جاعىنان تاپتى، العاشقى مەديتسينالىق كومەك كورسەتىپ، ارنايى زەمبىلمەن جولعا دەيىن جاياۋ جەتكىزىپ، اپاتتار مەديتسيناسى ورتالىعىنىڭ قىزمەتكەرلەرىنە تاپسىردى»، دەلىنگەن حابارلامادا.

تاۋعا بارعان كەزدە ادامدار تاۋ اۋرۋىنا تاپ بولۋى مۇمكىن، ول جالپى السىزدىك، جۇرەك سوعىسى، باس اينالۋ، ەستەن تانۋ جانە تىنىس الۋدىڭ قيىنداۋىنان بايقالۋى مۇمكىن. مۇنداي وقيعا 2020 جىلى قىستا ورىن الدى، «تۋريست» شىڭىنىڭ باۋرايىنان شاڭعىمەن سىرعاناپ جۇرگەن نيدەرلاند ازاماتىنىڭ جاعدايى ناشارلاپ كەتكەن.

دوستارى جۇرەك اۋرۋى دەپ كۇدىكتەنىپ، رەسپۋبليكالىق جەدەل-قۇتقارۋ جاساعىنان كومەك سۇرايدى. قۇتقارۋشىلار العاشقى مەديتسينالىق كومەك كورسەتىپ، شەتەل ازاماتىن تاۋ ەتەگىنە جەتكىزىپ، جەدەل مەديتسينالىق جاردەم قىزمەتكەرلەرىنە تاپسىردى. تاۋدا سوزىلمالى اۋرۋلار دا ءورشۋى مۇمكىن. وسىعان ۇقساس وقيعا جازدا كارلىتاۋ شىڭىنىڭ ماڭىندا بولدى.

تاۋعا شىققان كەزدە ەر ادامنىڭ تالماسى ۇستاپ قالعان. قۇتقارۋشىلار العاشقى مەديتسينالىق كومەك كورسەتىپ، ەر ادامدى قاۋىپسىز جەرگە جەتكىزدى.

«قۇتقارۋشىلاردىڭ تاۋداعى ءاربىر ىزدەستىرۋ-قۇتقارۋ جۇمىستارى ءبىر-بىرىنە ۇقسامايدى، ءتۇرلى جاعداي ورىن الىپ تۇرادى. رجقج قۇتقارۋشىلارىنىڭ ايتۋىنشا، قالا مەن تاۋلى ايماقتاردىڭ اۋا رايى ءبىر-بىرىنە ۇقسامايدى، ءارى كۇنىنە بىرنەشە رەت اۋا تەمپەراتۋراسى وزگەرەدى. بيىكتەگەن سايىن اۋا تەمپەراتۋراسى تومەندەپ، تۇمان مەن جاۋىن-شاشىننىڭ ىقتيمالدىعى دا ارتادى. تاۋعا جالعىز شىعۋعا بولمايدى، توتەنشە جاعداي بولسا، جانىڭىزدا كومەك كورسەتەتىن نەمەسە قۇتقارۋشىنى شاقىراتىن ادام كەرەك. اسىرەسە قىستا قار كوشكىنى قاۋپى دە ارتا تۇسەدى. ەگەر ءسىز سەرۋەندەۋگە باراتىن بولساڭىز، وزىڭىزبەن بىرگە سىرىڭكە، قوسىمشا جىلى كيىم، جاڭبىردان قورعايتىن جامىلعى الىپ، ارنايى ماۋسىمعا سايكەس كەلەتىن اياق كيىممەن شىعۋ كەرەك. سونداي-اق، قوسىمشا بايلانىس قۇرالىن، تەرموس جانە تاماق الۋدى ۇمىتپاڭىز. تاڭداعان باعىتىڭىز جايلى جاقىندارىڭىزدى حاباردار ەتىڭىز، توتەنشە جاعداي بولسا، بۇل ىزدەستىرۋ-قۇتقارۋ جۇمىسىن تەزدەتەدى. تاۋعا شىعار الدىندا جاقىندارىڭىزعا ءوز باعىتىڭىز تۋرالى مىندەتتى تۇردە ەسكەرتىڭىز، بۇل دا ىزدەۋشى جۇمىسىن جەدەلدەتەدى. ەسىڭىزدە بولسىن، باستى ماقسات – تاۋدىڭ باسىنا شىعۋ نەمەسە شىڭدى باعىندىرۋ ەمەس، ۇيگە امان-ەسەن جانە ساۋ ورالۋ»، دەيدى ۆەدومستۆو وكىلى.