پارلامەنت ءماجىلىسى مەن ءماسليحاتتارىنىڭ سايلاۋىنا كەلگەن مەملەكەتتىك حاتشى كەزەكتى ساياسي ناۋقان ەلىمىزدىڭ تاۋەلسىزدىك ىرگەتاسىن بەكىتۋگە باعىتتالعان جۇمىس ەكەنىن جەتكىزدى.
– بۇگىن – ايرىقشا, ماڭىزدى ساياسي ناۋقان. ويتكەنى ءبىزدىڭ ەڭ اسىل مۇراتىمىز – ەل تاۋەلسىزدىگىن نىعايتۋ جولىندا جانە وسكەلەڭ ۇرپاقتىڭ الدىندا جاۋاپكەرشىلىگىمىز بار. حالقىمىز وسىنى جادىندا ۇستاي ءجۇرىپ ءاردايىم ءوزىنىڭ پاراساتتىلىعى مەن بىرلىگىن كورسەتىپ كەلەدى. سول جاۋاپكەرشىلىكتىڭ بيىگىندە بولامىز.
قازىر الەمدە ورىن الىپ وتىرعان جاعدايدى وزدەرىڭىز بىلەسىزدەر, قوعامدى جىك-جىككە ءبولىپ, الەۋمەتتىك كيكىلجىڭگە جەتكىزىپ جاتىر. مەن قازاقستاننىڭ ازاماتى رەتىندە بۇل سايلاۋدا ۇلى ماقسات جولىنداعى ۇلتىمىزدىڭ اۋىزبىرشىلىگى مەن ىنتىماعىن, ەڭ اسىل قاسيەتتەرىمىزدى كورسەتە الامىز دەپ سەنەمىن, – دەدى ق.ەلەۋ ۇلى.
ايتا كەتەيىك, تاڭعى ساعات توعىزدا سايلاۋ ۋچاسكەسىنەن بوي كورسەتكەنىمىزدە, سايلاۋشىلاردىڭ بەلسەندىلىگى بايقالدى. تاڭەرتەڭگى ساعات 7-دە اشىلعان ۋرناداعى ءبىرشاما جينالىپ قالعان داۋىس بەرۋ قاعازدارى وسىنى كورسەتتى.
