الداعى بەس جىلدا الماتى وبلىسىندا 5 ملن. 400 مىڭ شارشى مەتر تۇرعىن ءۇي سالىنادى

ايماقتار • 15 قاڭتار، 2021

الداعى بەس جىلدا الماتى وبلىسىندا 5 ملن. 400 مىڭ شارشى مەتر تۇرعىن ءۇي سالىنادى

18 رەت كورسەتىلدى

الماتى وبلىسىندا 2021-2025 جىلدارى وبلىستا شامامەن 5 ملن. 400 مىڭ شارشى مەتر تۇرعىن ءۇي سالۋ جوسپارلانۋدا، سونىڭ 1،1 ملن. شارشى مەترى «نۇرلى جەر» باعدارلاماسى اياسىندا ىسكە اسىرىلادى. باسپانامەن ءۇش مىڭنان استام الەۋمەتتىك وسال جانە 5500-دەن استام كوپ بالالى وتباسى قامتاماسىز ەتىلمەك. بۇل تۋرالى بۇگىن وبلىستىق ءماسليحاتتىڭ VII شاقىرىلىمىنىڭ I-ءشى سەسسياسىندا وبلىستىڭ 2021-2025 جىلدارعا ارنالعان دامۋ باعدارلاماسىنىڭ جوباسىن دەپۋتاتتارعا تانىستىرعان وبلىس اكىمىنىڭ ورىنباسارى جەڭىس تۇياقوۆ ايتتى، دەپ حابارلايدى Egemen.kz الماتى وبلىسى اكىمىنىڭ ءباسپاسوز قىزمەتىنە سىلتەمە جاساپ.

دينار كەرىم

بايانداماشىنىڭ ايتۋىنشا، اتالعان باعدارلامادا وبلىستى جايلى جانە قاۋىپسىز ءوڭىر رەتىندە دامىتۋ نەگىزگى باسىمدىقتاردىڭ ءبىرى بولىپ بەلگىلەنگەن. مۇندا حالىقتىڭ تۇرعىن ۇيمەن قامتۋعا ەرەكشە كوڭىل بولىنەدى.

وبلىستا بەس جىلدا 5 ملن. 400 مىڭداي شارشى مەتر تۇرعىن ءۇي سالۋ كوزدەلسە، سونىڭ 1،1 ملن. شارشى مەترى «نۇرلى جەر» باعدارلاماسى ارقىلى شەشىلمەك. سونداي-اق، 58 مىڭ پاتەرلىك ءبىر مىڭنان استام كوممەرتسيالىق ءۇي سالىنادى، ونىڭ 5 مىڭى «7-20-25» باعدارلاماسى بويىنشا ىسكە اسىرىلادى. سونىڭ ارقاسىندا تۇرعىن ۇيمەن ءۇش مىڭنان استام الەۋمەتتىك وسال جانە 5527 كوپ بالالى وتباسى قامتاماسىز ەتىلەدى دەپ جوسپارلانىپ وتىر.

باعدارلامادا حالىقتى ساپالى اۋىز سۋمەن قامتاماسىز ەتۋگە ەرەكشە كوڭىل بولىنگەن. اتاپ ايتقاندا، 9 اۋداننىڭ 33 اۋىلىنا ورتالىقتاندىرىلعان سۋ جۇيەسى سالىنادى، 72 اۋىلدا سۋ جەلىلەرىن جوندەۋ جۇمىستارى جۇرگىزىلەدى. سونىڭ ناتيجەسىندە ورتالىقتاندىرىلعان سۋمەن 100% قامتاماسىز ەتۋگە قالالار 2023 جىلى قول جەتكىزسە، اۋىلدار 2025 جىلى جەتەدى.

«الماتى-تالدىقورعان» ماگيسترالدىق گاز قۇبىرىن سالۋ مەن ەلدى مەكەندەردى گازداندىرۋ دەڭگەيى 2014 جىلعى 20%-تەن 2020 جىلى 59%-كە دەيىن ءوستى. «تالدىقورعان-ءۇشارال» جانە «شەلەك-كەگەن» ماگيسترالدىق گاز قۇبىرلارىن سالۋ ارقىلى اقسۋ، سارقان، الاكول، كەگەن جانە رايىمبەك اۋداندارىنىڭ 195 ەلدى مەكەنى گازبەن قامتىلاتىن بولادى. ءسويتىپ 1،6 ملن.تۇرعىن نەمەسە بۇكىل حالىقتىڭ 76% كوگىلدىر وتىننىڭ يگىلىگىن كورۋ مۇمكىندىگىنە يە بولادى.

سونداي-اق، باعدارلامادا شاعىن قالالاردىڭ كوپ قاباتتى تۇرعىن ۇيلەرىنە گازبەن ىستەيتىن بلوكتى-ءمودۋلدى قازاندىقتار ورناتۋ قاراستىرىلعان. بۇل جۇمىس 2018 جىلى تالعار قالاسىنان باستالىپ، وتكەن جىلى قاسكەلەڭدە جالعاسقان. ءۇش جىلدىڭ ىشىندە ەكى قالادا 4898 پاتەرلى 152 ءۇي ورتالىق جىلۋ جۇيەسىنە قوسىلدى. ەندى ەسىك، جاركەنت قالالارىن جانە باسقا دا ءىرى ەلدى مەكەندەرى قامتىلادى، ءسويتىپ اۆتونومدى جىلىتۋ پروبلەماسى تولىعىمەن شەشىلەدى.

باعدارلامادا جەرگىلىكتى جولداردى جاقسارتۋعا دا كوڭىل بولىنگەن. بەس جىل ىشىندە ءتورت مىڭ شاقىرىمنان استام جولدى قايتا قۇرۋ جانە جوندەۋدىڭ بارلىق تۇرلەرىمەن قامتۋ جوسپارلانۋدا. وسىنىڭ ەسەبىنەن 118 اۋىلداعى جولداردىڭ ساپاسى جاقسارادى. ءسويتىپ جاقسى جانە قاناعاتتانارلىق جاعدايداعى جەرگىلىكتى جولداردىڭ ۇلەسىن 2025 جىلعا قاراي 100%-كە جەتكىزۋ مىندەتى قويىلىپ وتىر.

سول سياقتى قىلمىستى ازايتۋ ماقساتىندا قوعامدىق ورىندارىندا 1736 بەينەباقىلاۋ كامەرالارىن ورناتۋ، جىل سايىن كەمىندە 30 پاترۋلدىك اۆتوكولىك ساتىپ الۋ، تۇرعىن ۇيمەن بىرىكتىرىلگەن ۋچاسكەلىك پوليتسيا پۋنكتتەرىنىڭ سانىن 217-گە جەتكىزۋ كوزدەلگەن.

جالپى الماتى وبلىسىندا ينجەنەرلىك ينفراقۇرىلىم مەن الەۋمەتتىك نىسانداردىڭ جاعدايىن جاقسارتۋ ءۇشىن 590 ملرد. تەڭگەگە - 1 129 جوبا، ونىڭ ىشىندە «اۋىل - ەل بەسىگى» جوباسى شەڭبەرىندە 104 ملرد. تەڭگەگە 445 جوبا ىسكە اسىرىلادى. بارلىعى 407 اۋىل نەمەسە اۋىلدىق ەلدى مەكەندەردىڭ 56%-ءى قامتىلادى. وسى شارالار ەسەبىنەن 2025 جىلعا قاراي وڭىرلىك ستاندارتتار جۇيەسىنە سايكەس كەلەتىن اۋىلداردىڭ ۇلەس سالماعى 54%-تەن 90%-كە دەيىن ۇلعايادى.

اتاپ وتسەك، الماتى وبلىسىنىڭ 2021-2025 جىلدارعا ارنالعان دامۋ باعدارلاماسىن جۇزەگە اسىرۋعا 3،5 ترلن. تەڭگە قاراستىرىلعان، ونىڭ 2 ترلن. 300 ملرد. تەڭگەسى – بيۋدجەتتىك، 1 ترلن. 200 ملرد. تەڭگەسى - جەكە قاراجات.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز