وڭىردەگى كەنتاۋ قالاسىنا قاراستى 12 اۋىلدىق وكرۋگى اۋماعىنان جاڭا اۋدان قۇرىلدى. ەلەۋلى وقيعانى ەل قۇلاعىنا جەتكىزۋ ءۇشىن وبلىس اكىمى ومىرزاق شوكەەۆ كەنتاۋ قالاسىنا ارنايى كەلىپ, تۇرعىندارمەن جۇزدەستى.
«بۇگىن ءبىز وزدەرىڭىزبەن ۇلكەن تاريحي وقيعانىڭ كۋاگەرى بولىپ وتىرمىز. كەنتاۋ قالاسىنداعى ەلدى مەكەندەردىڭ دامۋىنا قانشا كوڭىل بولگەنىمەن, ء ارى قاراي دامىتۋ باعىتتارى مەنى كوپتەن بەرى تولعاندىرىپ جۇرگەن ماسەلەلەردىڭ ءبىرى بولاتىن. بۇلاي دەيتىن سەبەبىم, كەنتاۋ قالاسى شەكاراسىنىڭ كەڭەيۋى, تۇرعىندار سانىنىڭ ەكى ەسەگە ارتۋى, 12 اۋىلدىق وكرۋگتىڭ كەنتاۋ قالاسىندا ورنالاسۋى قالا دەڭگەيىن اۋداندىق دەڭگەيگە كوشكەنىن كورسەتىپ وتىر. بۇل ءوز كەزەگىندە تۇرعىندار ءۇشىن كورسەتىلەتىن مەملەكەتتىك قىزمەت ساپاسىنىڭ تومەندەۋى, ەلدى مەكەندەردەگى ينفراقۇرىلىم جۇيەلەرىمەن از قامتىلۋى, قالا ورتالىعىنىڭ اۋىلدىق ەلدىمەكەندەردەن شالعايدا ورنالاسۋى, سونداي-اق, كەنتاۋ قالاسى ءوز تاريحىندا پوليمەتالل رۋداسىن وندىرەتىن ونەركاسىپتىك قالا رەتىندە دامىعاندىعىن ەسكەرسەك, كەنتاۋدىڭ اۋداندىق ورتالىققا اينالۋى ءىس جۇزىندە قالا دامۋىنىڭ باياۋلاۋىنا جانە اۋىلعا جەتكىلىكسىز كوڭىل بولىنۋىنە اكەلۋى مۇمكىن. جوعارىدا ايتىلعان ماسەلەلەردى وي ەلەگىنەن وتكىزىپ, سارالاي كەلە, قازىرگى قالىپتاسقان احۋال نازارعا الىندى. جاڭادان قۇرىلاتىن اۋدانعا «ساۋران» اتاۋىن بەرىپ, ورتالىعى ەتىپ «شورناق» ەلدىمەكەنىن بەكىتۋدى ورىندى دەپ سانايمىن», دەدى وبلىس اكىمى.
جاڭا قۇرىلاتىن اۋدانعا «ساۋران» اتى بەرىلەدى. ويتكەنى ورتاعاسىرلىق تاريحي ساۋران قالاسى ۇلى جىبەك جولىنىڭ بويىندا ورنالاسقان جانە ەجەلگى تۇركىستان ۇعىمىمەن بايلانىستى. شورناق ەلدى مەكەنى جاڭا اۋداننىڭ اكىمشىلىك ورتالىعى بولىپ قالىپتاسپاق.
