جىل سايىن وزاتتارعا «ۇزدىك جاستار پرەمياسىن» بەرۋ داستۇرگە اينالعان. بيىلعى شارا وسىمەن ونىنشى رەت ۇيىمداستىرىلىپ وتىر. بۇگىن ەل تاۋەلسىزدىگىنىڭ 29 جىلدىعىنا وراي 29 نوميناتسيا بويىنشا ۇزدىك دەپ تانىلدى.
قالا اكىمىنىڭ «ۇزدىك جاستار-2020» پرەمياسىنىڭ ەرەجەسىنە سايكەس, 14-29 ارالىعىنداعى 175 جاس بايقاۋعا قاتىسىپ, كوميسسيانىڭ شەشىمى بويىنشا 29 جاس ءوز سالاسىندا «ۇزدىك» دەپ تانىلدى.
سالتاناتتى جيىندا ءسوز العان مۇرات دۇيسەنبەك ۇلى ءوز سالاسىنىڭ ناعىز شەبەرلەرىن جەڭىسىمەن قۇتتىقتاپ, شىعارماشىلىق تابىس تىلەدى.
ء«تۇرلى سالادا ءوزىن كورسەتكەن دارىندى جاستارعا قولداۋ كورسەتۋ, جەتىستىكتەرىن ناسيحاتتاۋ, جاستاردىڭ رۋحىن كوتەرىپ ىنتالاندىرۋ ماقساتىندا بيىلعى جىلى ءداستۇرلى 10-شى رەت «ۇزدىك جاستار» پرەمياسىن وتكىزىپ وتىرمىز. مەرەكەنى وسىنداي شارامەن باستاعانىمىز بەكەر ەمەس. سەبەبى شىمكەنت – جاستاردىڭ قالاسى. قالا تۇرعىندارىنىڭ باسىم بولىگى جاستار. جاس بۋىن قاشان دا ەل نازارىندا. ەلگە قىزمەت ەتۋ تەك ءبىلىمدى عانا ەمەس, نامىستى دا تالاپ ەتەدى. جاس ۇرپاقتىڭ ار-نامىسى جوعارى بولسا, مەملەكەتىمىزدىڭ مارتەبەسى بيىك بولادى. سىزدەردى بۇگىنگى جەڭىستەرىڭىزبەن قۇتتىقتايمىن! ەلىمىزدىڭ ەرتەڭى – وزدەرىڭىز!» دەدى قالا اكىمى.
بۇگىندە شىمكەنت قالاسىندا 239 مىڭنان استام جاس بولسا, ول قالا تۇرعىندارىنىڭ 23 پايىزىن قۇراپ وتىر. جوعارى جانە ورتا ارناۋلى وقۋ ورىندارىندا 117 728 جاس ءبىلىم الاتىن بولسا ونىڭ ىشىندە 57 مىڭنان استامى تالانتتى, دارىندى جانە شىعارماشىل جاستار. سونىمەن قاتار, 37 جاستار قوعامدىق بىرلەستىكتەرى مەملەكەتتىك جاستار ساياساتىن جۇزەگە اسىرۋعا ءوز ۇلەسىن قوسىپ كەلەدى.
