پرەزيدەنت • 05 قاڭتار، 2021

ۇلتتىق مۇددەنى اسپەن دە، تاسپەن دە قورعاۋعا دايىن بولۋىمىز قاجەتتىگىن تاعى دا ايتقىم كەلەدى

1009 رەت كورسەتىلدى

بۇل تۋرالى مەملەكەت باسشىسى قاسىم-جومارت توقاەۆ ەل گازەتىندە جاريالاعان «تاۋەلسىزدىك بارىنەن قىمبات» اتتى ماقالاسىندا ايتتى. سونداي-اق پرەزيدەنت قازاقستان شەكاراسىنا بايلانىستى پىكىر ءبىلدىردى، - دەپ حابارلايدى Egemen.kz

مەملەكەت باسشىسى ەگەمەندىگىمىزدىڭ ماڭگىلىك ۇشتاعانى – التايدان اتىراۋعا، الاتاۋدان ارقاعا دەيىن كەڭ كوسىلگەن بايتاق جەرىمىز، انانىڭ اق سۇتىمەن بويىمىزعا دارىعان قاستەرلى ءتىلىمىز جانە بارلىق قيىندىقتاردان حالقىمىزدى سۇرىندىرمەي الىپ كەلە جاتقان بەرەكە-بىرلىگىمىز ەكەنىن العا تارتىپ، ءبىز وسى ءۇش قۇندىلىقتى كوزدىڭ قاراشىعىنداي ساقتايتىنىمىزدى باسا ايتتى.

«بابالاردان مۇرا بولعان قاسيەتتى جەرىمىز – ەڭ باستى بايلىعىمىز. قازاققا وسىناۋ ۇلان-عايىر اۋماقتى سىرتتان ەشكىم سىيعا تارتقان جوق. بۇگىنگى تاريحىمىز 1991 جىلمەن نەمەسە 1936 جىلمەن ولشەنبەيدى. حالقىمىز قازاق حاندىعى كەزىندە دە، ودان ارعى التىن وردا، تۇرىك قاعاناتى، عۇن، ساق داۋىرىندە دە وسى جەردە ءومىر سۇرگەن، ءوسىپ-ونگەن. قىسقاشا ايتقاندا، ۇلتتىق تاريحىمىزدىڭ تەرەڭ تامىرلارى كونە زاماننىڭ وزەگىندە جاتىر. جالپى، تاريحپەن ساياساتكەرلەر ەمەس، تاريحشىلار اينالىسۋى كەرەك»، - دەدى پرەزيدەنت. 

قاسىم-جومارت توقاەۆ  شەكارا ماسەلەسىن شەشۋمەن ناقتى اينالىسىپ جاتقان كەزدە كەيبىر ساياساتكەرلەر مەن قوعام قايراتكەرلەرى ء«بىز بۇعان اسىقپايىق»، «كەيىن دە كەلىسۋگە بولادى» دەپ ارقانى كەڭگە سالعىسى كەلگەنىن دە ەسكە سالىپ ءوتتى.

«كەلىسسوزدەردى تاباندىلىقپەن جۇرگىزىپ، ىرگەمىزدى دەرەۋ قىمتاپ العانىمىز وتە دۇرىس بولعانىن ۋاقىتتىڭ ءوزى دالەلدەپ بەردى. قازىر كىم نە ايتسا دا، ءبىزدىڭ ەكىجاقتى كەلىسىمدەرمەن بەكىتىلىپ، حالىقارالىق دەڭگەيدە تانىلعان شەكارامىز بار. ەندى وعان ەشكىم داۋلاسا المايدى»، - دەدى مەملەكەت باسشىسى.

سونداي-اق پرەزيدەنت اۋماقتىق تۇتاستىعىمىزعا كۇمان كەلتىرىپ، تاتۋ كورشىلىك قاتىناستارعا سىنا قاققىسى كەلەتىن كەيبىر شەتەل ازاماتتارىنىڭ ارانداتۋشىلىق ءىس-ارەكەتتەرىنە رەسمي جانە قوعامدىق دەڭگەيدە تويتارىس بەرە وتىرىپ، اعارتۋشىلىق جۇمىستارىن ۇستامدىلىقپەن جۇرگىزگەن ءجون ەكەنىن ايتتى.

سوڭعى جاڭالىقتار

تاعى 1650 قازاقستاندىق ىندەت جۇقتىردى

كوروناۆيرۋس • بۇگىن، 09:00

سوفيادان ولجالى ورالدى

سپورت • بۇگىن، 08:40

جاس تەننيسشىلەر جارادى

تەننيس • بۇگىن، 08:32

تۇتىنۋشى قۇقىعىن قورعايدى

قازاقستان • بۇگىن، 08:27

ۇقساس جاڭالىقتار