پىكىر • 12 قاڭتار، 2021

تمد ميسسياسى: اشىق ءارى ءادىل ءوتتى

پارلامەنت ءماجىلىسى مەن جەرگىلىكتى ءماسليحاتتار دەپۋتاتتارىن سايلاۋ بارىسىن بايقاۋعا كەلگەن تاۋەلسىز مەملەكەتتەر دوستاستىعى بايقاۋشىلارى ميسسياسىنىڭ قورىتىندى ءباسپاسوز ءماسليحاتى ءوتتى. وندا سايلاۋ ناۋقانىنا جۇرگىزىلگەن حالىقارالىق مونيتورينگتىڭ قورىتىندىلارى شىعارىلدى.

راۋان قابيدولدين

باق وكىلدەرىمەن كەزدەسۋدە ميسسيا توراعاسى، رەسەي فەدەراتسياسىنىڭ قورعانىس جانە قاۋىپسىزدىك جونىندەگى فەدەرالدى جينالىسى فەدەراتسيا كەڭەسى كوميتەتىنىڭ توراعاسى ۆيكتور بوندارەۆ تمد-دان كەلگەن بايقاۋشىلاردىڭ قۇرامى مەن جۇمىسى تۋرالى باياندادى. ونىڭ ايتۋىنشا، قازاقستانداعى سايلاۋعا تمد ەلدەرىنىڭ پارلامەنتتەرى مەن ورتالىق سايلاۋ كوميسسيالارىنىڭ، ديپلوماتيالىق كورپۋستىڭ، حالىقارالىق ۇيىمداردىڭ وكىلدەرى، ياعني بارلىعى 234 بايقاۋشى اككرەديتتەلىپتى.

– ءبىز ءوز قىزمەتىمىزدى قازاقستاننىڭ زاڭناماسىن، تاۋەلسىز مەملەكەتتەر دوستاستىعىنىڭ قۇجاتتارىن باسشىلىققا الا وتىرىپ، سايلاۋ پروتسەسىنە ارالاسپاۋ جانە مەملەكەتتىڭ ەگەمەندىگىن قۇرمەتتەۋ قاعيداتتارىن باسشىلىققا الا وتىرىپ، ەركىن جانە تاۋەلسىز ورىندادىق، – دەدى ۆ.بوندارەۆ.

ۆ.بوندارەۆ قازاقستان ورتالىق سايلاۋ كوميسسياسىنىڭ سايلاۋعا دايىندىعى مەن ونى وتكىزۋدەگى قىزمەتىن جوعارى باعالادى. سونداي-اق ميسسيا توراعاسى سايلاۋ كوميسسيالارىنىڭ مۇشەلەرىن وقىتۋ، سايلاۋشىلار تىزىمىمەن جۇمىس جۇرگىزۋ، ءادىل ءارى اشىق ۇگىت-ناسيحات جۇرگىزۋ، پاندەميا جاعدايىندا داۋىس بەرۋدى ۇيىمداستىرۋ سياقتى ماڭىزدى ماسەلەلەردى ايرىقشا اتاپ ءوتتى.

– تمد باقىلاۋشىلارى سايلاۋ ناتيجەلەرىنە اسەر ەتۋى مۇمكىن زاڭبۇزۋشىلىقتاردى تىركەگەن جوق. ميسسيا پارلامەنت ءماجىلىسى مەن جەرگىلىكتى ءماسليحات دەپۋتاتتارىن سايلاۋ اشىق، ءادىل، باسەكەگە قابىلەتتى جانە دەموكراتيالىق سايلاۋدىڭ جالپىعا بىردەي قابىلدانعان قاعيداتتارىنا سايكەس ءوتتى دەگەن قورىتىندىعا كەلدى، – دەدى ميسسيا توراعاسى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز