مەملەكەتتىك قىزمەتشىلەر 2021 جىلى قانداي دەكلاراتسيانى تاپسىرۋى كەرەك؟

قازاقستان • 14 قاڭتار، 2021

مەملەكەتتىك قىزمەتشىلەر 2021 جىلى قانداي دەكلاراتسيانى تاپسىرۋى كەرەك؟

38 رەت كورسەتىلدى

2021 جىل ەلىمىزدە جالپىعا بىردەي دەكلاراتسيالاۋدى ەنگىزۋدىڭ ءبىرىنشى كەزەڭىنىڭ باسى بولماق. قر قم مەملەكەتتىك كىرىستەر كوميتەتىنىڭ ءباسپاسوز قىزمەتى مەملەكەتتىك قىزمەتشىلەردىڭ اعىمداعى جىلى قانداي دەكلاراتسيانى تاپسىرۋى كەرەكتىگىن ءتۇسىندىردى، دەپ حابارلايدى Egemen.kz.

جانبولات كەنجەعۇل

جالپىعا بىردەي سالىقتىق دەكلاراتسيالاۋ ەنگىزىلگەنگە دەيىن مەملەكەتتىك قىزمەتشىلەر، ولارعا تەڭەستىرىلگەن ادامدار، ولاردىڭ جۇبايلارى جىل سايىن مەملەكەتتىك كىرىستەر ورگاندارىنا 230.00 نىسانى بويىنشا تابىستارى مەن مۇلكى تۋرالى دەكلاراتسيالاردى تابىس ەتەتىن.

الايدا، 2021 جىلعى 1 قاڭتاردان باستاپ تابىستارى مەن مۇلكى تۋرالى دەكلاراتسيانى (230.00-نىسان) ۇسىنۋ بويىنشا تالاپتار توقتاتىلادى.

بۇل 2021 جىلى اتالعان تۇلعالاردىڭ 2020 جىلعى 31 جەلتوقسانداعى جاعداي بويىنشا اكتيۆتەرى مەن مىندەتتەمەلەرىن كورسەتە وتىرىپ، 250.00-نىسانداعى اكتيۆتەر مەن مىندەتتەمەلەر تۋرالى دەكلاراتسيانى ۇسىنۋ مىندەتتەمەسىنىڭ تۋىنداۋىنا بايلانىستى.

دەكلاراتسيا تۇرعىلىقتى جەرى (كەلۋ ورنى) بويىنشا:

- قاعاز نۇسقادا تاپسىرىلعان جاعدايدا – 2021 جىلعى 15 شىلدەدەن كەشىكتىرمەي;

- ەلەكتروندى تۇردە تاپسىرىلعان جاعدايدا – 2021 جىلعى 15 قىركۇيەكتەن كەشىكتىرىلمەي تاپسىرىلۋى ءتيىس.

2020 جىلى م ۇلىكتىك تابىستى، قازاقستان رەسپۋبليكاسىنان تىس جەرلەردەگى كوزدەردەن تابىستى جانە سالىق كودەكسىنىڭ 363-بابىندا كوزدەلگەن وزگە دە كىرىستەردى العان جاعدايدا اتالعان تۇلعالار ورنالاسقان (تۇرعىلىقتى) جەرى بويىنشا سالىق ورگانىنا جەكە تابىس سالىعى بويىنشا دەكلاراتسيانى (240.00-نىسان) تابىس ەتەتىنىن ەسكەرۋ قاجەت. بۇل دەكلاراتسيانى تاپسىرۋ مەرزىمى - 2021 جىلعى 31 ناۋرىز. 2022 جىلدان باستاپ مۇنداي كىرىستەر 270.00- نىسانداعى دەكلاراتسيادا كورسەتىلەدى.

ەگەر جەكە تۇلعا قاتەلەسىپ، 2020 جىلعا ارنالعان 230.00-نىسانداعى دەكلاراتسيانى تاپسىرسا، وندا مۇنداي دەكلاراتسيا كەرى قايتارىلىپ الۋى ءتيىس.

ەسكە سالا كەتەيىك، اعىمداعى جىل ەلىمىزدە جالپىعا بىردەي دەكلاراتسيالاۋدى ەنگىزۋدىڭ ءبىرىنشى كەزەڭىنىڭ باسى بولادى، دەپ حابارلادى قر قم مەملەكەتتىك كىرىستەر كوميتەتىنىڭ ءباسپاسوز قىزمەتى.

سالىق كودەكسىندە جالپىعا بىردەي دەكلاراتسيالاۋدى ءتورت كەزەڭمەن جۇزەگە اسىرۋ قاراستىرىلعان.

ءبىرىنشى كەزەڭدە (2021 جىلعى 1 قاڭتاردان باستاپ):

- جاۋاپتى مەملەكەتتىك لاۋازىمدى اتقاراتىن ادامدار مەن ولاردىڭ جۇبايلارى (زايىپتارى);

- مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن جانە ولارعا تەڭەستىرىلگەن ادامدار، سونداي-اق ولاردىڭ جۇبايلارى (زايىپتارى);

- «قازاقستان رەسپۋبليكاسىنداعى سايلاۋ تۋرالى قازاقستان رەسپۋبليكاسىنىڭ كونستيتۋتسيالىق زاڭىنا جانە «سىبايلاس جەمقورلىققا قارسى ءىس-قيمىل تۋرالى»، «قازاقستان رەسپۋبليكاسىنداعى بانكتەر جانە بانك قىزمەتى تۋرالى»، «ساقتاندىرۋ قىزمەتى تۋرالى»، «باعالى قاعازدار رىنوگى تۋرالى» قازاقستان رەسپۋبليكاسىنىڭ زاڭىنا سايكەس تابىس ەتۋ مىندەتى جۇكتەلگەن ادامدار دەكلاراتسيا تاپسىرۋعا مىندەتتى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز