بۇعان دەيىن مينيستر ءۇشىنشى توقساننان باستاپ ۇبت جانە مەملەكەتتىك ەمتيحان تاپسىراتىن پاندەر ءداستۇرلى فورماتتا وقىتىلاتىنىن ءمالىم ەتكەن ەدى.
اسحات ايماعامبەتوۆ مينيسترلىكتىڭ اپپارات وتىرىسىندا: «اسىرەسە ۇبت جانە مەملەكەتتىك ەمتيحان تاپسىراتىن پاندەر, سونىمەن قاتار قيىندىق تۋدىرىپ وتىرعان پاندەر دە ءداستۇرلى فورماتتا وقىتىلادى. سوندىقتان بۇل ماسەلە بويىنشا ساباق كەستەسىنە دەيىن ادىستەمەلىك ۇسىنىمداردى دايىنداپ, بۇگىن جىبەرەمىز. ءۇشىنشى توقساننان باستاپ تالقىلانعان ءتارتىپ بويىنشا جۇمىس جۇرگىزەمىز», دەپ ايتىپ ءوتتى.
بۇگىنگى ءباسپاسوز ءماسليحاتىندا مينيستر بۇل وتە ماڭىزدى شەشىم ەكەنىن جانە بۇل وقۋ ءتارتىبى مەملەكەتتىك ەمتيحان تاپسىراتىن بالالارعا دا تىكەلەي قاتىستى ەكەنىن باسا ايتتى.
"مەكتەپ تۇلەكتەرى جايلى ايتىپ وتىرمىن. ولارعا ءبىلىم الۋدىڭ ماڭىزى وتە زور. سول سەبەپتى ءبىز وقۋشىلاردىڭ 70 پايىزى ءداستۇرلى فورماتتا, ال 30 پايىزى قاشىقتان وقيتىنىن ايتىپ وتىرمىز. اسىرەسە ۇلتتىق بىرىڭعاي تەستىلەۋگە بايلانىستى پاندەر ءداستۇرلى فورماتتا وقىتىلادى. قالعانىن قاشىقتان وقىتامىز», دەدى مينيستر.
ول سونىمەن قاتار بۇل رەتتە سانيتارلىق تالاپتار قالاي ساقتالاتىنىن ايتىپ ءوتتى.
ء«بىر كابينەت بولادى. قوڭىراۋ ءارتۇرلى ۋاقىتتا سوعىلادى. الەۋمەتتىك قاشىقتىق ساقتالادى. بۇعان دەيىنگى سانيتارلىق تالاپتار كۇشىندە قالادى. وزگەرىس جوق. ءبىز ءبىلىم جانە عىلىم مينيسترلىگى رەتىندە بالالاردىڭ ءداستۇرلى فورماتتا وقۋىن قالايمىز. الايدا باسقا مەملەكەتتىك ورگانداردىڭ قۇزىرەتىنە جاتاتىن سانيتارلىق نورمالار تاعى بار», دەيدى اسحات ايماعامبەتوۆ.
