ولار ازاماتتارمەن كەزدەسىپ, پارتيانىڭ سايلاۋالدى باعدارلاماسىن تانىستىردى. اقجولدىقتاردىڭ ايتۋىنشا, الەۋمەتتىك ادىلەتتىلىك ەل ازاماتتارىنىڭ ساپالى ءبىلىم بەرۋ مەن مەديتسيناعا, تۇرعىن ءۇي جانە جۇمىس ورىندارىنا قولجەتىمدىلىگىمەن ايقىندالادى. بۇل سالالار قارجىلاندىرۋدىڭ جەتىسپەۋشىلىگى مەن جەمقورلىقتىڭ كەسىرىنەن كەشەۋىلدەپ كەلەدى. الەۋمەتتىك ادىلەتتىلىكتى قامتاماسىز ەتۋ ءۇشىن پارتيا بەلسەندىلەرى ەلدە بىرنەشە شارا قولعا الىنۋى كەرەك دەگەن سەنىمدە. ماسەلەن, يپوتەكا, تۇتىنۋ تاۋارلارى ءۇشىن, شاعىن جانە ورتا بيزنەسكە بەرىلەتىن نەسيەلەردىڭ پايىزدىق مولشەرلەمەسى 7-8 پايىزدان اسپاۋى كەرەك. تۇرعىنداردى كوللەكتورلاردان قورعاۋ ءۇشىن «جەكە تۇلعالاردىڭ بانكروتتىعى تۋرالى» زاڭ قابىلدانۋى كەرەك. پارتيا وكىلدەرى وزگە ۇسىنىستارىن ورتاعا سالدى.
ودان بولەك پارتيانىڭ رەسپۋبليكالىق شتابى ازاماتتاردى قابىلدادى. پارلامەنت ءماجىلىسىنىڭ دەپۋتاتتارى, «اق جول» پارتياسىنان دەپۋتاتتىققا كانديداتتار قوعامدىق قابىلداۋ بولمەسىنە كەلگەن تۇرعىنداردىڭ ءوتىنىش-تىلەكتەرىن تىڭدادى. قابىلداۋعا كەلگەندەردىڭ كوبى جەكە ماسەلەلەرىن كوتەردى.
دەپۋتات ەرلان بارلىباەۆقا گازداندىرۋ ماسەلەسى بويىنشا نۇر-سۇلتان قالاسى ن.احمەتبەكوۆ جانە ءو.جانىبەك كوشەلەرىنىڭ تۇرعىندارى اتىنان م.راحىمعۇلوۆ جۇگىندى. تۇرعىنداردى جۇمىستىڭ باياۋ ءجۇرىپ جاتقانى الاڭداتقان ەكەن. ولار جەرگىلىكتى بيلىكتىڭ ءتيىستى باقىلاۋدى جۇرگىزبەي, گازداندىرۋدى اياقتاۋعا قىزىعۋشىلىق تانىتپاي وتىرعانىنا شاعىمداندى.
قاراعاندى قالاسىنىڭ تۇرعىنى م.مىرزاحانوۆا دەپۋتات دانيا ەسپاەۆاعا وتباسىنىڭ قارىزدارى بويىنشا جۇگىندى. قازىرگى ۋاقىتتا بارلىق تابىس نەسيەلەردى وتەۋگە جۇمسالادى, ال وتباسىنىڭ ءومىر سۇرۋىنە اقشا جەتپەيدى ەكەن. ال ميكروكرەديتتىك ۇيىمدار قارىزداردى وتەۋ شارتتارىن قايتا قاراستىرماي وتىر. «جەكە تۇلعالاردىڭ بانكروتتىعى تۋرالى زاڭ بولعان جاعدايدا مۇنداي پروبلەما سونشالىقتى وتكىر بولماس ەدى. مۇنداي جاعدايدا بانكروتتىقتى باسقارۋشىلار تابىستى پروپورتسيونالدى تۇردە بولەر ەدى: 50% – كرەديتتەردى وتەۋگە, 50% – وتباسىنىڭ تۇرمىس-تىرشىلىگىنە. مۇنداي وتىنىشتەر, اسىرەسە پاندەميا كەزەڭىندە كوبەيىپ كەلەدى. ءبىزدىڭ پارتيا قاتارداعى ازاماتتاردىڭ مۇددەلەرىن قورعاۋ بويىنشا جۇمىستى جالعاستىرادى. ءبىز جەكە تۇلعالاردىڭ بانكروتتىعى تۋرالى زاڭنىڭ قابىلدانۋى ءۇشىن قولىمىزدان كەلگەننىڭ ءبارىن جاسايمىز. «اق جول» پارتياسى مۇنداي زاڭ جوباسىنا باستاماشى بولدى, بىراق وكىنىشكە قاراي, قولدانىسقا ەنبەدى», دەپ اتاپ ءوتتى د.ەسپاەۆا.
دەپۋتات مەرۋەرت قازبەكوۆاعا تۇرعىن ءۇي ماسەلەسىمەن استانا تۇرعىنى رايحان كامالوۆا كەلدى. ونىڭ ايتۋىنشا, تۇرعىن ءۇي كەزەگىنە تۇرا الماي كەلەدى. سەبەبى تۇرعىننىڭ زەينەتاقىسى ەڭ تومەنگى كۇنكورىس دەڭگەيىنەن جوعارى. «پارتيا ءتيىستى ينستانتسيالارعا رەسمي تۇردە جۇگىنەتىن بولادى. سودان كەيىن ءبىز وسى ماسەلە بويىنشا, ونىڭ ىشىندە مەملەكەتتىك باعدارلامالار كريتەريلەرى بويىنشا انىقتىقتى ەنگىزۋ ءۇشىن مەملەكەتتىك ورگانداردىڭ وكىلىن كەزدەسۋگە مىندەتتى تۇردە شاقىرامىز», دەپ اتاپ ءوتتى م.قازبەكوۆا.
دەموكراتيالىق پارتيانىڭ زاڭ قىزمەتى كەلىپ تۇسكەن بارلىق وتىنىشتەردىڭ قارالاتىنىن ايتىپ سەندىردى. ءتيىستى قۇرىلىمدارعا حاتتار جىبەرىلەدى, سونداي-اق بۇل ماسەلەلەر پارتيانىڭ الداعى جۇمىسىندا قاراستىرىلاتىن بولادى.
