بۇگىندە وسى قاۋىپتى, كەلەڭسىز قۇبىلىسپەن كۇرەستىڭ الدىڭعى شەبىنە بۇكىل قوعامنىڭ كۇش-جىگەرىن بىرىكتىرۋ ارقىلى ازاماتتاردىڭ سىبايلاس جەمقورلىققا قارسى مادەنيەتىن قالىپتاستىرۋعا باعىتتالعان ىمىراسىز ءىس-قيمىل جۇزەگە اسىرىلۋدا. بۇل جەردە ۇلكەن ءۇمىت جاس ۇرپاققا جۇكتەلەدى. ناق وسى جاستار سىبايلاس جەمقورلىقتان ازات قوعام قۇرۋعا جانە مەملەكەتىمىزدىڭ وركەندەۋىن قامتاماسىز ەتۋگە قابىلەتتى اعا ۇرپاقتىڭ مۇراگەرلەرى بولۋى ءتيىس.
جاس قازاقستاندىقتاردىڭ الدىندا كاسىبي ءوسۋ مەن ءوز كۇش-جىگەرىن اشۋعا ۇلكەن مۇمكىندىكتەر بار. الايدا ءبىرىنشى كەزەكتە, قازىرگى زامانعى جاستاردىڭ جەكە باسىنىڭ بەرىك ادامگەرشىلىك نەگىزدەرى, ازاماتتىق ۇستانىمى جانە سىبايلاس جەمقورلىققا قارسى مىنەز-قۇلىقتىڭ ورنىقتى داعدىلارى بولۋى ءتيىس. بۇل قاسيەتتەر بولماسا, باسەكەگە قابىلەتتى جانە دامىعان مەملەكەت قۇرۋ وڭاي بولمايدى.
حالقىمىزدا «تاربيە – تال بەسىكتەن» دەگەن ەستى ءسوز بار. بالانى تاربيەلەۋ شىنىمەن بەسىكتەن باستالادى. ول دۇنيەگە كەلگەن ساتتەن باستاپ ادام قوعامنىڭ ءبىر بولىگىنە اينالادى. ونىڭ ودان ءارى دۇنيەتانىمى مەن قوعامداعى مىنەز-قۇلقى ونىڭ وتباسىندا, بالاباقشادا, مەكتەپتە جانە ۋنيۆەرسيتەتتە الاتىن بارلىق ءبىلىمى مەن تاجىريبەسى وعان قانشالىقتى دۇرىس بەرىلەتىنىنە بايلانىستى. سوندىقتان قازىردىڭ وزىندە وسكەلەڭ ۇرپاقتىڭ بويىندا پاراساتتىلىق يدەولوگياسىن ىلگەرىلەتۋگە نەگىزدەلگەن سىبايلاس جەمقورلىقتى مۇلدەم قابىلداماۋ مادەنيەتىن قالىپتاستىرۋ وتە ماڭىزدى.
پاراساتتىلىق – قوعامداعى ساياسي, سونداي-اق الەۋمەتتىك جانە ەكونوميكالىق تۇراقتىلىقتىڭ نەگىزى. ول ادالدىق, ادىلدىك, ساتىلماۋشىلىق, زاڭعا قۇرمەت, پاتريوتيزم سياقتى قۇندىلىقتاردى بىرىكتىرەدى. پاراساتتى قوعامدا ازاماتتار ەرەجەلەردى وزدەرى ءۇشىن ەمەس, ورتاق يگىلىك ءۇشىن ۇستانادى, جەكە ەمەس, قوعامدىق مۇددەلەرگە باسىمدىق بەرەدى.
وتكەن جىلدىڭ سوڭىندا قابىلدانعان زاڭنامالىق تۇزەتۋلەرگە سايكەس دەپارتامەنت ءبىلىم بەرۋ, اقپاراتتىق جانە ۇيىمداستىرۋ شارالارىن ىسكە اسىرۋ جولىمەن قوعامدا, ونىڭ ىشىندە جاس ۇرپاق اراسىندا پاراساتتىلىق قاعيداتتارىن بەلسەندى ەنگىزۋدە. وسى تۇرعىدا ءبىز وبلىستىڭ ءبىلىم بەرۋ مەكەمەلەرىمەن بىرلەسىپ جۇيەلى نەگىزدە «ادالدىق الاڭى» جوباسىنىڭ اياسىندا ءتيىستى جۇمىس جۇرگىزىپ جاتىرمىز. جىل باسىندا دەپارتامەنت «اقمولا – ادالدىق الاڭى» جوبالىق كەڭسەسى جانە ءوڭىردىڭ جوعارى وقۋ ورىندارى اراسىندا ءبىلىم بەرۋ جۇيەسى ارقىلى سىبايلاس جەمقورلىقتى جاپپاي قابىلداماۋدى قالىپتاستىرۋعا باعىتتالعان «سانالى ۇرپاق» جوباسىن بىرلەسىپ ىسكە اسىرا وتىرىپ, ىنتىماقتاستىق تۋرالى ۇشجاقتى مەموراندۋمعا قول قويىلدى.
وسكەلەڭ ۇرپاق اراسىندا جوعارى ادامگەرشىلىك پەن پاراساتتىلىقتى قالىپتاستىرۋ ماقساتىندا وقۋ ورىندارىندا 551 «ادال ۇرپاق» جانە 37 «سانالى ۇرپاق» ەرىكتى كلۋبتارى جۇمىس ىستەيدى. وسى بىرلەستىكتەردىڭ قىزمەتى شەڭبەرىندە سىبايلاس جەمقورلىققا قارسى ءتۇرلى دەباتتار, كەزدەسۋلەر, ترەنينگتەر, سۋرەت كونكۋرستارى, اكتسيالار, چەللەندجدەر, برەين-رينگتەر, الەۋمەتتىك ساۋالنامالار جانە باسقا دا ءىس-شارالار ۇنەمى ۇيىمداستىرىلادى.
بيىل ەپيدەميالىق جاعداي احۋالىندا وبلىستىڭ بەلسەندى جاستارى اراسىنان شىققان ەرىكتى كلۋبتار وكىلدەرىنىڭ جىل سايىنعى وبلىستىق سلەتىن وتكىزۋ ونلاين فورماتتا جۇرگىزىلدى. وعان 200-گە جۋىق وقۋشىلار مەن ستۋدەنتتەر قاتىستى. شارانىڭ باعدارلاماسى سىبايلاس جەمقورلىقتىڭ الدىن الۋ جانە قوعامنىڭ سىبايلاس جەمقورلىققا قارسى مادەنيەتىن قالىپتاستىرۋدىڭ وزەكتى ماسەلەلەرىن تالقىلاۋعا ارنالدى.
سونداي-اق مەكتەپ وقۋشىلارى, كوللەدجدەر مەن جوعارى وقۋ ورىندارى ستۋدەنتتەرى ءۇشىن تەلەارنالار مەن الەۋمەتتىك جەلىلەردە تانىمال تۇلعالاردىڭ رۋحاني مۇراسىن تانىمال ەتۋ ارقىلى ادامگەرشىلىك قۇندىلىقتار مەن ءبىلىمدى سىڭىرۋگە باعىتتالعان «ادالدىق ساعاتتارى» بەينە-دارىستەر تاراتىلادى.
ۆولونتەرلەر جىلى اياسىندا وبلىس اكىمى ەرمەك مارجىقپاەۆتىڭ قاتىسۋىمەن وتەتىن «بىرگەمىز» ەرىكتىلەردىڭ وبلىستىق باس قوسۋىندا ءسوز سويلەي وتىرىپ, مۇقتاج جاندارعا تەگىن كومەك جانە قامقورلىق كورسەتىپ, قۇشتارلىعى بار جاستاردىڭ «ىزگىلىك ەلشىلەرى» ءرولىن اتقاراتىنىن اتاپ ءوتتىم. ويتكەنى جاڭا بۋىنداعى ازاماتتاردى گۋمانيزم, مەيىرىمدىلىك جانە جاناشىرلىقپەن تاربيەلەۋ پاراساتتىلىق يدەولوگياسىنىڭ ىرگەلى نەگىزدەرىنىڭ ءبىرى.
جاستار مەملەكەتتىڭ سىبايلاس جەمقورلىققا قارسى ساياساتىن جەتىلدىرۋ بويىنشا ءوز يدەيالارى مەن ۇسىنىستارىن ەنگىزۋى ءۇشىن دەپارتامەنت بەلسەندىلەرمەن بىرلەسىپ «يدەيالار فابريكاسىن» ۇيىمداستىرۋدا, وندا ينتەراكتيۆتى فورماتتا سىبايلاس جەمقورلىققا قارسى كۇرەس ماسەلەلەرى جانە ولاردى شەشۋ جولدارى تالقىلانادى, ستۋدەنتتەر سىبايلاس جەمقورلىقسىز قوعام قۇرۋ جونىندەگى جوبالاردى ۇسىنادى.
جاس ۇرپاقتىڭ بويىندا قۇندىلىقتىڭ دۇرىس باعىتتارى مەن باعدارلارىن قالىپتاستىرۋعا ءوز بالالارى مەن جاقىندارىنىڭ جارقىن بولاشاعى ءۇشىن ازاماتتاردى پاراساتتى ءومىر سالتىنا شاقىراتىن سىبايلاس جەمقورلىققا قارسى سيپاتتاعى الەۋمەتتىك بەينەروليكتەر دە كومەكتەسەدى.
قازىرگى وسكەلەڭ ۇرپاق – بۇل ءبىزدىڭ بولاشاق زاڭگەرلەرىمىز, دارىگەرلەر, مۇعالىمدەر, قۇرىلىسشىلار, اسكەري قىزمەتشىلەر جانە ولاردىڭ ءوز سالاسىندا قانشالىقتى ساۋاتتى مامان بولاتىندىعى, كوبىنەسە ۇلگى بولۋعا ءتيىس اعا ۇرپاققا بايلانىستى.
ادىلەتتىلىك, پاراساتتىلىق جانە سەنىم ەلىمىزدىڭ ءاربىر جاس ازاماتى ءۇشىن باستى قۇندىلىقتار بولاتىنىنا سەنىمىم مول.
مۇرات تولەۋباەۆ,
سىبايلاس جەمقورلىققا قارسى ءىس-قيمىل اگەنتتىگىنىڭ اقمولا وبلىسى بويىنشا دەپارتامەنتىنىڭ باسشىسى
