اقش-تاعى سايلاۋ ناۋقانىنا قاتىستى دۇربەلەڭ باسىلار ەمەس. سارسەنبىدە كونگرەستىڭ بىرلەسكەن سەسسياسىندا دجو بايدەننىڭ قاراشاداعى پرەزيدەنتتىك سايلاۋداعى جەڭىسىن زاڭ شىعارۋشىلار راستاۋى كەرەك بولعان. جيىندا سايلاۋ كوللەگياسىنىڭ داۋىستارى ەسەپتەلىپ, كۇشىنە ەنەدى. دونالد ترامپ جانە ونىڭ جاقتاستارى سايلاۋدىڭ ءادىل وتپەگەنىن ايتىپ, ناتيجەسىمەن كەلىسپەيتىنىن بىلدىرگەن. رەسپۋبليكاشىلاردىڭ ۆاشينگتوندا سايلاۋ ناتيجەسىن راستاۋعا قارسى نارازىلىقتار وتكىزگىسى كەلگەنى بەلگىلى بولعان-دى. وسىعان وراي جۇزدەگەن ۇلتتىق گۆارديا مۇشەسى تارتىپسىزدىكتەرمەن كۇرەسۋ ءۇشىن ساقاداي ساي تۇرعان.
اقش-تاعى سايلاۋ كوپتى جاڭىلدىرۋى مۇمكىن. ويتكەنى پرەزيدەنت پەن كونگرەسس سايلاۋى بىلتىرعى قاراشادا ءوتىپ كەتكەن ەدى. دەموكراتتار وكىلدەر پالاتاسىن باقىلاۋعا الدى, ال دجو بايدەن پرەزيدەنت بولدى. الايدا اقش كونگرەسىنىڭ جوعارعى پالاتاسىنىڭ تاعدىرى تولىق شەشىلمەدى. سەبەبى دجوردجيا شتاتىنداعى ەكى سەنات سايلاۋىنىڭ ناتيجەسى بەلگىسىز بولدى. شتات ەرەجەسىنە سايكەس, جەڭىمپاز كانديداتقا 50%-دان استام داۋىس قاجەت, ال قاراشادا وعان ەشكىم قول جەتكىزە المادى. جالپى, سايلاۋ ناتيجەسى بەلگىلى بولماي تۇرىپ, رەسپۋبليكالىقتاردا 50, ال دەموكراتتاردا 48 ورىن بولدى. ەگەر ەكى دەموكرات جەڭىسكە جەتسە, سەنات 50 دە 50 بولىپ تەڭ بولىنەدى, بۇل جاعدايدا شەشۋشى داۋىس ۆيتسە-پرەزيدەنت كامالا حارريسكە بەرىلەدى. ناتيجە تۋرا وسى ستسەناريگە ساي ءوربىدى. وسىلايشا, سەناتتىڭ قوس پالاتاسى مەن پرەزيدەنتتىك سايلاۋدا جەڭگەن دەموكراتتاردىڭ بيىلعى ساياسي ناۋقاندا اسىعى الشىسىنان تۇسكەن سەكىلدى.
ءدال وسى جاعداي رەسپۋبليكاشىلاردىڭ نارازىلىعىن تۋدىرعان بولۋى كەرەك. سايلاۋدا جەڭىلگەننەن كەيىن ترامپ تا سايلاۋدىڭ ءادىل بولماعانىن ايتىپ, داۋىستاردىڭ دۇرىس ەسەپتەلگەنىنە كۇمان كەلتىرۋمەن بولدى. بۇل پىكىردى قولدايتىن ترامپ جاقتاستارى كاپيتوليدەگى جيىندا دجو بايدەندى پرەزيدەنت دەپ جاريالاماۋ ءۇشىن بارىن سالدى. سەيسەنبىنىڭ كەشىندە ءبىردى-ەكىلى اشۋلى ازاماتتار اق ءۇيدىڭ سىرتىندا قارۋلى جۇرگەن جەرىنەن ۇستالعان. ترامپ ۆاشينگتوندا نارازىلىققا شىققان مىڭداعان حالىقتىڭ الدىنا ءسوز سويلەپ, «كونگرەسس جيىنىندا ۆيتسە-پرەزيدەنت مايك پەنس سايلاۋ كوللەگياسىنىڭ داۋىس ناتيجەسىن جوققا شىعارسا جەڭىسكە جەتەمىز» دەۋمەن بولدى.
ال ترامپتىڭ اشۋلى جاقتاستارى جيىن ءوتىپ جاتقان كاپيتولي عيماراتىن باسىپ الۋعا ارەكەت جاسادى. ناتيجەسىندە, كونگرەستىڭ قوس پالاتاسى وتىرىستى توقتاتىپ, جان ساۋعالاۋعا ءماجبۇر بولدى. عيماراتتى باسىپ العانداردىڭ سۋرەتتەرىن الەۋمەتتىك جەلى قولدانۋشىلارى مەن ونلاين باسىلىمدار جارىسا جاريالادى. زاڭ شىعارۋشىلار جۇمىسىن ۆاشينگتوندا كومەندانتتىق ساعات ەنگىزگەن سوڭ جالعاستىرىپ, دجو بايدەندى اقش-تىڭ كەلەسى پرەزيدەنتى, ال كامالا ءحارريستى ۆيتسە-پرەزيدەنت دەپ تانىدى. كاپيتوليدەگى جاعدايدان 4 ادام قازا تاۋىپ, 52 ادام ۇستالدى.
جالپى, اقش كونستيتۋتسياسىنا سايكەس داۋىس بەرۋ ناتيجەسىن كونگرەسس ماقۇلداۋى شارت. بۇل ارەكەت ارقىلى سايلاۋشىلار القاسىنىڭ داۋىس ناتيجەسى زاڭدى نەگىزدە راستالادى.
