– وتانداستارىمىز, حالقىمىز بۇگىنگى سايلاۋعا كەلىپ, جۇرەك قالاۋىمەن ءوز داۋىستارىن بەرىپ جاتىر. سول داۋىستاردان ءبىزدىڭ پارتيامىز دا ءۇمىتتى. كوپ جۇمىس اتقاردىق. سايلاۋالدى ۇگىت-ناسيحات جۇمىستارىنىڭ اياسىندا ءتۇرلى شارالاردى قولعا الدىق. جوسپارلاعان دۇنيەمىزدىڭ بارلىعىن ىسكە اسىردىق دەپ ويلايمىن. مەن ءوزىم بۇعان دەيىن دە كوپتەگەن سايلاۋعا قاتىستىم. الايدا بۇل سايلاۋدىڭ ورنى بولەك. ويتكەنى پارتيالار اراسىندا شىنايى تارتىس ءجۇردى. ەلىمىزدەگى بارلىق ساياسي پارتيالارعا تەڭ مۇمكىندىك بەرىلدى. ءاربىر پارتيا ءوز مۇمكىندىگىن بارىنشا كورسەتىپ, سايلاۋشىلاردىڭ داۋىسىن جيناۋ ءۇشىن ەلدى ارالاپ, ۇگىت-ناسيحات جۇمىستارىن جۇرگىزدى, – دەدى ءا.بەكتاەۆ.
ونىڭ ايتۋىنشا, وسى جىلعى سايلاۋ ەرەكشە جاعدايدا ءوتىپ جاتىر. پاندەمياعا بايلانىستى ۇگىت-ناسيحات جۇمىستارى دا سانيتارلىق تالاپتارعا ساي ۇيىمداستىرىلىپتى. وتانداستارىمىزعا ءتۇسىندىرۋ جۇمىستارى دا جان-جاقتى جۇرگىزىلگەن كورىنەدى.
– ەندى ەل ازاماتتارى دا ءوز بولاشاعى ءۇشىن دۇرىس تاڭداۋ جاساۋى قاجەت. ۇگىت-ناسيحات جۇمىستارى تولىق زاڭ اياسىندا جۇرگىزىلدى. ورتالىق سايلاۋ كوميسسياسىندا, مەملەكەتتىك قۇزىرلى ورگانداردا جانە بۇقارالىق اقپارات قۇرالدارىندا بارلىق پارتيالار ءۇشىن ورتاق مۇمكىندىك بەرىلدى. ارينە الەمدى ابىگەرگە سالعان پاندەميانىڭ ۇگىت-ناسيحات جۇمىستارىنا دا كەدەرگى كەلتىرگەنىن ءبارىمىز بىلەمىز. سوندىقتان ۇگىت-ناسيحات ناۋقانى كەزىندە سانيتارلىق تالاپتاردى بارىنشا قاتاڭ ساقتاۋعا تۋرا كەلدى. اسىرەسە سايلاۋشىلارمەن كەزدەسۋ كەزىندە ساق بولۋعا تىرىستىق. ەڭ ماڭىزدىسى سول, ەلىمىزدىڭ ءاربىر ازاماتى ءوزىنىڭ كونستيتۋتسيالىق قۇقىعىن دۇرىس ءارى ەركىن پايدالانا بىلگەنى ءجون, – دەدى پارتيا توراعاسى.
