ەكونوميكالىق كريزيس
پاندەميانىڭ سالقىنى تيگەن ەڭ ءىرى سالالاردىڭ ءبىرى ەكونوميكا بولدى. پاندەميا تابىسى از ەلدەردەن باستاپ دامىعان الپاۋىت مەملەكەتتەرگە دەيىن اسەر ەتتى. ۇلىبريتانيا ەكونوميكاسىن رەتسەسسيادا دەپ مالىمدەدى. الەم حالقىنىڭ ۇشتەن بىرىنەن كوبى ء«ۇي قاماقتا» وتىرۋعا ءماجبۇر بولىپ, جاھاندىق ەكونوميكا تۇرالاپ قالدى دەسە دە بولادى. وعان قوسا «برەكسيت», اقش – قىتاي تەكەتىرەسى دە عالامدىق ەكونوميكانى باياۋلاتقان-دى. 2020 جىلى ەلدەردىڭ ىشكى جالپى ءونىمى دە تومەندەي ءتۇستى. ماماندار بۇل داعدارىستان قاشان شىعاتىنىمىزعا ناقتى بولجام ايتا الماي وتىر.
مينسكىدەگى شەرۋلەر
پوستكەڭەس اۋماعى بيىل ساياسي جانجالدارعا قاتىستى ءجيى اتالدى. ونىڭ ءبىرى – بەلارۋس رەسپۋبليكاسىندا بولعان نارازىلىق. پرەزيدەنت سايلاۋىنىڭ ناتيجەسىنە رازى بولماعان تۇرعىندار بەيبىت شەرۋگە شىققان-دى. الايدا سوڭى قاقتىعىسقا ۇلاسقان جانجالدان زارداپ شەككەندەر دە بار. بۇل ەلدەگى ساياسي احۋالدىڭ كۇردەلەنە ءتۇسىپ, حالىق پەن بيلىك اراسىنداعى بايلانىستىڭ الشاقتاي تۇسكەنىن انىق كورسەتتى. نارازى حالىق ءالى دەگەنىنە جەتپەسە دە, ەلدەگى بيلىككە دەگەن سالقىن كوزقاراستى بايقاماۋ مۇمكىن ەمەس.
قاراباقتاعى قاقتىعىس
2020 جىل كوپتەن بەرى جالعاسىپ كەلە جاتقان كۇرمەۋى قيىن كۇردەلى ماسەلەلەردىڭ شيەلەنىسكەن جىلى رەتىندە ەستە قالدى. ازەربايجان مەن ارمەنيا اراسىندا تاۋلى قاراباققا بايلانىستى جەر داۋى بيىل قايتا ءورشىدى. قارۋلى قاقتىعىسقا ۇلاسقان وسى سوعىستا ازەربايجان ءوزىنىڭ ارمەنيا باسىپ العان تاريحي اۋماعىنىڭ بەلگىلى ءبىر بولىگىن قايتارىپ الدى. 10 قاراشا كۇنى تاراپتار كەلىسىمگە كەلىپ, ايماقتا اتىستى جانە بارلىق اسكەري ارەكەتتى توقتاتۋ تۋرالى مالىمدەمە جاسالدى. وسىلايشا, ءوتىپ بارا جاتقان جىل ازەربايجان مەملەكەتى ءۇشىن تاريحي كەزەڭگە اينالدى.
اقش-تاعى سايلاۋ
2020 جىل قاي جاعىنان الساق تا وقيعاعا باي بولدى. بيىل الەم ەلدەرى اسا قىزىعۋشىلىقپەن باقىلاعان ساياسي جاڭالىقتاردىڭ ءبىرى – ترامپ-بايدەن باسەكەسى بولعانى ءسوزسىز. ساراپشىلار جاساعان الدىن الا بولجامداردىڭ ءبىر-بىرىنە كەراعار بولۋى مەن قاي كانديداتتىڭ جەڭىسكە جەتەتىنىن سوڭىنا دەيىن بىلمەۋ ساياسي بايگەنى قىزدىرا ءتۇستى. پاندەميا جاعدايىندا وتكەن سايلاۋدا داۋىس بەرۋ تاسىلدەرى دە وزگەردى. تارتىستى باسەكەدە جەڭىسكە جەتكەن 78 جاستاعى دجو بايدەن – اقش تاريحىنداعى جاسى ەڭ ۇلكەن بيلەۋشى. ال كامالا حارريس بولسا تاريحتاعى ۆيتسە-پرەزيدەنت اتانعان العاشقى وزگە ءناسىلدى ايەل.
كورشى ەلدەگى كەزەكتى «توڭكەرىس»
پارلامەنت سايلاۋىن قايتا وتكىزۋدى تالاپ ەتكەن نارازىلىقتىڭ سوڭى جالپىۇلتتىق قاقتىعىسقا ۇلاستى. ناتيجەسىندە ەل پرەزيدەنتى سوورونباي جەەنبەكوۆ ءوز ەركىمەن وتستاۆكاعا كەتتى. ىندەتپەن قاتار جانجالدىڭ الدىن الۋعا تىرىسقان بيلىك قاۋىپسىزدىك شارالارىن ساقتاۋعا شاقىرۋمەن بولدى. بۇل وقيعا ەلدىڭ ەكونوميكاسىنا جانە ينۆەستيتسيالىق احۋالىنا اسەر ەتىپ قانا قويماي, كوپتەگەن زاڭ بۇزۋشىلىق فاكتىلەرى دە تىركەلدى.
قيىر شىعىستاعى ەرەۋىل
رەسەيدىڭ قيىر شىعىسىندا قالا تۇرعىندارى حاباروۆسك ايماعىنىڭ ەكس-گۋبەرناتورى سەرگەي فۋرگالدى قولداۋ ءۇشىن الاڭعا شىقتى. قاتىسۋشىلار مۇنداي ءىرى جيىنداردىڭ قالادا بۇرىن-سوڭدى بولماعانىن ايتقان. گۋبەرناتوردىڭ تۇتقىندالۋى, سوت وتىرىسىنىڭ وزگە وڭىردە ءوتۋى جانە بيلىكتەن كەتۋى حالىقتىڭ اشۋىن كەلتىرىپ, قوعامدىق رەزونانس تۋدىردى. تەرگەۋ بارىسىندا ساياساتكەر بىرنەشە ادام ءولىمىن ۇيىمداستىردى دەپ ايىپتالعان. شىلدە-قىركۇيەك ايلارىنا سوزىلعان مىڭداعان ادام جينالعان ميتينگتەر رەسەيدەگى بيىلعى ايتۋلى وقيعالاردىڭ بىرىنە اينالدى.
