ساياسات • 14 قاڭتار، 2021

جەمقورلار سانى ازايىپ كەلەدى

7 رەت كورسەتىلدى

قورعانىس ۆەدومستۆوسىندا كوميسسيا توراعاسى، قورعانىس ءمينيسترىنىڭ ورىنباسارى گەنەرال-لەيتەنانت تيمۋر داندىباەۆتىڭ باسشىلىعىمەن قارۋلى كۇشتەر­دەگى سىبايلاس جەمقورلىققا قارسى ءىس-قيمىل جونىندەگى كوميسسيا قىزمەتىنىڭ قورى­تىندىسى شىعارىلىپ، الداعى جىلعا ارنالعان جوسپار بەكىتىلدى. وتىرىس بەينە­كونفەرەنتسيا رەجىمىندە ءوتتى.

ءمينيستردىڭ ورىنباسارى قارۋلى كۇشتەردىڭ باس­شىلىعى سىبايلاس جەمقور­لىقتىڭ الدىن الۋعا جانە اسكەري ورتادا سىبايلاس جەم­قورلىققا قاتىستى قۇ­قىق بۇزۋشىلىقتاردى ەر­تە انىقتاۋعا كوپ كوڭىل بو­لە­تىنىن جەتكىزدى. بۇگىندە بۇ­عان دەيىن قابىلدانعان شارا­لار وڭ ناتيجەسىن بەرىپ، كەيىنگى 2-3 جىلدا بيۋدجەت قارا­جاتىنان ميلليونداعان تەڭ­گە جىمقىرۋ سياقتى جەم­قور­لىق قىلمىستارىنا جول بە­رىل­گەن جوق.

ناتيجەسىندە، بىلتىرعى جىلدى 2019 جىلمەن سالىس­تىرعاندا قارۋلى كۇشتەردە سى­بايلاس جەمقورلىق قىل­مىستارىنىڭ دەڭ­گەيى تومەندەدى. سونداي-اق وسىنداي قىل­مىس­تارى ءۇشىن سوت­تالعاندار سانى 39%-عا كەمى­دى.

قارۋلى كۇشتەردە سىبايلاس جەمقور­لىقتىڭ الدىن الۋ ماقساتىندا كوميسسيا 350-دەن استام تەكسەرۋ ۇيىمداستىرىپ، 8000-عا جۋىق ءىس-شارا وتكىزدى. اسكەري بولىم­­دەردىڭ قول­باسشىلىعىنا سىبايلاس جەمقورلىقپەن قۇقىق بۇزۋ­شىلىق جاساۋ­دىڭ العى­شارتتارىن جويۋ تۋرالى 53 ۇسىنىس، 36 اقپاراتتىق حات ەنگىزىلدى. بۇل رەتتە 124 لاۋازىمدى تۇلعانىڭ تار­تىپ­تىك جاۋاپ­كەرشىلىككە تار­تىلعانىن دا ايتا كەتۋ قاجەت.

كوميسسيا اسكەري قىز­مەتكە شاقىرۋ، مەملەكەتتىك قىزمەتتەر كورسەتۋ، مەم­لەكەتتىك ساتىپ الۋدى جۇ­­زەگە اسىرۋ، جەكە قۇ­رام­دى تاماقتاندىرۋدى ۇيىمداستىرۋدى باقىلاۋ، كۇردەلى قۇرىلىس جۇرگىزۋ، تۇر­عىن ءۇيدى ءبولۋ سالالارىندا سىبايلاس جەمقور­لىق تاۋەكەلدەرىن جويۋ بويىنشا 100-دەن استام ۇسىنىس ازىرلەدى.

بۇدان بولەك، كوميسسيا دەسانتتىق-شابۋىلداۋ اسكەرلەرى قولباسشىسىنىڭ باسقارماسىندا جانە اسكەر­لەردى ورنالاستىرۋ باس باس­قارماسىندا سىبايلاس جەم­قورلىق تاۋەكەلدەرىنە ىش­كى تالداۋلار جۇرگىزدى. سو­نىڭ ناتيجەسى بويىنشا، اسكەري باسقارۋ ورگان­دارىنا باعى­نىستى بولىمشەلەردە جەم­قورلىق جاساۋعا ىقپال ەتەتىن سەبەپتەر مەن جاع­داي­لاردى جويۋ جونىندە 44 ۇسىنىم ازىرلەدى. كو­ميس­سيانىڭ ۇسىنىمى بو­يىنشا اسكەري پوليتسيا باس باسقارماسىنىڭ قۇ­رى­لىمىندا سىبايلاس­ جەم­قورلىققا قارسى ءىس-قي­مىل جونىندەگى ىشكى قا­ۋىپ­سىزدىك مىن­دەتتەرى بار باس­قارما جۇ­مىسى قالپىنا كەلتىرىلدى.

سىبايلاس جەمقورلىققا قار­سى ءىس-قيمىل اگەنتتىگىمەن ىنتىماقتاستىق تۋرالى مەموراندۋم شەڭبەرىندە كوميسسيا جەرگىلىكتى اسكەري باسقارۋ ورگاندارىنىڭ قىز­مەتىندەگى سىبايلاس جەم­قورلىق تاۋەكەلدەرىنە سىرت­قى تالداۋ جۇرگىزۋگە باس­تاما جاسادى. مەم­لەكەت­تىك قىزمەتتەردى كورسەتۋ ۇدەرىس­تەرىن وڭ­تايلاندىرۋ جانە اۆتوماتتاندىرۋ بو­يىن­شا 7 جول كارتا­سى ىسكە اسىرىلۋدا. قىز­­مەت كور­سەتۋ مەرزىمى 15 جۇمىس كۇن­نەن 5 جۇمىس كۇنگە دەيىن قىسقارتىلدى جانە ازا­ماتتار ۇسىناتىن قۇجاتتار پاكەتى ازايتىل­دى. جەر­گىلىكتى اسكەري باسقارۋ ورگاندارىندا «قارۋلى كۇشتەر – ادالدىق الاڭى» اتتى 38­ جوبالىق كەڭسە اشىلدى.­ اتال­عان كەڭسە­لەرگە كەز كەل­­گەن ازامات شتاتتان تىس جاع­داي تۋىنداعان جاعدايدا كو­مەك الۋ ءۇشىن جۇگىنە الادى.

سىبايلاس جەمقورلىققا «مۇلدە توزبەۋ» احۋالىن قا­لىپتاستىرۋ ماقساتىندا اسكەري قىزمەتشىلەردىڭ بارلىق ساناتتارى ءۇشىن وقۋ مودۋلدەرى مەن احۋالدىق كەيستەر ازىر­لەنىپ، ەنگىزىلدى. اسكەري بولىمدەردە وفيتسەر­­لەر جينالىستارىنىڭ جۇ­مىسى قالپىنا كەل­تىرىلدى. ون­دا وفيتسەرلەر اراسىندا ەتيكالىق مىنەز-ق ۇلىق نور­ما­لارىن بۇزۋ فاكتىلەرى قاراس­تىرىلىپ، ولاردىڭ زاڭ­سىز ارەكەتتەرىنە باعا بەرىلەدى. اسكەري قىزمەت­شىلەردىڭ قىزمەتتەگى جانە تۇرمىستاعى لايىقسىز مى­نەز-قۇلقىنا قوعامدىق ىق­پال ەتۋ ماسەلەسى قاراستى­رىلادى.

قارۋلى كۇشتەردە سىبايلاس جەمقور­لىقتىڭ الدىن الۋ ماقساتىنداعى جۇمىستار الداعى ۋاقىتتا دا جالعاسا بەرمەك. وسىعان بايلانىستى، كوميسسيانىڭ بيىلعى جۇمىس جوسپارىنا 37 ءىس-شارا ەنگىزىلدى. «اسكەري قىزمەت جانە اس­كەري قىزمەتشىلەردىڭ مار­تە­بەسى تۋرالى» زاڭعا بىر­قاتار تولىقتىرۋ ەنگى­زۋ جوس­پار­لانعان.

قورعانىس ۆەدومستۆو­سىندا سىبايلاس جەمقور­لىققا قارسى كوميسسيانىڭ ەرەكشە مارتەبەسى بەرىل­گەنىن ەسكە سالۋ قاجەت. ەن­دى ول كەشەندى تالداۋ جۇمى­سىمەن، سونىمەن قاتار سىبايلاس جەم­قورلىق كورىنىستەرىن بولدىرمايتىن قىزمەتتى ۇيىمداستىرۋدىڭ جاڭا نىساندارىن ەنگىزۋمەن اي­نالىسپاق. وسىعان ۇقساس كوميسسيالار گارنيزونداردا دا جۇمىس ىستەيدى. وعان قۇقىق قورعاۋ جانە ارنايى ورگاندار قىزمەتكەرلەرى، سونداي-اق قوعام وكىلدەرى  قاتىسا الادى.

 

سوڭعى جاڭالىقتار

«بارىس» ۇتىلىپ قالدى

سپورت • 06 ناۋرىز، 2021

ەلدوس سمەتوۆ كۇمىس الدى

سپورت • 06 ناۋرىز، 2021

«قايرات» – قولا جۇلدەگەر

ايماقتار • 06 ناۋرىز، 2021

ۇقساس جاڭالىقتار