«بۇگىن ازاماتتار قر پارلامەنتى ءماجىلىسى مەن ءماسليحاتتار دەپۋتاتتارىنا داۋىس بەرۋدە. سايلاۋ بارىسىندا باس مەملەكەتتىك سانيتار دارىگەردىڭ قاۋلىسىمەن بەكىتىلگەن كوروناۆيرۋس ينفەكتسياسى تارالۋىنىڭ الدىن الۋ الگوريتمى ساقتالۋى كەرەك. الگوريتمدە COVID-19 ينفەكتسياسىنىڭ تارالۋىن شەكتەۋ جولدارى قاراستىرىلعان. سايلاۋ كوميسسيالارىنىڭ قىزمەتىن ۇيىمداستىرۋدا, سايلاۋ ۋچاسكەسىندە داۋىس بەرۋ پروتسەسىندە, سايلاۋ ۋچاسكەسىنەن تىس جەردە داۋىس بەرۋ بارىسىندا, سايلاۋ ۋچاسكەسىندە داۋىستاردى ساناعاندا, باقىلاۋشىلار مەن سەنىمدى تۇلعالارعا قويىلاتىن تالاپ الەۋمەتتىك اراقاشىقتىق ساقتالۋى ءتيىس», دەدى ۆيتسە-مينيستر.
ونىڭ ايتۋىنشا, سايلاۋ كوميسسياسىنىڭ جۇمىسىن ۇيىمداستىرۋ بارىسىندا سايلاۋ كوميسسيالارىنىڭ مۇشەلەرى, بايقاۋشىلار, سەنىم بىلدىرىلگەن تۇلعالار ۋچاسكەدە ماسكا رەجيمىن ساقتاۋى, 3 ساعات سايىن ماسكانى اۋىستىرىپ وتىرۋى قاجەت. قولمەن امانداسۋعا, كەلگەن ادامدارمەن جاقىن بايلانىسۋعا بولمايدى. سايلاۋ وتەتىن جەردى ءجيى تازالاپ وتىرۋ كەرەك. جيھازدار 1,5-2 مەتر اراقاشىقتا ورنالاستىرىلعانى ءجون.
«سايلاۋ ۋچاسكەسىنە كەلگەن سايلاۋشىدا مەديتسينالىق نەمەسە قورعانىش ماسكا, انتيسەپتيكالىق زات بولۋى قاجەت. بيۋللەتەن العاندا جەكە باستى كۋالاندىراتىن قۇجاتتى كوميسسيا مۇشەسىنىڭ قولىنا بەرمەي اشىپ كورسەتۋ كەرەك. مۇمكىندىك بولسا سايلاۋعا ءوز قالامىڭىزبەن كەلگەن دۇرىس نەمەسە بولماعان جاعدايدا سايلاۋ كوميسسياسى سىزگە قالام بەرەدى. داۋىس بەرۋگە بالا ەرتىپ كەلۋگە تىيىم سالىنادى», دەدى ەرلان قياسوۆ.
