ءبىرىنشىسى – وزبەك اعايىندار ورتاسىندا ءوسىپ-ونگەن قانداسىمىز سابىر راحيموۆ 1943 جىلى 19 ناۋرىزدا اسكەري جوعارى شەن گەنەرال-مايور اتاعىنا قول جەتكىزسە, ەكىنشى قازاق – شاكىر جەكسەنباەۆ 1943 جىلى قازان ايىندا, ءۇشىنشى قازاق – موڭعوليا اۋە كۇشتەرىنىڭ باس قولباسشىسى جايسانىپ ءمۇدارىس ۇلى 1944 جىلدىڭ ءساۋىر ايىندا بۇل اتاققا يە بولىپتى.
وسىلاردىڭ ىشىندە باتىس قازاقستان وبلىسى, وردا اۋدانى شوڭاي اۋىلىندا 1901 جىلى دۇنيەگە كەلگەن شاكىر جەكسەنباي ۇلىنىڭ تۋعانىنا بيىل 120 جىل تولىپ وتىر.
جۋىقتا ورال قالاسىنا بارعان ساپارىمىزدا وبلىستىق تاريحي-ولكەتانۋ مۋزەيىنىڭ كورمە زالىندا تۇرعان گەنەرالدىڭ كيتەلىن كوردىك. جىبەك ماتادان تىگىلگەن اسكەري ءمۋنديردىڭ يىعىندا گەنەرال-مايور پوگونى جانە قايىرما جاعاسىندا التىن-بيداي پوشىمدى ايىرىم تاڭباسى تۇر. سول جاق ومىراۋىندا «لەنين» وردەنىمەن قاتار 4 مارتە يە بولعان «جاۋىنگەرلىك قىزىل تۋ» وردەنى جانە «وتان سوعىسى», «قىزىل تۋ» وردەندەرىنىڭ لەنتاسى كوز تارتادى.
مۋزەي ديرەكتورىنىڭ ورىنباسارى اجار بەرىكقاليەۆا حانىمنىڭ ايتۋى بويىنشا, بۇل جادىگەردى گەنەرال 1977 جىلى 19 جەلتوقسان كۇنى وسى مۋزەيگە ءوز قولىمەن اكەلىپ تاپسىرعان ەكەن. ويتكەنى بۇل جىلى كسرو-نىڭ قۇرىلعانىنا 60 جىل تولىپ, داتالى توي وداق كولەمىندە كەڭىنەن اتاپ ءوتىلىپتى. اتالمىش مەرەكە قارساڭىندا ماسكەۋ قالاسىندا تۇراتىن گەنەرال اتامىز جۇبايى نينا يۆانوۆنامەن بىرگە وردا اۋداندىق پارتيا كوميتەتىنىڭ ءبىرىنشى حاتشىسى, سوعىس ارداگەرى ءارى اقىن راحمەتوللا ەگىزباەۆتىڭ شاقىرۋىمەن تۋعان جەرىنە كەلگەن. ءدال وسى ساپارىندا جوعارىداعى جادىگەردى مۋزەيگە تاپسىرعان سياقتى.
بۇل وقيعانىڭ باسى-قاسىندا جۇرگەن, قازىرگى تاڭدا ورال قالاسىندا تۇراتىن جەكسەنباەۆتىڭ نەمەرە ءىنىسى, تەحنيكا عىلىمدارىنىڭ دوكتورى ەرمەك ايتاليەۆ, «گەنەرالعا اۋىلداستارى استىنا ات مىنگىزىپ قۇرمەت كورسەتتى, سونىمەن قاتار اۋدان ورتالىعىندا حالىقپەن كەزدەسۋ ۇيىمداستىردى» دەيدى. وسىنداعى تاريحي ساتتەن ەستەلىك رەتىندە تۇسىرىلگەن فوتولار ەرمەك ءساتپاي ۇلىنىڭ جەكە قورىندا ساقتاۋلى ەكەن.
