شالقار راديوسىنىڭ العاشقى حابار تاراتقان 1 قاڭتار كۇنگى ەفيرى ەرەكشە. راديو ارداگەرلەرى مەن ەلىمىزدىڭ مەملەكەت جانە قوعام قايراتكەرلەرىنىڭ قۇتتىقتاۋلارى بەرىلىپ, ەفيردە ارداگەرلەر ەستەلىك-تىلەكتەرىن ايتادى.
شالقار راديوسى حابارلارىنىڭ باسىم بولىگى 2020 جىلدىڭ قىركۇيەگىنەن باستاپ, الماتى قالاسىنداعى جەلتوقسان 175 مەكەن جايىنان ەلىمىزدىڭ تۇكپىر-تۇكپىرىنە تولىق تىكەلەي ەفيردە حابار تاراتىپ وتىر. قازىرگى ۋاقىتتا شالقار راديوسى 18 ساعات بويى ەكى شاحار – نۇر-سۇلتان مەن الماتى قالالارىنان ەفيرگە شىعۋدا.
ەرەكشە ايتارلىعى, شالقار راديوسى ۇلتتىق ارنا اتىنا ساي 2020 جىلدىڭ 1 قىركۇيەك - جاڭا ماۋسىمنان تەك قانا قازاقتىڭ ۇلتتىق مۋزىكاسى مەن ءتول ونەرىن, ۇلتتىق مادەنيەتى مەن ادەبيەتىن, بابالار مۇراسى - قازاقتىڭ ءانى مەن كۇيىن, ساعىندىرعان رەترو مۋزىكاسىن, وتكەنىمىزدەن سىر شەرتەتىن «التىن قورداعى» اسىل قازىنالارىن ناسيحاتتاۋعا تۇبەگەيلى بەت بۇردى. ال ارنايى ەسترادالىق مۋزىكاعا ارنالعان باعدارلامالاردا عانا ەستراداعا وڭدەلگەن حالىق اندەرى مەن قازاقى سيپاتتاعى ەسترادالىق اندەر بەرىلۋدە. راديو فورماتىنا ساي يميدجدىك روليكتەرى, «توسەنىش» مۋزىكا (پودلوجكا) ت.ب. ۇلتتىق باعىتتا جاڭالاندى.
شالقار راديوسى «التىن قورداعى» ءىنجۋ-مارجاندارىمىزدى اپتانىڭ بەس كۇنىندە ساعات 22.00-دە ءبىر ساعاتتان كۇندەلىكتى ۇزبەي بەرىپ كەلەدى. سونداي-اق «التىن قورداعى تۇلعالار داۋىسى», «التىن قوردان ءان تىڭدايىق», «التىن قوردان كۇي تىڭدايىق», «بىزگە قىمبات داۋىستار» سىندى ارنايى ايدارلار كۇنىنە بىرنەشە دۇركىن ەفيردەن وتەدى. «رەترو» ايدارىندا كۇن سايىن «التىن قوردان» باسقا ەش جەردە كەزدەسپەيتىن وريگينال جازبالار بەرىلىپ كەلەدى.
