ادامزات عارىش كەڭىستىگىنە قازاقستاننىڭ جەرىنەن اتتانعانىن ەسكەرسەك, بۇل ەلىمىز ءۇشىن تىڭنان تۇرەن سالعان سالا دەۋگە كەلمەس. الايدا ەگەمەن ەل رەتىندەگى العاشقى قادامدار 2000-جىلداردىڭ باسىندا قولعا الىنعانىن ايتا كەتكەن ورىندى. وتاندىق عارىش يندۋسترياسىنىڭ دامۋ كەزەڭدەرى وسى كەزەڭمەن تىكەلەي بايلانىستى. ايتالىق, 2004-2005 جىلدارى العاشقى مەملەكەتتىك باعدارلامانى ىسكە اسىرۋ ماقساتىندا نەگىزگى سالالىق كاسىپورىندار قۇرىلدى. ونىڭ ىشىندە «قازاقستان عارىش ساپارى» ۇك» اق-نى ەرەكشە اتاپ وتۋگە بولادى. 2007 جىلى ەلباسىنىڭ جارلىعىمەن ۇلتتىق عارىش اگەنتتىگى قۇرىلىپ, ۆەدومستۆو توراعاسى تالعات مۇساباەۆتىڭ باستاماسىمەن كومپانيانىڭ اتاۋىمەن بىرگە ونىڭ تۇتاستاي ستراتەگيالىق قۇرىلىمى وزگەردى. ناقتى ايتقاندا, ۇلتتىق كومپانيانىڭ ميسسياسى ايقىندالىپ, باعىت-باعدارى بەلگىلەندى. وسىلايشا, ەلوردادا زاماناۋي عارىش تەحنولوگيالارىنا ارنالعان ينفراقۇرىلىمدى قۇرۋ بويىنشا العاشقى قادامدار جاسالدى. بۇل يدەيا جەردى قاشىقتان زوندتاۋ عارىش جۇيەسىن, دالدىگى جوعارى سپۋتنيكتىك ناۆيگاتسيا جۇيەسىنىڭ جەرۇستى ينفراقۇرىلىمىن, سول سەكىلدى عارىش اپپاراتتارىن قۇراستىرۋ-سىناق كەشەنىن قۇرۋدى قامتيدى.
سالاداعى ايتۋلى جاڭالىقتاردىڭ ءبىرى – عارىش اپپاراتتارىن قۇراستىرۋ-سىناق كەشەنى (عا قۇسك) قۇرىلىسىنىڭ اياقتالۋى. تەحنولوگيالىق دەڭگەيى جاعىنان بالاماسى جوق نىسان سەرتيفيكاتتان ءوتىپ, بيىل عارىش اپپاراتتارىن قۇراستىرۋدىڭ وندىرىستىك تسيكلى ىسكە قوسىلادى دەپ جوسپارلانۋدا. وسى كەشەن ۇلتتىق عارىش ورتالىعىنىڭ باستى نىسانىنا اينالادى دەپ كوزدەلىپ وتىر.
عارىش اپپاراتتارىن باسقارۋدا جەرۇستى كەشەندەرىنىڭ ماڭىزى زور. وسى ورايدا وتاندىق سپۋتنيكتەردىڭ قالىپتى جۇمىسىن قامتۋدا «اقكول» بايلانىس ورتالىعىنىڭ ورنى بولەك. ويتكەنى بايلانىس پەن حابار تاراتاتىن Kazsat عارىشتىق جۇيەسىن قالىپتاستىرۋ ءىسى ءدال وسى جەرۇستى عارىش ينفراقۇرىلىمىنان باستالدى. ونىڭ جۇمىسىن رەسپۋبليكالىق عارىش بايلانىس ورتالىعى قاداعالايدى. «اقكولدىڭ» قىزمەتىنە تەلەكوممۋنيكاتسيالىق سپۋتنيكتەردىڭ تەحنيكالىق جانە بالليستيكالىق سيپاتتامالارىن باسقارىپ باقىلاۋ, سونداي-اق KazSat سەريالى عارىش اپپاراتتارىنىڭ پايدالى جۇكتەمەسىنىڭ مونيتورينگى كىرەدى. بۇل عارىش بايلانىس ورتالىعى ەلوردادان 108 شاقىرىم قاشىقتىقتا ورنالاسقان. 2008-2009 جىلدارى Kazsat-2 باعدارلاماسى مەن 2012-2013 جىلدار كەزەڭىندە KazSat-3 جوباسى ارقىلى تەحنيكالىق جاڭعىرتۋ جۇمىستارى جۇرگىزىلدى. ناتيجەسىندە «اقكول» ITU حالىقارالىق ەلەكتر بايلانىس وداعىنىڭ سپۋتنيكتىك راديوباقىلاۋ ستانسالارىنىڭ بىرىڭعاي تىزىمىنە ەنگىزىلدى.
قازىر رەسپۋبليكالىق عارىش بايلانىس ورتالىعى Kazsat-2 جانە KazSat-3 ەكى بايلانىس سپۋتنيگىنەن تۇراتىن Kazsat بايلانىس جانە حابار تاراتاتىن قازاقستاندىق عارىش جۇيەسىنىڭ شتاتتىق جۇمىسىن قامتاماسىز ەتەدى. عارىش اپپاراتتارىن باسقارۋ اقمولا وبلىسىنداعى «اقكول» نەگىزگى جەرۇستى كەشەنى مەن الماتى وبلىسىنداعى رەزەرۆتىك «كوكتەرەك» عارىش بايلانىس ورتالىعىنان جۇرگىزىلەدى. بۇگىندە Kazsat جۇيەسىنىڭ جۇكتەمەسى شامامەن 74%-دى قۇرايدى.
Kazsat بايلانىس سپۋتنيكتەرىنىڭ قىزمەتتەرىن ەلىمىزدىڭ اۋماعىندا 13 مىڭنان استام سپۋتنيكتىك بايلانىس ستانسالارى بار 15 وتاندىق بايلانىس جانە حابار تاراتۋشى وپەراتور پايدالانىپ كەلەدى. 2019 جىلى عارىشتىق بايلانىس جۇيەسىن پايدالانۋدان تۇسكەن جالپى تابىس 29 ملرد تەڭگەدەن اسىپ, جىلدىق يمپورتتى الماستىرۋ مولشەرى 14,7 ملرد تەڭگەگە جەتتى. مەملەكەتتىك بيۋدجەتكە 6 ملرد تەڭگەدەن اسا جالپى سالىق اۋدارىلدى.
تاعى ءبىر پەرسپەكتيۆالى جوبالاردىڭ ءبىرى – Kazsat-2R سپۋتنيگىن ازىرلەۋ. ونىڭ بولجامدى قۇنى – 39,65 ملرد تەڭگە.
