نۇرلان نىعماتۋلين اتاپ وتكەندەي, 2021 جىل ءبىز ءۇشىن ەرەكشە, سەبەبى, وسى جىلى ءبىز اتا-بابالارىمىز عاسىرلار بويى اڭساعان, قاسيەتتى تاۋەلسىزدىگىمىزدىڭ 30 جىلدىعىنا قادام باستىق.
ءماجىلىس توراعاسىنىڭ ايتۋىنشا, ماقالادا مەملەكەتىمىزدىڭ قالىپتاسۋ, دامۋ, وركەندەۋ جولى «باعدار مەن بەلەس», «تانىم مەن تاعلىم», «قوعام مەن قۇندىلىق» جانە «ۇلاعات پەن ۇستانىم»,-دەپ اتالاتىن ءتورت اۋقىمدى باعىتتى قامتي وتىرىپ, «وتىز جىلدا ءبىز قانداي جەتىستىكتەرگە جەتتىك؟», «كەلەر ۇرپاققا قانداي ەلدى اماناتتايمىز؟», «مەملەكەتتىگىمىزدى نىعايتا ءتۇسۋ ءۇشىن تاعى نە ىستەيمىز؟»,-دەگەن سۇراقتاردىڭ ايقىن جاۋابىن كورسەتكەن.
پرەزيدەنت اتاپ وتكەندەي, تاريح تۇرعىسىنان العاندا, وتىز جىل – كوزدى اشىپ جۇمعانداي قاس-قاعىم ءسات. دەگەنمەن, بۇل كوپتەگەن حالىقتار ءۇشىن قيىندىعى مەن قۋانىشى, داعدارىسى مەن دامۋى الماسقان تۇتاس ءداۋىر دەۋگە بولادى. ءبىز دە وسىنداي جولدان ءوتىپ كەلەمىز.
ءماجىلىس توراعاسى العاشقى ونجىلدىقتا ەلباسىمىز نۇرسۇلتان ءابىش ۇلى نازارباەۆتىڭ باسشىلىعىمەن مەملەكەتتىك نىشاندارىمىز بەلگىلەنىپ, بيلىك جۇيەمىز قالىپتاستى. «قازاقستان -2030» ستراتەگياسىن قابىلدادىق.
ەكىنشى ونجىلدىقتا مەملەكەتىمىزدىڭ تۇعىرى نىعايىپ, ەكونوميكالىق الەۋەتىمىز ارتقانىن, ءۇشىنشى ونجىلدىقتا «قازاقستان – 2050» ستراتەگياسىن قابىلداپ, وزىق دامىعان وتىز ەلدىڭ قاتارىنا قوسىلۋدى جوسپارلاپ وتىرعانىنا توقتالدى.
نۇرلان نىعماتۋلين ءوز سوزىندە: - وسى كەزەڭدەردە ءبىلىم, دەنساۋلىق, الەۋمەتتىك جاعداي, رۋحاني بايلىعىمىز, پاتريوتتىق رۋحىمىز, باسقا دا ەلىمىزدىڭ بارلىق سالالارى زامان تالابىنا ساي قارقىندى ءوسىپ وتىردى. بۇل ەلباسىمىز باستاپ, مەملەكەت باسشىسى جالعاستىرعان ماقساتى بەرىك, بولاشاعى ايقىن, سەنىمى نىق قازاقستاندىق ۇزدىكسىز دامۋ جولىمىز, - دەدى.
ەندى الداعى ءتورتىنشى ونجىلدىقتاعى باستى مىندەت – قۋاتتى ەل جانە كەمەل حالىق بولۋ ەكەنىن العا تارتقان پالاتا سپيكەرى وسى جولدا ەڭ باستى باعدار ءبىلىمدى ۇرپاق ەكەنىن ايتىپ, جاس بۋىنعا جان-جاقتى قولداۋ كورسەتە وتىرىپ, باسەكەلىك قابىلەتىن ارتتىرۋعا باسا كوڭىل بولىنەتىنىنە باسا كوڭىل بولىنەتىنىن جەتكىزدى.
- مەملەكەت باسشىسىنىڭ ماقالاسى-ەلىم, جەرىم دەيتىن, تاۋەلسىزدىكتى قورعاۋعا, ساقتاۋعا ۇلەس قوسۋعا ءتيىس ءاربىر ازامات ءۇشىن اقىل قالتا سياقتى ايقىن باعدار دەۋگە بولادى. سونىمەن بىرگە, بۇكىل قوعامدى ۇيىستىراتىن قۇندىلىقتاردى جيناقتاي وتىرىپ, ەل بىرلىگىن, ۇلت تۇتاستىعىن, مەملەكەت وركەنيەتىن قامتاماسىز ەتۋگە ارنالعان ناقتى تاريحي قۇجات, - دەدى نۇرلان نىعماتۋلين.
ءماجىلىس توراعاسى اتاپ وتكەندەي, مەملەكەت باسشىسىنىڭ ماقالاسى ءاربىر قازاقستاندىقتىڭ جۇرەگىنەن ورىن الىپ, رۋحىن اسقاقتاتۋعا سەرپىن بەرەتىنى ءسوزسىز.
