جاقىندا تەلەديداردان جامبىل وبلىسىنىڭ تالاس, ويىق
اۋىلدارىن جانە مويىنقۇمداعى جايلاۋدى قالاي قۇم باسقاندىعىن كورسەتتى. سوڭعى كەزدەرى جايىقتىڭ تارتىلۋى, جەم وزەنىنىڭ مۇلدە جوعالا باستاۋى بارشامىزدى الاڭداتادى. وسىعان وراي پرەزيدەنت جولداۋىندا مىناداي ءىس-شارالار كورسەتىلىپتى. «ۇكىمەتكە ەكولوگيالىق احۋالدى جاقسارتۋ جونىندەگى شارالاردى ناقتى جۇزەگە اسىرۋعا كىرىسۋدى تاپسىرامىن. بيولوگيالىق اركەلكىلىكتى ساقتاۋ جانە ءتيىمدى پايدالانۋ جونىندەگى ۇزاق مەرزىمدى جوسپارلاردى بەكىتكەن ءجون.
بەس جىل ىشىندە ورمان القابىندا 2 ميلليارد, ەلدى مەكەندەردە 15 ميلليون اعاش وتىرعىزىلاتىن بولادى. بۇل ەلىمىزدەگى كوگالداندىرۋ اۋقىمىن كەڭەيتۋگە سەپتىگىن تيگىزەدى».
اعاشتار وتىرعىزىپ, ورمان القابىن كەڭەيتۋ وتە قاجەت ءارى ۇزاق مەرزىمدى جوسپاردى كۇتپەي, شۇعىل قولعا الىنۋى كەرەك. ماسەلەن اۋىل مەن اۋىل اراسىنداعى جول بويىنا اعاش ەگىپ, «جاسىل كوپىر» ءىس-شاراسىن قولعا الۋ وتە ماڭىزدى. استانا توڭىرەگىندەگى جاسىل القاپتى ءار اۋىلدان, اۋدان ورتالىعىنان كورگىمىز كەلەدى. بىزدەگى ءالى كۇنگە دەيىن وقىتۋ سالاسىندا ەكولوگيالىق ءبىلىم مەن تاربيە پارمەندى تۇردە جۇزەگە اسپاي كەلەدى. پرەزيدەنت مۇنى دا انىقتاپ كورسەتىپ ايتقان. مەكتەپتەر مەن جوعارى وقۋ ورىندارىندا وسكەلەڭ ۇرپاققا ەكولوگيالىق تاربيە بەرۋ ىسىنە جەتكىلىكتى نازار اۋدارۋ قاجەت. قوعامدا ەكولوگيالىق قۇندىلىقتاردى ورنىقتىرۋعا ۇندەيتىن Birge – taza Qazagstan ەكولوگيالىق اكتسياسىن جۇيەلى تۇردە وتكىزىپ تۇرعان ءجون.
جاقىندا عانا اقتوبەدەگى كومىلىپ قالعان بۇلاقتاردى اشىپ, ارناسى تارىلعان وزەندى قالپىنا كەلتىرۋ جۇمىستارىن كورىپ ريزا بولدىق. مۇنداي شارالار ناۋرىز مەرەكەسىن, كوكتەمدى كۇتپەي جىلدىڭ قولايلى مەزگىلدەرىندە ءداستۇرلى حالىقتىق قوزعالىسقا اينالۋى قاجەت.
تۋعان ەلدىڭ تابيعاتى – ەلدىڭ بەرەكە بىرلىگىنىڭ, ىنتىماعىنىڭ جارقىن كورىنىسى. ونى توزدىرماي ۇرپاقتان ۇرپاققا قالدىرۋ بابالار اماناتى. بارشا قازاقستاندىقتاردىڭ ءبىرىنشى كەزەكتەگى اسىل پارىزى.
ءانۋار تاراقوۆ,
ءال-فارابي اتىنداعى قازۇۋ-دىڭ فيلولوگيا جانە الەم تىلدەرى فاكۋلتەتىنىڭ پروفەسسورى
الماتى
