قىرعىز رەسپۋبليكاسىنىڭ پرەزيدەنتى بولىپ جاسى 35-تەن تومەن ەمەس, 70-تەن جوعارى ەمەس, رەسپۋبليكادا جالپى 15 جىلدان كەم ەمەس ۋاقىت تۇرعان, مەملەكەتتىك ءتىلدى بىلەتىن ازامات سايلانا الادى.
ورتالىق سايلاۋ كوميسسياسىنىڭ ءتورايىمى نۇرجان شايلدابەكوۆانىڭ وسى مەكەمەنىڭ ءباسپاسوز ورتالىعىندا كەشكى ساعات 20:40-تا جاريالاعان اقپاراتىنا قاراعاندا, رەسپۋبليكاداعى سايلاۋ ۋچاسكەلەرىنىڭ 87 پايىزىنان ەلەكتروندى ەسەپتەۋ ارقىلى الىنعان مالىمەتتەرگە سايكەس, 1 230 627 ادام, ياعني سايلاۋعا قۇقىعى بار ازاماتتاردىڭ 34,33 پايىزى داۋىس بەرۋگە قاتىسقان. ولاردىڭ 79 پايىزدان استامى پرەزيدەنتتىك قىزمەتكە سادىر جاپاروۆتىڭ كانديداتتىعىن جاقتاپ داۋىس بەرگەن. بۇل 1 ميلليونعا جاقىن سايلاۋشى. ەكىنشى ورىندى 6 پايىزدان ارتىق داۋىسپەن اداحان مادۋماروۆ, ءۇشىنشى ورىندى 2 پايىزدان اسا داۋىسپەن وزبەك حالقىنىڭ وكىلى, ىسكەر بابىرجان تولباەۆ يەلەنگەن. باسقا تالاپكەرلەر ەكى پايىزعا جەتەر-جەتپەس جانە ءبىر پايىزدىڭ ارعى-بەرگى توڭىرەگىندە داۋىس العان. ايەلدەر اراسىنان جالعىز كانديدات كلارا سوورونكۋلوۆا 11 263 سايلاۋشىنىڭ, بىلايشا ايتقاندا ءبىر پايىزعا جاقىن داۋىس الدى.
ايتا كەتەيىك, ەلدىڭ سايلاۋعا تيەسىلى زاڭنامالارىندا پرەزيدەنتتىك سايلاۋدا داۋىس بەرۋشىلەردىڭ شەگى بەلگىلەنگەن ەمەس. ال ەندى رەفەرەندۋمداردى وتكەرۋ بويىنشا زاڭدا سايلاۋ قۇقىعى بار ازاماتتاردىڭ 30 پايىزى ءوز داۋىستارىن بەرسە, رەفەرەندۋم ناتيجەسى ەسەپكە الىنادى. جوعارىدا مالىمدەلگەندەي, سايلاۋشىلاردىڭ قاتىسۋى بەلگىلەنگەن شەكتەن استى. داۋىستارىن بەرگەن سايلاۋشىلاردىڭ 80 پايىزدان استامى باسقارۋدىڭ پرەزيدەنتتىك جۇيەسىن تاڭداعان.
نازاربەك بايجىگىتوۆ,
قىرعىز رەسپۋبليكاسىنىڭ جالپىۇلتتىق «قىرعىز تۋى» گازەتىنىڭ قىزمەتكەرى,
ارنايى «Egemen Qazaqstan» ءۇشىن
