بەلارۋس رەسپۋبليكاسىنىڭ پرەزيدەنتى الەكساندر لۋكاشەنكومەن كەزدەسۋدە ەرلان قوشانوۆ قازاقستان پرەزيدەنتى قاسىم-جومارت توقاەۆتىڭ زور ىقىلاسى مەن ىزگى تىلەگىن جەتكىزىپ, حالىقتارىمىزدىڭ اراسىنداعى تەرەڭ تاريحي بايلانىستى اتاپ ءوتتى. ءماجىلىس سپيكەرى ەكى ەل پرەزيدەنتتەرىنىڭ سەنىمدى ساياسي قارىم-قاتىناسىنىڭ ارقاسىندا بۇگىندە قازاقستان – بەلارۋس بايلانىسى ستراتەگيالىق ارىپتەستىك دەڭگەيىنە كوتەرىلگەنىنە ەرەكشە توقتالدى. ساۋدا-ەكونوميكا, ءوندىرىس, اۋىل شارۋاشىلىعى, كولىك جانە باسقا دا سالالارداعى ىنتىماقتاستىقتىڭ جوعارى قارقىنى – سونىڭ ناقتى ناتيجەسى.
ەرلان قوشانوۆ بەلارۋس باسشىسىنا پرەزيدەنت باستاماسىمەن ەلىمىزدە جۇرگىزىلىپ جاتقان اۋقىمدى ساياسي وزگەرىس تۋرالى ايتتى. ەلىمىزدە مەملەكەتتىڭ قوعامدىق-ساياسي جانە قۇقىقتىق ارحيتەكتۋراسىن تۇبەگەيلى جاڭعىرتاتىن جاڭا كونستيتۋتسيانىڭ جوباسى كەڭىنەن تالقىلانىپ جاتىر. اتا زاڭنىڭ جاڭا جوباسى بويىنشا تۇپكىلىكتى شەشىمدى بۇكىلحالىقتىق رەفەرەندۋمدا ەل ازاماتتارى قابىلدايدى.
الەكساندر لۋكاشەنكو پرەزيدەنت قاسىم-جومارت توقاەۆقا جىلى لەبىزىن جولدادى. ول قازىرگى كۇردەلى كەزەڭدە ەكى ەل اراسىنداعى ىنتىماقتاستىقتى نىعايتۋداعى پارلامەنتاريلەردىڭ ءرولىن ەرەكشە اتاپ ءوتتى. بۇل ورايدا بەلارۋس پەن قازاقستاننىڭ كوپپوليارلىلىق پەن ەگەمەندى مەملەكەتتەردىڭ دامۋىن قولدايتىنىن, حالىقارالىق كۇن تارتىبىندە ورتاق ۇستانىمعا يە ەكەنىن جەتكىزدى. سونداي-اق شانحاي ىنتىماقتاستىعى ۇيىمىنا كىرۋ كەزىندە بەلارۋستى قولداعانى ءۇشىن قازاقستانعا العىسىن ءبىلدىردى.
بەلارۋس باسشىسى قازاقستانمەن اراداعى قازىردىڭ وزىندە 1 ملرد دوللاردان اسقان تاۋار اينالىمىنىڭ جوعارى ءوسۋ قارقىنىنا وڭ باعا بەرىپ, ماشينا جاساۋ مەن اۋىل شارۋاشىلىعىنداعى كووپەراتسيانى كەڭەيتۋگە شاقىردى.
ۇلتتىق جينالىستىڭ وكىلدەر پالاتاسىنىڭ باسشىسى يگور سەرگەەنكومەن كەزدەسۋدە پارلامەنتارالىق ديالوگتەن باستاپ ەكى ەل اراسىنداعى ەكونوميكالىق, مادەني ىنتىماقتاستىققا دەيىنگى كەڭ اۋقىمداعى ماسەلەلەر ءسوز بولدى.
«قازاقستان مەن بەلارۋس – سەنىمدى ستراتەگيالىق سەرىكتەس. مەملەكەتتەر باسشىلارى مۇنى ۇنەمى ايتىپ كەلەدى. ەكى ەل اراسىندا جەمىستى ساياسي ديالوگ جولعا قويىلعان. ونەركاسىپتە, ماشينا جاساۋدا جانە اگرارلىق سالادا كووپەراتسيالىق بايلانىس كەڭەيىپ جاتىر. ەكى مەملەكەتتىڭ پارلامەنتتەرى دە ءوزارا قارىم-قاتىناستىڭ قارقىندى دامۋىنا زور ۇلەس قوسىپ وتىر. زاڭ شىعارۋ ىسىندە تۇراقتى تاجىريبە الماسۋ جولعا قويىلىپ, دوستىق توپتارى بەلسەندى ءارى ناتيجەلى جۇمىس ىستەپ جاتىر, دەپۋتاتتارىمىزدىڭ اراسىندا بەكەم بايلانىس ورناعان», دەدى ءماجىلىس سپيكەرى.
ءوز كەزەگىندە يگور سەرگەەنكو قازاقستان بەلارۋس ەلى ءۇشىن ءاردايىم ۋاقىت سىنىنان وتكەن دوس, ستراتەگيالىق سەرىكتەس ءارى وداقتاس بولىپ قالا بەرەتىنىن ايتتى. ول استانا سياقتى مينسك دە سىندارلى, بىرىكتىرەتىن كۇن ءتارتىبىن حالىقارالىق الاڭداردا ىلگەرىلەتۋگە باسىمدىق بەرەتىنىنە ءمان بەردى.
وكىلدەر پالاتاسىنىڭ توراعاسى قازاقستاندا جۇرگىزىلىپ جاتقان رەفورمالار باعىتىن جوعارى باعالادى. قازاقستاننىڭ ءتۇرلى سالاداعى زاڭ شىعارۋ جۇمىسىنداعى تاجىريبەسىن بەلارۋس دەپۋتاتتارى جان-جاقتى زەردەلەپ وتىرعانىن تىلگە تيەك ەتتى.
سپيكەرلەر تسيفرلاندىرۋ سالاسىنداعى پارلامەنتتەردىڭ قىزمەتىنە دە ەرەكشە نازار اۋداردى. ءماجىلىس توراعاسى مەملەكەت باسشىسىنىڭ ءۇش جىل ىشىندە قازاقستاندى تسيفرلىق مەملەكەتكە اينالدىرۋ مىندەتىن العا قويعانىنا توقتالدى. وسى رەتتە دەپۋتاتتار ازىرلەگەن تسيفرلىق كودەكس پەن جاساندى ينتەللەكت تۋرالى زاڭ كۇشىنە ەندى. استانادا حالىقارالىق جي ورتالىعى, «Astana Hub» تەحنوپاركى قارقىندى جۇمىس ىستەپ تۇر, سونداي-اق ورتالىق ازياداعى ەڭ قۋاتتى سۋپەركومپيۋتەر ىسكە قوسىلدى.
كەزدەسۋ قورىتىندىسىندا دەپۋتاتتار زاڭنامالىق جۇمىس بويىنشا ءوزارا تاجىريبە الماسۋدى جالعاستىرۋعا, پارلامەنتارالىق ۇيىمدار اياسىندا, سونىمەن قاتار دوستىق توپتارى, سالالىق كوميتەتتەر مەن پارلامەنتتەر اپپاراتتارى جەلىسى اياسىندا ىقپالداستىقتى نىعايتۋعا ۋاعدالاستى.
ەرلان قوشانوۆ ەكى ەلدىڭ زاڭ شىعارۋشى ورگاندارى اراسىنداعى ارىپتەستىكتى دامىتۋ ماسەلەلەرىن رەسپۋبليكا كەڭەسىنىڭ توراعاسى ناتاليا كوچانوۆامەن دە تالقىلادى.
ء«بىزدىڭ پارلامەنتارالىق قارىم-قاتىناسىمىز قارقىندى دامىپ كەلەدى. جەكە بايلانىستىڭ ارقاسىندا ءوزارا سەنىم مەن قۇرمەت نىعايۋدا. پارلامەنتارالىق ۇيىمدار شەڭبەرىندە دە تىعىز بايلانىستامىز. ءبىر-ءبىرىمىزدىڭ باستامالارىمىزعا قولداۋ بىلدىرۋدە دە جاقسى تاجىريبە بار. ءبىز پارلامەنتارالىق وداق, تمد پارلامەنتارالىق اسسامبلەياسى, ۇقشۇ جانە ەقىۇ پارلامەنتتىك اسسامبلەيالارى اياسىنداعى ءوزارا ءداستۇرلى ىقپالداستىقتى ودان ءارى كەڭەيتۋگە نيەتتىمىز», دەدى ءماجىلىس توراعاسى.
ەكى ەل اراسىنداعى مادەنيەت پەن ءبىلىم سالالارى بويىنشا پارلامەنتتىك قولداۋدى كەڭەيتۋ, جاستارعا ارنالعان بىرلەسكەن جوبالاردى ىسكە اسىرۋ, تۋريزم مەن يننوۆاتسيا باعىتىندا ونەركاسىپتىك كووپەراتسيانى دامىتۋ سىندى ەكىجاقتى ىنتىماقتاستىقتى كۇشەيتۋ ماسەلەلەرى قامتىلعان مازمۇندى اڭگىمە ءوربىدى.
ۇلتتىق جينالىستىڭ وكىلدەر پالاتاسى مەن رەسپۋبليكا كەڭەسىندە وتكەن كەزدەسۋلەردە ەرلان قوشانوۆ بەلارۋس دەپۋتاتتارىنا ەلىمىزدە جۇرگىزىلىپ جاتقان كونستيتۋتسيالىق رەفورما تۋرالى ايتىپ بەردى. ول جاڭا كونستيتۋتسيانىڭ جوباسى قازاقستان پارلامەنتىنىڭ قۇزىرەتىن ەداۋىر كۇشەيتەتىنىن, قوعامنىڭ ساياساتقا ارالاسۋىن كەڭەيتەتىنىن جانە «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسىن نىعايتاتىنىن ەرەكشە اتاپ ءوتتى.
ساپار اياسىندا ءماجىلىس دەپۋتاتتارى مينسكىدەگى جەڭىس مونۋمەنتىنە گۇل شوعىن قويدى. «بەلاز» زاۋىتىنا جانە «حاتىن» مەملەكەتتىك مەموريالدىق كەشەنىنە بارىپ, ەكىنشى دۇنيەجۇزىلىك سوعىس قۇرباندارىن ەسكە الدى.
