ەكونوميكا • 18 قاڭتار، 2021

«Almaty Finance» بيزنەسكە قولداۋ كورسەتۋ باعدارلامالارى كەڭەيتىلدى

10 رەت كورسەتىلدى

الماتى قالاسىنىڭ اكىمى باقىتجان ساعىنتاەۆتىڭ تاپسىرماسى بويىنشا كاسىپكەرلىكتى دامىتۋ جانە قولداۋ ءۇشىن 2019 جىلى «Almaty Business – 2025» وڭىرلىك باعدارلاماسى ازىرلەنىپ، قابىلداندى، ونى ىسكە اسىرۋ شەڭبەرىندە «الماتى «اكك» ەنشىلەس قۇرىلىمى – «Almaty Finance» قۇرىلدى، دەپ حابارلايدى Egemen.kz.

بۇگىنگى تاڭدا «Almaty Finance» كومپانياسى تاماق ونەركاسىبىندە، IT-سالاسىندا، كرەاتيۆتى يندۋستريادا جوبالاردى ىسكە اسىرۋعا قارجىلاندىرۋدى ۇسىنادى، سونداي-اق ونەركاسىپتىك پاركتەردىڭ سەرۆيستىك ورتالىقتارىن، بالاباقشالار، جالپى ءبىلىم بەرەتىن مەكتەپتەر، مەديتسينالىق ورتالىقتار، مادەنيەت نىساندارى، سپورت الاڭدارى جاتاتىن الەۋمەتتىك سالا نىساندارىن سالۋ مەن دامىتۋدى قارجىلاندىرادى.

«سونىمەن قاتار قازىرگى پاندەميانى ەسكەرە وتىرىپ، ءبىز ءوز باعدارلامالارىمىزدى قايتا قاراپ، جاڭا فورماتتاعى ءۇيدىڭ جانىنداعى دۇكەندەر سياقتى باعىتتاردى قارجىلاندىرا باستادىق»، دەدى «Almaty Finance» جشس باسقارما توراعاسىنىڭ ورىنباسارى زاڭعار سالىمباەۆ.

سپيكەردىڭ ايتۋىنشا، پاندەمياعا بايلانىستى جۇيەلىك نەگىزدە بيزنەسپەن كەزدەسۋلەر وتكىزىلدى.

ء«بىز ءوز باعىتتارىمىزدى قايتا قارادىق جانە قازىرگى ۋاقىتتا ءوزىمىز ءۇشىن 7 باسىم باعىتتى ايقىندادىق. ولاردىڭ اراسىندا كرەاتيۆتى يندۋستريا، ويىن-ساۋىق، الەۋمەتتىك نىساندار قۇرىلىسى، ءۇي جانىنداعى دۇكەندەر جەلىسى، وندىرىستىك سەكتوردى دامىتۋ جانە قىزمەت كورسەتۋ سالاسىنىڭ ورتالىقتارىن كەڭەيتۋ، ستاتسيونارلىق ەمەس ساۋدا نۇكتەلەرىن قۇرۋ، سونداي-اق وڭدەۋ ونەركاسىبىن ودان ءارى دامىتۋ بار. بۇگىنگى تاڭدا ءبىز وسى 7 باعىتقا نازار اۋدارىپ وتىرمىز. قازىرگى ۋاقىتتا بۇل باعىتتار الماتى كاسىپكەرلەرىندە سۇرانىسقا يە. قازىرگى پاندەمياعا بايلانىستى كوپتەگەن كاسىپورىندار باسقا باعىتتار مەن ارتاراپتاندىرۋعا جۇگىنەدى. كوبىسى قازىر مەديتسينا مەن باسقا سالالارعا اۋىسۋدا»، دەپ ءتۇسىندىردى ول.

ەستەرىڭىزگە سالا كەتەيىك، 2019 جىلدان بەرى 8 ملرد تەڭگەدەن استام سوماعا 42 جوبا ماقۇلداندى، جۇزدەن استام جۇمىس ورنى قۇرىلدى.

سوڭعى جاڭالىقتار

«بارىس» ۇتىلىپ قالدى

سپورت • 06 ناۋرىز، 2021

ەلدوس سمەتوۆ كۇمىس الدى

سپورت • 06 ناۋرىز، 2021

«قايرات» – قولا جۇلدەگەر

ايماقتار • 06 ناۋرىز، 2021

ءار سالا ۇزدىكتەرىنە قۇرمەت تانىتتى

ايماقتار • 05 ناۋرىز، 2021

ۇقساس جاڭالىقتار