ۆەدومستۆونىڭ مالىمەتىنشە, ءورت قاڭتاردىڭ 8-دە تۇندە كوكشەتاۋ قالاسىنىڭ زاستانتسيوننىي كەنتىندە بولعان.
تۇنگى كەزەكشىلىكتە جۇرگەن «اسكەر-4» اۆتوپاترۋل ۆزۆود كومانديرىنىڭ ورىنباسارى, پوليتسيا اعا لەيتەنانتى امانجول دايىروۆ جانە پوليتسيا اعا لەيتەنانتى اقان ابىلقايىروۆ ءورت شىققان ۇيگە بارىپ, تۇرعىنداردى قۇتقاردى.
پوليتسيا قىزمەتكەرلەرىمەن بىرگە سول ماڭنان ءوتىپ بارا جاتقان بەيتانىس ادامدار دا كومەككە ۇمتىلدى. ورتەنگەن ۇيدە وتباسىلىق جۇپ بولعان.
«قىزىل جالىن ءۇيدىڭ كىرەبەرىسىندە تۇتانعاندىقتان ولار سىرتقا ءوز بەتىنشە شىعا الماعان. ابىروي بولعاندا, قىراعى ءتارتىپ ساقشىلارى مەن تۇرعىندار ولاردى امان-ەسەن سىرتقا الىپ شىقتى», دەدى ۆەدومستۆودان.
انىقتالعانداي, ءورت ەلەكتر سىمىنىڭ قىسقا تۇيىقتالۋىنان ورىن العان. ءورت ءۇيدىڭ كىرەبەرىسى مەن شاتىرىن شارپىعان. قازىرگى كەزدە ساراپتاما تاعايىندالىپ, ءمان-جايى انىقتالىپ جاتىر.
