كەزدەسۋ بارىسىندا ر.توقسەيىتوۆا مەن ف.ابىتاەۆ «اۋىل» پارتياسىنىڭ سايلاۋالدى باعدارلاماسى تۋرالى ايتىپ, «ازىق-ت ۇلىك قاۋىپسىزدىگى تۋرالى» زاڭ جوباسىنا توقتالدى. «اۋىلدىقتاردىڭ» ايتۋىنشا, ەكسپورتتى يگەرۋگە ۇمتىلاتىن كەز كەلگەن وتاندىق كاسىپورىن ەلدىڭ ىشكى جالپى ءونىمىنىڭ وسۋىنە ىقپال ەتەدى. ال بۇل ءوز كەزەگىندە ۇلتتىق ۆاليۋتا مەن ينفلياتسيا دەڭگەيىن تۇراقتاندىرا تۇسەدى.
«ازىق-ت ۇلىك قاۋىپسىزدىگى تۋرالى» زاڭ جوباسىن قابىلداۋ اۋىل شارۋاشىلىعى ونىمدەرىنىڭ ەكسپورتىن دامىتۋدى بەلسەندى ىنتالاندىرۋدى جانە قوماقتى قولداۋ كورسەتۋدى كوزدەيدى.
كانديدات ف.ابىتاەۆ ستاتيستيكالىق مالىمەتتەرگە توقتالىپ, ورامدى ويىن ءبىلدىردى. ماسەلەن, 2011 جىلمەن سالىستىرعاندا 2019 جىلى قازاقستاننىڭ ەكسپورت كولەمى 84 ملرد-تان 58 ملرد اقش دوللارىنا دەيىن تومەندەدى. وسى كەزدە اگروونەركاسىپ كەشەنى ونىمدەرىنىڭ ەكسپورتى 1,8 ملرد-تان 3,2 ملرد اقش دوللارىنا دەيىن (نەمەسە ەكسپورتتىڭ جالپى قۇرىلىمىنداعى ۇلەستىڭ 5,65%-ى) تۇراقتى ءوسىپ وتىردى. مۇنداي سالىستىرۋ اۋىل شارۋاشىلىعىنىڭ ءونىمى الەمدىك نارىقتا ءاردايىم سۇرانىسقا يە بولاتىنىن جانە اگروونەركاسىپ كەشەنىنىڭ ەكسپورتتىق الەۋەتىن دامىتقان جاعدايدا قازاقستان ايقىن جولعا تۇسە الاتىنىن بايقاتادى.
اۋىل شارۋاشىلىعى ونىمدەرىنىڭ ەكسپورت كولەمى ارتقانىنا قاراماستان, اگروونەركاسىپ كەشەنىندەگى قىزمەتكەرلەردىڭ ورتاشا ايلىعى وتە تومەن (301,4 اقش دوللارى). بۇل كورسەتكىش قازاقستانداعى 2010-2019 جىلدارداعى ورتاشا ايلىق جالاقىمەن سالىستىرعاندا 38,2-53%-عا تومەن. پارتيا بۇل جاعدايدى ەكسپورت كولەمىنىڭ جەتكىلىكسىزدىگىمەن بايلانىستىرادى. اگرارلىق سالانى يگەرگەن الەمدەگى جەتەكشى ەلدەردە ءونىم 20%-دان باستاپ, 40%-عا دەيىن ەكسپورتتالادى. ال بىزدە بۇل كورسەتكىش 6%-دان از. ماسەلەن, اۋىل شارۋاشىلىعى كاسىپورىندارى مەن تۇراقتى ەكسپورتپەن اينالىساتىنداردى الىپ قارايىق. شارۋاشىلىقپەن ەمەس, ەكسپورتپەن اينالىساتىنداردىڭ جالاقى كولەمى 17%-عا جوعارى.
بۇل كەزدەسۋدەن كەيىن ۇگىت-ناسيحات توبى اباي كەسەنەسىنە باردى. كانديداتتار اقىن رۋحىنا تاعزىم ەتىپ, كەمەڭگەردىڭ ءومىر جولىنا توقتالدى. اتالعان ءىس-شارا ۇلى اقىننىڭ 175 جىلدىعىنا ورايلاستىرىلدى.
– اباي – حالىق بىرلىگى يدەياسىنىڭ بەلسەندى جاقتاۋشىسى بولدى. ونىڭ شىعارمالارى ەلىمىزدىڭ عانا ەمەس, الەمنىڭ مادەني مۇراسىنىڭ دامۋىنا ۇلكەن ۇلەس قوسادى. اباي قۇنانباي ۇلى ارقاشان ۇلتتى بىرىكتىرۋگە جانە ءادىل قوعام قۇرۋعا ۇمتىلعان بولاتىن. «اۋىل» پارتياسى دا وسىنداي قاعيدانى ۇستانادى, – دەيدى ر.توقسەيىتوۆا.
سونداي-اق وسى پارتيانىڭ اتىنان پارلامەنت ءماجىلىسىنىڭ دەپۋتاتتىعىنا كانديداتتار ت.راقىمبەكوۆ جانە ز.الىپبەك باس رەداكتورلار كلۋبىنىڭ مۇشەلەرىمەن ونلاين-رەجىمدە كەزدەسۋ وتكىزدى. كەزدەسۋدە اۋىلدى دامىتۋ ماسەلەلەرىن باق-تا جاريالاۋ ماسەلەلەرى تالقىلاندى. بۇدان بولەك قوستاناي وبلىسىندا اتالعان پارتيا اتىنان وبلىستىق ءماسليحات دەپۋتاتتىعىنا كانديداتتار اگروونەركاسىپ كەشەنى سالاسىنداعى جەتەكشى كاسىپكەرلەرمەن ونلاين كەزدەسۋ وتكىزىپ, ولارعا پارتيانىڭ سايلاۋالدى باعدارلاماسىن تانىستىردى. ال اقمولا وبلىسىندا پارتيانىڭ اتىنان وبلىستىق جانە اۋداندىق ءماسليحاتتار دەپۋتاتتىعىنا كانديداتتار «Kaz Tech سەلماش» جشس ۇجىمىمەن كەزدەستى.
