«عىلىم. قوعام. كىتاپ الەمى» تاقىرىبىمەن وتكەن جيىن الاشتانۋ مەن ءماتىنتانۋ سالاسىنا, سونداي-اق ۇلتتىق مۇرانى جۇيەلەپ, عىلىمي اينالىمعا ەنگىزۋ ىسىنە ەلەۋلى ۇلەس قوسقان تۇلعانىڭ ەڭبەگىن كەڭىنەن تانىتۋعا ارنالدى. القالى جيىنعا عىلىم جانە جوعارى ءبىلىم مينيسترلىگى ءتىل ساياساتى كوميتەتىنىڭ توراعاسى, فيلولوگيا عىلىمدارىنىڭ كانديداتى ەربول تىلەشوۆ مودەراتورلىق ەتتى.
ءىس-شارا بارىسىندا عاريفوللا انەستىڭ شىعارماشىلىعى مەن عىلىمي مۇراسىنا ارنالعان بەينەماتەريال كورسەتىلىپ, التى بىردەي كىتاپتىڭ تۇساۋكەسەر ءراسىمى ءوتتى.
فيلولوگيا عىلىمدارىنىڭ دوكتورى, پروفەسسور, ۇعا اكادەميگى باۋىرجان ومار ۇلى كىرىسپە ءسوز سويلەپ, عاريفوللا انەستىڭ ۇلتتىق عىلىم مەن رۋحانياتقا سىڭىرگەن ەڭبەگىنە توقتالدى.
«ۇلت رۋحانياتىندا ايرىقشا ءىز قالدىرعان, ءورىسى مەن ونەگەسى مول عاريفوللالار بارشىلىق. قاي-قايسىسى دا ەلدىك ماسەلەلەرگە بارىنشا اتسالىستى. ءبىرى ونەرىمىزدى ورلەتتى. تاعى ءبىرى عىلىمىمىزدى تورلەتتى. سونداي-اق ۇلت مۇراسىن جيناۋعا, زەرتتەۋگە, جاريالاۋعا تىنباي تەر توككەن تاعى ءبىر عاريفوللامىز بار ەدى. ول – عاريفوللا انەس. ءبىر ءوزى ءبىر ينستيتۋتتىڭ جۇمىسىن جاساعان عيبراتتى عالىم. ءبىر ءوزى ءارحيۆتىڭ زەرتتەۋ جۇمىسىن جۇرگىزگەن مارتەبەلى مۇراعاتشى. ءبىر ءوزى تۇتاستاي ءبىر باسپالار ءۇيىنىڭ قىزمەتىن اتقارعان بىلىكتى باسپاگەر. ءبىر ءوزى بۇكىل ارىستىڭ جيعان-تەرگەنىن جالىقپاي سارالاعان ابىرويلى الاشتانۋشى. جالپى, وزىمىزگە ۇلگى بولعان عاريفوللا انەس, امانقوس مەكتەپ, ماقسات ءتاج-مۇرات, مارات ابسەمەتوۆ سياقتى اعالارىمىز الاش ارىستارىنىڭ مۇراسىن زەرتتەۋدى تىم ەرتە باستاپ جىبەرگەن-ءدى. ارداقتىلارىمىزدىڭ تۇلعاسى مەن تۋىندىسىنا ءالى دە تولىق باعا بەرىلمەي جاتقان تۇستا ولار بۇل ىسكە تاس-ءتۇيىن دايىن تۇردى. ەلىمىزدەگى بىلدەي ءبىر عىلىمي زەرتتەۋ ينستيتۋتىنىڭ جۇمىسىن جان-جاقتى اتقارىپ جۇرگەن عارەكەڭ, ءبىر كۇنى شۇعىل شەشىمگە كەلدى. ول قازاقستاننىڭ رەپرەسسياعا ۇشىراعان زيالىلارىنىڭ مۇراسىن زەرتتەيتىن «ارىس» قورىن قۇردى. تاۋەلسىزدىك العانىمىزعا ءبىر-اق جىل وتكەن-ءدى. بۇل قور سودان بەرى ۇزدىكسىز جۇمىس ىستەدى. بۇل قوردىڭ باسشىسى سودان بەرى ءبىر كۇن دە دامىل كورگەن جوق. قانشاما تۇلعانى شىڭىراۋدان شىعاردى. قانشاما كىتاپتى باستى. قانشاما ەنتسيكلوپەديا ءتۇزدى. قانشاما تاريحي مۇرانى قاتارعا قوستى. قانشاما ءارحيۆتىڭ ەسىگىن قازاق جۇرتىنا ايقارا اشىپ بەردى. قانشاما قازاق باسىلىمىنىڭ كىتابي نۇسقاسىن ازىرلەپ, وقىرمانعا ۇسىندى. ەندى كىم جالعاستىرادى ونى؟ جالعاستىرعان كۇندە دە ءدال وزىندەي بولا الا ما؟» دەپ باۋىرجان ومار ۇلى ۇشان-تەڭىز ءىس تىندىرعان عاريفوللا انەستىڭ بولمىس-ءبىتىمىنىڭ ەرەكشەلىگىن اشىپ ايتتى.
ودان كەيىنگى ءسوز عالىمنىڭ جارى, احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ باس عىلىمي قىزمەتكەرى, فيلولوگيا عىلىمدارىنىڭ دوكتورى, پروفەسسور باعدان قاتايقىزىنا بەرىلدى.
«عارەكەڭ وپەراتسياعا كەتىپ بارا جاتقان كەزىندە: ء«وزىمنىڭ كىتاپتارىم شىقپاي قالدى-اۋ!» دەپ وكىنىشىن بىلدىرگەن ەدى. كەتەتىنىن سەزگەن بولار. ويىمىزدا ەشتەڭە جوق: «جازىلعان سوڭ شىعاراسىڭ عوي», دەدىك. ومىردەن وتكەننەن كەيىن وسى ءىستى قولعا الدىق. ءتورت فلەشكاسىن ءبىز ءالى اشقان جوقپىز. كوزى تىرىسىندە كىتاپتارىنىڭ جوباسىن سۇلبالاپ سالىپ كەتكەن ەكەن. سول نەگىزدە التى كىتابىن شىعاردىق», دەي كەلە ب.قاتايقىزى عالىمنىڭ «اعارتۋشى», «الاش تاريحى», ء«ابىش كەكىلباەۆ شاعىن پروزالارىنىڭ تىلدىك جانە تانىمدىق سيپاتى», «قازاق ءتىلىنىڭ تاريحى: ەتيمولوگيا. ەتنوگرافيا», «نوعايلى ءداۋىرى. حح عاسىر باسى», «مەملەكەتتىك ءتىل جانە ءتىلشى-عالىمدار. تۇلعالار», «اعارتۋشى حالەل دوسمۇحامەد ۇلى: عىلىمي جانە پەداگوگيكالىق ەڭبەكتەرىنىڭ الەۋمەتتىك-تاريحي, لەكسيكا-سەمانتيكالىق اسپەكتىلەرى» اتتى التى كىتاپتىڭ ارقايسىسىنىڭ ءمان-مازمۇنىنا, جازىلۋ تاريحىنا توقتالدى.
جيىندى قورىتىندىلاعان مودەراتور ەربول تىلەشوۆ ۇلتىنىڭ رۋحاني مۇراسىن بايىتۋعا سانالى عۇمىرىن ارناعان عالىم عاريفوللا انەستىڭ ەسىمى حالىق جادىندا ماڭگى ساقتالاتىنىن اتاپ ءوتتى. ول كىتاپتىڭ تۇساۋكەسەر راسىمىنە جينالعان جاستار مەن زەرتتەۋشىلەردى جاڭا ەڭبەكتەرمەن تانىسىپ, ونداعى مازمۇندى ويلاردى تەرەڭىرەك زەردەلەۋگە شاقىردى.
