* * *
ءان ونەرىندە جاڭا تۋعان جۇلدىز قاراقات باشانوۆا 29 قاراشادا وتكەن بالالار اراسىنداعى Junior Eurovision-2020 كونكۋرسىندا 2-ورىن يەلەندى. ول ءان بايقاۋىندا اكەسىنە ارناپ «Forever» (ماڭگىلىك) ءانىن ورىندادى. ءانشىنىڭ باعىن اسىرعان ادەمى ءان دەسەك, اتالعان ءاننىڭ اۆتورى – كومپوزيتور, مۋزىكالىق پروديۋسەر حاميت شاڭعاليەۆ. ونلاين كونكۋرستا قاراقاتتىڭ ساحنالىق كەلبەتىن ستيليست اناربەك جاردەموۆ ازىرلەدى. ال ساحنالىق كورىنىستەردىڭ رەجيسسەرى – اندرەي حۆان.
* * *
پاۆلودار وبلىسىنداعى اقسۋدىڭ تۋماسى, وتانداسىمىز يمانبەك تانىمال امەريكالىق گرەممي سىيلىعىنىڭ ۇزدىك رەميكس (Best Remixed Recording) اتالىمى بويىنشا 5 ۇمىتكەردىڭ ءبىرى رەتىندە تاڭدالدى. ارنايى مۋزىكالىق ءبىلىمى جوق تەمىرجولشى جىگىت جايىندا الەمنىڭ بەلدى باسىلىمدارى جارىسا جازدى. اتاۋلى سىيلىقتىڭ جەڭىمپازدارى قاڭتاردىڭ 31-ءى كۇنى انىقتالعانشا يمانبەككە تىلەۋلەس جانداردىڭ قاتارى كوپ.
...ديزاينەرى
ابزال يسابەكوۆ – ءسان الەمىندە ايتۋلى جەتىستىككە جەتكەن قازاقستاندىق. ءسان يندۋسترياسىنا ءوزىنىڭ ەرەكشە قولتاڭباسىمەن كەلگەن ول شەتەلدەردە تۋعان ەلىن تانىتىپ ءجۇر. جاس ديزاينەر ايگىلى Louis Vuitton, Celine سىندى تانىمال ءسان ۇيلەرىندە جۇمىس ىستەگەن. ءوزىنىڭ ايتۋىنشا, بيىك جەتىستىكتەرگە جەتۋىنە اناسى مەن اپكەسىنىڭ ارتقان سەنىمى مەن كورسەتكەن قولداۋى قاناتتاندىرعان.
...انيماتسياسى
«مۇزبالاعىمىز» مۇزجارعىش كەمەدەي شەتەلدىك كينو ءوندىرىسىنىڭ مۇحيتىندا ەركىن ءجۇزىپ, وتاندىق مادەني اينالىمىمىزعا ولجا سالعان جىل تابىسى دەسەك بولادى. الدىندا العان ايتۋلى بايگەلەرىن كەشە تاعى ەسەلەپ, ىستانبۇلدا 100 ءفيلمنىڭ ىشىنەن توپ جارىپ, قارا ءۇزىپ شىقتى. قازاقتىڭ بايىرعى عۇرپىن دارىپتەگەن ءمۋلتفيلمنىڭ كورەرمەنگە رۋحاني دارۋمەن سىيلارى ءسوزسىز. ۇزاقتىعى 65 مينۋت قۇرايتىن مۋلتفيلم 2D جانە 3D فورماتىندا جاسالعان جانە ءار سەكۋندىندا 24-25 كادر سۋرەت سالىنعان. كىشكەنتاي بۇلدىرشىندەردىڭ عانا ەمەس, ۇلكەندەردىڭ دە قىزىعۋشىلىعىن وياتقان كينوكارتينا ەلىمىزدە بۇرىن-سوڭدى بولماعان قوشەمەتكە يە بولدى. بۇل جاڭعىرۋ جولىنداعى جاڭا باستاما.
كارتينا رەجيسسەرلەرى – تۇردىبەك مايدان مەن تىلەك تولەۋعازى.
...كارتيناسى
«يادروسىز بولاشاق ءۇشىن» سىيلىعىنىڭ يەگەرى, قوس قولسىز قىلقالام شەبەرى اتانعان كارىپبەك كۇيىكوۆتىڭ «42500» تۋىندىسى كوپشىلىكتىڭ ىستىق ىقىلاسىنا يە بولدى. الەۋمەتتىك جەلىنىڭ اۋەنىنە توڭكەرىلگەن حالىق اۋەلدە «مەملەكەتتىك جاردەماقى جەتپەگەن» دەپ دۇرسە دولبارلاعانىمەن, ارتىنان سۋرەت يەسى كارتينانىڭ تاريحىن باسقاشا باياندادى.
«مەنىڭ اۋزىممەن تىستەپ شەلەكپەن سۋ تاسىعانىم ەسىمدە. انام تاڭەرتەڭ تۇرىپ, ماعان قارايتىن. سول كوزقاراس قاتتى جانىما باتاتىن. باسقا دا انالار سەكىلدى سيىرلاردى شىعار, اتتاقىردى تازالا, انانى ىستە دەپ ايتقىسى كەلەدى. بىراق ولاي ايتا المايدى. امالسىز ءوزى ىستەۋگە تۋرا كەلەدى. بۇل كارتينادا تاۋلاردى, ەگىندىبۇلاقتىڭ كوركەم تابيعاتىن كورسەتكىم كەلدى. ءبىزدىڭ تۋرا وسىنداي سيىرىمىز بار-تىن. سيىردى ورىسكە ايدايتىنمىن. سول كەزدەگى ەستەلىكتەر قولىما قىلقالام الۋعا يتەرمەلەدى. بۇل – مەن ءۇشىن وتە ىستىق سۋرەت», دەدى ك.كۇيىكوۆ.
قاسيەتتى ءوڭىر قارقارالىنىڭ كوركەم تابيعاتىن كوز الدىنا اكەلەتىن اسەم كارتيناعا قىزىعۋشىلاردىڭ قاتارى كوپ بولعان. تۋىندىسىن 42500 تەڭگەگە باعالاعان سۋرەتشى ەڭبەگىنىڭ ەل اراسىنا ۇلكەن سۇرانىسقا يە بولعانىنا ءدان ريزا. «مەنىڭ وتباسىم جوق. جۇرەكتەن شىققان تۋىندىلارىم – مەنىڭ بالام سەكىلدى. مەن ومىردەن وتكەن سوڭ ارتىمنان قالاتىن مۇرا وسىلار», دەيدى ومىرگە قۇشتار قىلقالام شەبەرى.
...ايتىسى
قاسىرەتتىڭ بۇلتىن تۇرگەن كۇن راۋاندادى. ول – شۇعىلاسىن التى الاشتىڭ اسپانىنان توككەن تاۋەلسىزدىك تاڭى ەدى. ونى جىرعا قوسىپ, ويىنداعىسىن اشىپ, سايىن دالانىڭ ساعىم جۇزگەن كەلبەتىنەن سىر اۋلاعان الاش بالاسىنىڭ ماڭدايىنا جازىلعان باقىت. سول ماۋەلى مەرەكەنىڭ قارساڭىندا ءداستۇرلى تۇردە ۇيىمداستىرىپ كەلە جاتقان, بيىل «اباي تاعىلىمى – تاۋەلسىزدىكتىڭ تىرەگى» اتتى تاقىرىپقا ارقاۋ بولعان رەسپۋبليكالىق اقىندار ايتىسىندا سىر سۇلەيى مۇحتار نيازوۆ ءۇشىنشى مارتە «التىن دومبىرانى» قانجىعاسىنا بايلادى. وسىلايشا مۇراجايدان ءارى اسپاعان كيەلى كادەنى ۇيىنە الىپ قايتتى.
ءتىلىنىڭ تىكەنى بار, ءسوز قاعىستىرعاندا اقيقاتتىڭ الداسپانىن جارقىلداتىپ, تىڭدارماننىڭ قۇلاق قۇرىشىن قاندىرعان مۇحتار نيازوۆ پەن بەكارىس شويبەكوۆ ويدىم-ويدىم ويى, تاپقىر تەڭەۋىمەن ەل كوڭىلىن باۋراپ الدى. ەكەۋارا ءسوز قاعىستىرۋ ارقىلى بۇگىنگى قوعامنىڭ كەمشىلىكتەرىن تىلگە تيەك ەتىپ, وتكىر ازىلمەن تىڭدارماندى ۇيىتا بىلگەن بەلگىلى شايىرلار, ابىزدىڭ عيبراتتى عۇمىرىن دا ولەڭمەن ورنەكتەي ءبىلدى. شىمىر شۋماق پەن تاپقىر ءازىلدى ورايلاستىرىپ, قازاقتىڭ جانى بولعان ايتىس كوشىن ورگە سۇيرەدى.
...فوتوسى
ەل فوتوگرافتارىنىڭ بيىلعى باستى نىساناسى كارانتيندەگى حالىقتىڭ حال-احۋالى بولعانى ايتپاسا دا بەلگىلى. الەۋمەتتىك جەلىدە قارشا بوراعان ۆيرۋسپەن جان الىسقان دارىگەرلەر مەن جانىن شۇبەرەككە تۇيگەن سىرقاتتاردىڭ سىرتتان تۇسىرگەن فوتولارى كوپتىڭ كوڭىلىن قۇلازىتتى. بۇل قۇلازۋ «ساقتىقتا قورلىق جوق» دەگەن قاعيدانى ەسكە قايتا سالعانداي بولدى. جاھاندىق ىندەتپەن جانىن سالىپ كۇرەسكەن مەديتسينا ماماندارىنا وبەكتيۆتەن قاراعان فوتوگرافتاردىڭ قاي-قايسىسىنىڭ ەڭبەگىن جوعارى باعالاۋعا بولاتىنداي. بەتپەردە تاققان حالىقتىڭ ۇرەيلى كۇيى, جانارداعى الاڭى, وقشاۋ ءومىر سۇرۋگە دەگەن كوزقاراسى, قورقىنىشى ۇيلەسىم تاپقان فوتولاردىڭ ءبارىن وتكەن جىلدىڭ ۇزدىكتەرىنە جاتقىزۋعا بولادى. حالىقارالىق ساراپشىلاردىڭ دەنى وسى نۇسقانى تاڭداۋدا. سەبەبى ونلاين ومىرگە ەتى ۇيرەنبەگەن ادامداردىڭ ارەكەتى كامەرانىڭ الدىندا قىزىق تا, قيلى كورىنەدى.
ايا ءومىرتاي,
مۇحتار كۇمىسبەك,
«Egemen Qazaqstan»
