ء«ماجىلىس دەپۋتاتتارىنىڭ بيىلعى سايلاۋى – كوپپارتيالى پارلامەنتتى ورنىقتىرۋ جولىنداعى ماڭىزدى قادام. بىزدە ساياسي كوزقاراستارى ءارتۇرلى پارتيالار بار. ولاردىڭ ۇستانىمدارى كونسەرۆاتيۆتى, ليبەرالدى, ۇلتشىل, سوتسياليست جانە تاعى باسقا بولۋى مۇمكىن. بۇل – تابيعي ۇدەرىس. ساياسي پليۋراليزم مەملەكەتتى ەۆوليۋتسيالىق جولمەن دامىتۋعا جانە نىعايتۋعا مۇمكىندىك بەرەدى. ساياسي كۇشتەر وسىنداي ءارالۋان بولسا دا, بارشاسىن بىرىكتىرەتىن جانە بارىنە ورتاق قۇندىلىق بار. ول – قاستەرلى تاۋەلسىزدىك», - دەيدى مەملەكەت باسشىسى.
وسى تۇستا پرەزيدەنت الداعى ماقسات كەلەر ۇرپاققا قازاقستاندى تۇعىرى مىعىم, ەكونوميكاسى قۋاتتى, رۋحى اسقاق مەملەكەت رەتىندە تابىستاۋ جانە ەلدىك ىستەردى شاشاۋ شىعارماي لايىقتى جالعاستىراتىن جاسامپاز ۇرپاق تاربيەلەۋ ەكەنىن باسا ايتتى.
ء«ححى عاسىر – ءبىلىم مەن بىلىكتىڭ ءداۋىرى. ءار ادام ءوزىن ۇزدىكسىز جەتىلدىرىپ, جاڭا كاسىپتەردى يگەرىپ, ۇنەمى زامان اعىمىنا بەيىمدەلۋ ارقىلى عانا باسەكەلىك قابىلەتىن ارتتىرا الادى. ءبىلىم مەن تەحنولوگيا, جوعارى ەڭبەك ونىمدىلىگى ەل دامۋىنىڭ باستى قوزعاۋشى كۇشى بولۋعا ءتيىس. بۇل تۋرالى ۇلى اباي: «ادام بالاسى ادام بالاسىنان اقىل, عىلىم, ار, مىنەز دەگەن نارسەلەرمەن وزباق. ونان باسقا نارسەمەنەن وزدىم عوي دەمەكتىڭ ءبارى دە – اقىماقتىق» دەگەن», - دەپ ناقتىلاپ ءوتتى مەملەكەت باسشىسى.
