ۇكىمەت • 18 قاڭتار، 2021

سەناتورلار جول قوزعالىسىنا قاتىستى زاڭ جوباسىن قارايدى

11 رەت كورسەتىلدى

سەنات سپيكەرى ماۋلەن اشىمباەۆتىڭ توراعالىعىمەن پالاتا بيۋروسىنىڭ وتىرىسى ءوتتى، دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.

ءوز سوزىندە سەنات توراعاسى VII شاقىرىلىمداعى پارلامەنتتىڭ ءبىرىنشى سەسسياسىنىڭ اشىلۋىندا مەملەكەت باسشىسى بەلگىلەپ بەرگەن مىندەتتەردىڭ ماڭىزىنا ەرەكشە نازار اۋداردى.

«ادام قۇقىعىن قورعاۋ، الەۋمەتتىك ساياسات، ۇلتتىق ەكونوميكا، وڭىرلەردى دامىتۋ، ساياسي جاڭعىرۋ، ازاماتتىق ينستيتۋتتاردىڭ بەلسەندىلىگىن ارتتىرۋ سالالارى بويىنشا قولعا الىنعان جۇمىستار جالعاسا بەرەدى. پرەزيدەنتىمىز اتاپ وتكەندەي، وسى باعىتتاعى رەفورمالاردى ىسكە اسىرۋدا پارلامەنت ۇلكەن ءرول اتقارادى. بارلىق مىندەتتەردى تابىستى ورىنداۋ ءۇشىن سەنات ماجىلىسپەن بىرگە ءتيىستى ساپالى زاڭدار قابىلداۋى قاجەت»، دەدى ماۋلەن اشىمباەۆ.

بيۋرو وتىرىسىندا سەناتورلار دەپۋتاتتاردىڭ وڭىرلەرگە ساپارى جونىندە كوميتەت توراعالارىنىڭ اقپاراتتارىن تىڭدادى جانە پالاتانىڭ 2021 جىلعى 21 قاڭتاردا وتەتىن وتىرىسىنىڭ كۇن ءتارتىبىن تالقىلادى.

الداعى وتىرىستا سەناتورلار پارلامەنت دەپۋتاتتارى باستاماشى بولعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول ءجۇرىسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قارايدى. زاڭعا ەنگىزىلەتىن جاڭا نورمالار كولىك جۇرگىزگەن كەزدە جۇرگىزۋشى كۋالىگىن، ءاۆتوموبيلدىڭ تەحنيكالىق پاسپورتىن جانە باسقا دا بىرقاتار قۇجاتتاردى وزىڭمەن بىرگە الىپ ءجۇرۋ مىندەتىن الىپ تاستاۋدى كوزدەيدى.

سونىمەن قاتار دەپۋتاتتار پالاتا وتىرىسىنىڭ قاراۋىنا «قازاقستان رەسپۋبليكاسىنىڭ ۇكىمەتى مەن ءبىلىم، عىلىم جانە مادەنيەت ماسەلەلەرى جونىندەگى بىرىككەن ۇلتتار ۇيىمى (يۋنەسكو) اراسىنداعى يۋنەسكو اياسىندا مادەنيەتتەردى جاقىنداستىرۋ حالىقارالىق ورتالىعىن (2-سانات) قۇرۋ تۋرالى كەلiسiمدى راتيفيكاتسيالاۋ تۋرالى» زاڭ جوباسىن شىعاردى. قۇجاتتى راتيفيكاتسيالاعاننان كەيىن قازاقستان يۋنەسكو-نىڭ حالىقارالىق ديالوگ سالاسى بويىنشا ساياساتىن ازىرلەۋ جۇمىستارىنا قاتىسۋعا مۇمكىندىك الادى. سونداي-اق، ەلىمىز وسى سالاداعى عىلىمي زەرتتەۋلەر ءۇشىن وڭىرلىك حابقا اينالادى.

ودان بولەك، سەناتورلار الداعى بەيسەنبىدە «2007 جىلعى 6 ناۋرىزداعى قازاقستان رەسپۋبليكاسىنىڭ ۇكىمەتى مەن گرۋزيا ۇكىمەتى اراسىنداعى حالىقارالىق اۆتوموبيل قاتىناسى تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى»، «قازاقستان رەسپۋبليكاسى مەن حالىقارالىق قارجى كورپوراتسياسى اراسىنداعى قازاقستان رەسپۋبليكاسىندا وفيستەر قۇرۋ جانە ولاردىڭ قىزمەتى تۋرالى كەلىسىمدى راتيفيكاتسيالاۋ تۋرالى» جانە «تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ يادرولىق اۆاريا نەمەسە رادياتسيالىق اۆاريالىق احۋالدىڭ تۋىنداۋ جاعدايىنا دايىندىقتى جانە ولاردىڭ زارداپتارىن جويۋ كەزىندەگى ءوزارا كومەكتى قامتاماسىز ەتۋ بويىنشا ءوزارا ءىس-قيمىلى تۋرالى كەلىسىمدى راتيفيكاتسيالاۋ تۋرالى» زاڭ جوبالارىن قارايدى.

سوڭعى جاڭالىقتار

قازاقستاندا جاڭا كەن ورنى تابىلدى

ەكونوميكا • بۇگىن، 16:21

ەڭ سۇلۋ ۆولەيبولشى كىم؟

سپورت • بۇگىن، 16:15

ەل قورعاعان ەردىڭ ەسىمى جاڭعىردى

رۋحانيات • بۇگىن، 14:49

كورشىنىڭ كوپ-كورىم كومەگى

قوعام • بۇگىن، 14:23

ۇقساس جاڭالىقتار