ۋكراينا پرەزيدەنتى ۆيكتور يانۋكوۆيچ وزدەرىندە ساقتالىپ قالعان بايىتىلعان قارۋلىق ۋراندى 2012 جىلعا دەيىن جويۋ جونىندە شەشىمگە كەلگەنىن حابارلادى.
مۇنى جۇرتشىلىق ۆاشينگتوندا وتكەن يادرولىق قاۋىپسىزدىك جونىندەگى ءسامميتتىڭ شەشىمىنە جەدەل ۇنقوسۋ دەپ قابىلدادى. بۇل ەلدە ءالى كۇنگە ساقتالىپ قالعان 90 كيلوگرامم بايىتىلعان ۋران بار ەكەن. ودان بىرنەشە اتومدىق وقتۇمسىق جاساۋعا مۇمكىندىك بار كورىنەدى.
لاڭكەستەردى ايىپتادى
ساۋد ارابياسىندا شاريعات تالاپتارىن ساراپتايتىن ءدىنباسىلار – جوعارعى ۇلەمدەر كەڭەسى ءوزىنىڭ ءۇش كۇنگە سوزىلعان جابىق ماجىلىسىندە لاڭكەستىككە ناقتى انىقتاما بەرىپ, مۇنداي ارەكەتتەر ءجونسىز دەپ تاۋىپ, ءدىني تۇرعىدان قاراعاندا ونى قارجىلاندىرۋعا تىيىم سالىناتىنىن جاريالادى. بۇل ەندى شىن مانىندە كەيبىر يسلام اتىن جامىلعان لاڭكەستىك ۇيىمدارعا ايتارلىقتاي سوققى بولماق. جوعارعى ۇلەمدەر كەڭەسى ءوز شەشىمدەرىنىڭ تەك ساۋد ارابياسى عانا ەمەس, باسقا ەلدەردە دە كۇشى بارلىعىن مالىمدەدى.
كۇتپەگەن جەڭىمپاز
ۇلىبريتانيادا پارلامەنت سايلاۋىنىڭ ناۋقانى جاڭاشا ءوتىپ جاتىر. سايلاۋعا تۇسكەن جەتەكشى پارتيالاردىڭ كوسەمدەرى العاش رەت تەلەپىكىر سايىسىنا ءتۇسىپ, ءوز باعدارلامالارىن قورعادى. بۇل جولى ءداستۇرلى بيلىك ءۇشىن كۇرەسەتىن ەكى پارتيا – لەيبوريستەر مەن كونسەرۆاتورلارعا قوسا, تەلەسايىسقا ليبەرال-دەموكراتتار كوسەمى نيك كلەگگ تە جىبەرىلگەن ەدى. كورەرمەندەردىڭ باعاسى بويىنشا سول كلەگگ جەڭىسكە جەتىپ, جۇرتتى تاڭداندىردى. كونسەرۆاتور دەۆيد كەمەرون ەكىنشى بولسا, بيلىكتەگى لەيبوريستەر پارتياسىنىڭ كوسەمى گوردون براۋن ءبارىنىڭ سوڭىندا قالدى.
باكيەۆتى شاقىرادى
ادەتتەگىشە بەلورۋسسيا پرەزيدەنتى الەكساندر لۋكاشەنكو توسىن مالىمدەمە جاسادى: ءوز ەلى بيلىكتەن قۋىلعان قىرعىزستان پرەزيدەنتى قۇرمانبەك باكيەۆتى قابىلداۋعا ءازىر دەدى. كۇنى كەشە باكيەۆ قايدا بارارىن بىلمەي تۇرعان كەزدە مۇنى نەگە ايتپاعان دەيسىڭ-اۋ. قازاقستان كورشى ەلدە قانتوگىسكە جول بەرمەۋ ءۇشىن بيلىكتەن ايىرىلعان باكيەۆتى ۋاقىتشا تارازعا اكەلگەنى بەلگىلى. قازىر ول قازاقستاندى تاستاپ شىققانى دا ءمالىم.
كەپىلدىككە ۇستاعان
تايلاندتا قىزىل جەيدەلىلەر دەپ اتالاتىن وپپوزيتسيونەرلەردىڭ قارسىلىق اكتسياسىنىڭ باستالعانىنا, مىنە, ايدان استى. ولار ۇكىمەتپەن كەلىسسوزگە وتىرسا دا, ءوز رايلارىنان قايتار ەمەس. پارلامەنتتى تاراتۋدى تالاپ ەتەدى, دەمەك, قازىرگى ۇكىمەت تە كەتۋگە ءتيىس. ولار جاڭا ارەكەتتەرگە كوشىپتى – جۇما كۇنى پوليتسيانىڭ جوعارى شەندى ەكى وفيتسەرىن كەپىلدىككە الىپتى. سونداعى ايتاتىندارى – وپپوزيتسيونەرلەردىڭ قاۋىپسىزدىگىن قامتاماسىز ەتۋ. ەندى بۇل – وركەنيەتتى تالاپقا كەلمەيتىن, زاڭعا مۇلدە سىيىسپايتىن, لاڭكەستەر پايدالاناتىن جول.
كۇندى كولەگەيلەگەن كۇل
يسلانديادا اسا قۋاتتى جانارتاۋ اتقىلاۋىنان ۇلىبريتانيانىڭ اۋە كەڭىستىگىنە ۇشقان كۇل بۇلتى اسپانعا جايىلىپ, اۆياتسيانىڭ ۇشۋىنا كەدەرگى جاسادى. بالقىعان ماگما مۇزعا جايىلعاندا, سودان پايدا بولعان بۋمەن قوسا اسپانعا قالىڭ كۇل بۇلتى كوتەرىلگەن. كۇل-بۇلت ايتارلىقتاي بيىككە كوتەرىلگەندىكتەن, ول ادامنىڭ تىنىس الۋىنا ونشالىقتى قيىندىق كەلتىرمەگەنمەن, سول بيىكتىكتە ۇشاقتاردىڭ ۇشۋىنا قاۋىپتى ەكەن. قازىر بۇكىل ەۋروپا اۋە كومپانيالارى دەرلىك ۇشاقتارىن ۇشىرا الماي, ميللياردتاعى ەۋرو زيان شەكسە, جولاۋشىلار جولدان قالىپ وتىر.
جەر استىمەن كىرمەك
ەگيپەتتىڭ قورعانىس كۇشتەرى ءوز ەلى مەن پالەستينا اۆتونومياسىنىڭ گازا سەكتورىنىڭ اراسىندا كونتراباندالىق ماقساتتا جاسالعان 10 توننەل بارلىعىن انىقتاپتى. مۇنداي توننەلدەردىڭ بارلىعى بۇرىندارى دا ايتىلاتىن. ءتىپتى وعان جول بەرمەس ءۇشىن شەكارا بويىنا جەر استىنا تەرەڭدەتىپ كەدەرگى دە قويماق بولعان. سويتسە دە توننەل قالاي دا مىسىردىڭ ءبىر جەرىنەن شىعادى عوي. سونى انىقتاۋدىڭ قيىن بولعانىنا تاڭداناسىڭ. شەكاراشىلارى تىم قامسىز بولعان-اۋ دەگەن وي كەلەدى.
زىلزالانىڭ قۇرباندارى
وتكەن سارسەنبىدە قىتايدىڭ سولتۇستىك باتىسىندا تىركەلگەن ءزىلزالانىڭ سالدارى اۋىر بولىپ وتىر. قازا تاپقانداردىڭ سانى 1079 ادامعا جەتتى, جوعالعاندار 300-دەي, جاراقات العاندار 11,5 مىڭداي بولسا, ولاردىڭ 1180-ءىنىڭ جاعدايى اسا قيىن ەكەن. قيراعان ۇيلەردىڭ استىنان ءالى دە ءتىرى قالعان ادامدار تابىلىپ جاتقان كورىنەدى. ال قۇتقارۋ جۇمىسىنا 7 مىڭنان اسا ادام جۇمىلدىرىلىپتى.
ازىرلەگەن ماماديار جاقىپ.
