ايماقتار • 15 قاڭتار، 2021

الماتى وبلىسىنىڭ 2021-2025 جىلدارعا ارنالعان دامۋ باعدارلاماسى بەكىتىلدى

22 رەت كورسەتىلدى

بۇگىن الماتى وبلىسىنىڭ اكىمى اماندىق باتالوۆتىڭ قاتىسۋىمەن وبلىستىق ءماسليحاتتىڭ VII شاقىرىلىمىنىڭ ءبىرىنشى سەسسياسى ءوتىپ، وندا ءوڭىردىڭ 2021-2025 جىلدارعا ارنالعان دامۋ باعدارلاماسى بەكىتىلدى، دەپ حابارلايدى Egemen.kz

اتالعان باعدارلامانى جۇزەگە اسىرۋعا 3،5 ترلن. تەڭگە قاراستىرىلىپ وتىر. ەڭ باستىسى، بۇل قۇجات اكىمدەردىڭ ەسەپ بەرۋ جيىندارىندا، جەكە قابىلداۋلاردا، «Nur Otan» پارتياسى وبلىستىق فيليالىنىڭ قوعامدىق قابىلداۋىندا ايتىلعان، اكىمنىڭ جەكە بلوگىنا كەلىپ تۇسكەن ءوتىنىش-تىلەكتەردى ەسكەرە وتىرىپ دايىندالعان.

سەسسيانى اشقان وبلىستىق سايلاۋ كوميسسياسىنىڭ توراعاسى تيمۋر ءداۋىتوۆ ءماسليحات دەپۋتاتتىعىنا سايلانعان دەپۋتاتتاردى قۇتتىقتاپ، بيىلعى جىلدىڭ 10 قاڭتارىندا وتكەن پارلامەنتى ءماجىلىسىنىڭ جانە جەرگىلىكتى وكىلدى ورگاندارى دەپۋتاتتارى سايلاۋىنىڭ قورىتىندىسىمەن تانىستىردى.

وسى جيىندا سەسسيانىڭ توراعاسى بولىپ اسەت قىدىرمانوۆ سايلانىپ، وبلىستىق ءماسليحاتتىڭ حاتشىلىعىنا ۇسىنىلعان جانبولات جورگەنباەۆتىڭ كانديداتۋراسىن دەپۋتاتتار ءبىراۋىزدان قولدادى.  سول سياقتى وبلىستىق ءماسليحاتتىڭ تۇراقتى كوميسسيالارىنىڭ ءتىزىمى مەن سان قۇرامى بەلگىلەنىپ، تۇراقتى كوميسسيالاردىڭ توراعالارى مەن مۇشەلەرى سايلاندى. «Nur Otan» ساياسي پارتياسىنىڭ دەپۋتاتتىق فراكتسياسى تىركەلسىن دەگەن شەشىم قابىلداندى.

ال الماتى وبلىسىنىڭ 2021-2025 جىلدارعا ارنالعان دامۋ باعدارلاماسىنىڭ جوباسىن دەپۋتاتتارعا وبلىس اكىمىنىڭ ورىنباسارى جەڭىس تۇياقوۆ تانىستىردى. بۇل ءوڭىر ەكونوميكاسىنىڭ الداعى 5 جىلداعى ساپالى جانە تۇراقتى ءوسىمىن قامتاماسىز ەتۋگە باعىتتالعان قۇجات بولماق.

ج.تۇياقوۆ ءوز سوزىندە 2016-2020 جىلدارعا ارنالعان الدىڭعى باعدارلامانىڭ ورىندالۋىنا قىسقاشا توقتالىپ، وتكەن جىلى مەملەكەت قولداۋىمەن ەكونوميكالىق جاعىنان جاقسى كورسەتكىشتەرگە قول جەتكىزگەنىمىزدى اتاپ ءوتتى. بيىلعى جىلى دا سول ءوسىم قارقىنىن ساقتاۋعا باعىتتالعان شارالار قابىلدانباق.

حالىقپەن كەرى بايلانىس ورناتۋ بارىسىندا ايتىلعان وتىنىشتەردەگى ماسەلەلەردى قامتي وتىرىپ ازىرلەنگەن باعدارلاما «Nur Otan» پارتياسىنىڭ سايلاۋالدى باعدارلاماسىمەن ۇندەس.  وندا نەگىزگى ءۇش باعىت ايقىندالعان: ء«وڭىر ەكونوميكاسىن كوتەرۋ»، ء«ومىر سۇرۋگە جايلى جانە قاۋىپسىز ءوڭىر»، ء«ومىر ءسۇرۋدىڭ جاڭا ساپاسىن قامتاماسىز ەتۋ». بارلىعى 16 ماقسات، 25 ماقساتتى ينديكاتور بەلگىلەنگەن. ونىڭ ىشىندە تۇرعىن ءۇي، دەنساۋلىق ساقتاۋ، ءبىلىم بەرۋ، سپورت جانە باسقا دا ماڭىزدى نىساندار سالۋ، اۋىز سۋ، گاز، جىلۋ جۇيەلەرىنىڭ، جولداردىڭ قۇرىلىسى، جۇمىسپەن قامتۋ جانە باسقا دا الەۋمەتتىك-ەكونوميكالىق دامۋعا ىقپال ەتەتىن شارالار تولىقتاي قامتىلعان. 

جالپى الماتى وبلىسىنىڭ 2021-2025 جىلدارعا ارنالعان دامۋ باعدارلاماسىن جۇزەگە اسىرۋعا 3،5 ترلن تەڭگە قاراستىرىلعان، ونىڭ 2 ترلن 300 ملرد تەڭگەسى – بيۋدجەتتىك، 1 ترلن 200 ملرد تەڭگەسى – جەكە قاراجات.

قۇجاتتى وبلىس دەپۋتاتتارى ءبىراۋىزدان قولدادى.

سەسسيادا ءسوز العان وبلىس اكىمى اماندىق باتالوۆ:

– قۇرمەتتى دەپۋتاتتار! بارشاڭىزدى جەتىنشى شاقىرىلعان الماتى وبلىستىق ءماسليحاتىنىڭ ءبىرىنشى سەسسياسىنىڭ اشىلۋىمەن قۇتتىقتايمىن! بۇگىن قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆ پارلامەنت پالاتالارىنىڭ كەڭەيتىلگەن وتىرىسىنا قاتىسىپ، جاڭادان سايلانعان ءماجىلىس دەپۋتاتتارىن قۇتتىقتادى. ءوز سوزىندە مەملەكەت باسشىسى ساياسي رەفورمالاردىڭ نەگىزگى باعىتتارىن اتاپ ءوتتى. باستى نازار – ءتيىمدى الەۋمەتتىك ساياساتتى جۇرگىزۋگە، ونىڭ ىشىندە دەنساۋلىق ساقتاۋ سالاسىن جاڭعىرتۋ، اۋرۋدىڭ الدىن الۋ ماقساتىندا بۇقارالىق سپورتتى دامىتۋ، زەينەتاقى جۇيەسىنە ءارى قاراي ەنگىزىلەتىن وزگەرىستەردى پىسىقتاۋ قاجەتتىلىگىن كورسەتتى، – دەدى ا. باتالوۆ.

وتكەن سايلاۋ بارىسى، ونداعى حالىقتىڭ بەلسەندىلىگى، سايلاۋدىڭ دەموكراتيانى دامىتۋعا قوساتىن ۇلەسى تۋرالى ايتا كەلە، بۇگىنگى ءماسليحات دەپۋتاتتارىنىڭ جاڭا قۇرامىندا «Nur Otan» پارياسىنان – 37، ال «اۋىل» جانە «قحپ» پارتيالارىنىڭ ارقايسىسىنان 4 دەپۋتاتتان كىرگەنىن اتاپ ءوتتى. ونەركاسىپ، اۋىل شارۋاشىلىعى، ءبىلىم بەرۋ، شاعىن جانە ورتا بيزنەس سياقتى ماڭىزدى سالالاردىڭ وكىلدەرى دە جاڭا قۇرامعا ەنگىزىلگەن.

ايەلدەرگە بەرىلەتىن ورىننىڭ 30%-دىق كۆوتاسى تالابى دا ساقتالعان. جاڭا قۇرامدا جاستاردىڭ وكىلدەرى دە بار، ولار 16،6% قۇراپ وتىر. 

– وتكەن جىلى دەر كەزىندە قابىلدانعان داعدارىسقا قارسى شارالاردىڭ ارقاسىندا وبلىس ەكونوميكاسىنىڭ نەگىزگى سالالارىندا وڭ سەرپىن ساقتالدى. جاڭا قابىلدانعان الماتى وبلىسىنىڭ 2021-2025 جىلدارعا ارنالعان دامۋ باعدارلاماسىندا وسى كورسەتكىشتەرىمىزدى ودان ءارى ەسەلەپ، ءوڭىردى ءارى قاراي  وركەندەتۋدىڭ ناقتى قادامدارى بەلگىلەنىپ وتىر. ەلباسى مەن پرەزيدەنت الدىعا قويعان، حالىقتىڭ ءال-اۋقاتىن جاقسارتۋعا باعىتتالعان اۋقىمدى مىندەتتەردى اتقارۋعا جاڭا قۇرامداعى ءماليحات بەلسەنە اتسالىسادى دەگەن سەنىمدەمىن، – دەدى ا.باتالوۆ.  

بۇدان سوڭ التىنشى شاقىرىلىمدا بەلسەندى دەپۋتاتتىق قىزمەت اتقارعانى ءۇشىن بىرقاتار ازاماتقا قۇرمەت گراموتاسىن تاپسىرىپ، ماراپاتتادى.

سول سياقتى الدىڭعى شاقىرىلىم قۇرامىندا بولعان جامال قۇلاحمەتوۆا مەن وسى 7-ءشى شاقىرىلىم دەپۋتاتتارىنىڭ اتىنان جالعاسحان دونباەۆ ءسوز الىپ، ارىپتەستەرىنە يگى تىلەكتەرىن ءبىلدىردى.

اتاپ وتسەك، وسىعان دەيىنگى التىنشى شاقىرىلىم دەپۋتاتتارى 2016-2021 جىلدار ارالىعىندا بيۋدجەت، اكىمشىلىك-اۋماقتىق قۇرىلىم، تابيعي رەسۋرستاردى پايدالانۋ، تۇرعىن-ءۇي كوممۋنالدىق شارۋاشىلىق ماسەلەلەرى بويىنشا 341 شەشىم قابىلداعان. 2016-2020 جىلدارعا ارنالعان وبلىس بيۋدجەتىنە 21 وزگەرىس پەن تولىقتىرۋ ەنگىزگەن.

الماتى وبلىسىن دامىتۋدىڭ 2016-2020 جىلدارعا ارنالعان باعدارلاماسىنا 6 رەت قاجەتتى وزگەرىستەر مەن تولىقتىرۋلار جاساعان. جەرگىلىكتى اتقارۋشى ورگاندارعا وبلىس تۇرعىندارىنىڭ پروبلەمالارىنا قاتىستى 86 دەپۋتاتتىق سۇراۋ جىبەرىپ، ولارعا قاتىستى وڭ شەشىم قابىلدانۋىنا ىقپال ەتكەن.

سوڭعى جاڭالىقتار

«بارىس» ۇتىلىپ قالدى

سپورت • 06 ناۋرىز، 2021

ەلدوس سمەتوۆ كۇمىس الدى

سپورت • 06 ناۋرىز، 2021

«قايرات» – قولا جۇلدەگەر

ايماقتار • 06 ناۋرىز، 2021

ءار سالا ۇزدىكتەرىنە قۇرمەت تانىتتى

ايماقتار • 05 ناۋرىز، 2021

باعدات مۋسين شىمكەنتكە باردى

ايماقتار • 05 ناۋرىز، 2021

ۇقساس جاڭالىقتار