الدىمەن اماندىق باتالوۆ ءوڭىردىڭ الەۋمەتتىك-ەكونوميكالىق دامۋ ەرەكشەلىكتەرىنە قىسقاشا توقتالىپ, نەگىزگى باسىم باعىتتارى جايلى باياندادى.
"الماتى وبلىسى – ەلىمىزدەگى ەڭ ءىرى ايماقتىڭ ءبىرى. جەتىسۋ ءوڭىرى ەڭ الدىمەن اگرارلىق ايماق. دەگەنمەن ونەركاسىپ سالاسى دا قازىر قارقىندى دامىپ كەلەدى. شاعىن جانە ورتا بيزنەستىڭ دە اياق الىسى جاقسى. كليماتتىق جاعدايىنىڭ جايلىلىعىنا بايلانىستى جانە ينفراقۇرىلىمىن دامىتۋ جۇمىستارىنىڭ بەلسەندى جۇرگىزىلۋىنە وراي وبلىس تۋريستەر تارتۋعا وتە قولايلى. بىزدە شارىن شاتقالى, الاكول, بالقاش, كولساي كولدەرى جانە باسقا دا كوپتەگەن تاماشا ورىندار بار. ءوڭىردىڭ تاعى ءبىر ەرەكشە بايلىعى – حالقىمىز كوپەتنوستى. بىزدە 100-دەن استام ۇلت پەن ۇلىس ءومىر سۇرەدى, سول قاتاردا كورەيلەر دە بار. ولاردىڭ ارقايسىسى ءوڭىردىڭ دامۋىنا اتسالىسىپ كەلەدى. ۇلتارالىق جانە كونفەسسياارالىق كەلىسىمدى, تاتۋلىقتى ساقتاۋ – ەلباسىنىڭ جانە پرەزيدەنتتىڭ ۇستانعان مەملەكەتتىك ساياساتىنىڭ نەگىزگى باسىمدىعى. تۇتاس العاندا بىزدە ينۆەستيتسيالىق كليمات وتە قولايلى. سوندىقتان ەكى جاقتى ىنتىماقتاستىقتى دامىتۋعا نەگىز بولاتىن ورتاق ماڭىزدى سالالار تۋرالى كەڭىنەن تالقىلاۋىمىزعا بولادى", دەدى ا. باتالوۆ.
ءوز كەزەگىندە كيم حىن سۋ جىلى قابىلداۋعا ريزاشىلىعىن ءبىلدىردى. ول ءوز سوزىندە الماتى وبلىسىندا 15 مىڭنان استام ەتنيكالىق كورەيلەر تۇراتىنىن تىلگە تيەك ەتتى. وڭىرمەن دوستىق قارىم-قاتىناستار ورناتىلعان. بۇل ورايدا مەديتسينا سالاسىنداعى ىنتىماقتاستىقتى ايتۋعا بولادى. 2018 جىلى وڭتۇستىك كورەيالىق "حيوندە" كلينيكاسى تالدىقورعان قالالىق كوپسالالى اۋرۋحاناسىمەن ءوزارا ىنتىماقتاستىق تۋرالى مەموراندۋم جاساسقان.
اڭگىمەلەسۋ بارىسىندا ەكى جاقتى بايلانىستاردىڭ نەگىزگى باعىتتارى بەلگىلەندى.
اماندىق باتالوۆ ءبىرىنشى كەزەكتە دەنساۋلىق ساقتاۋ سالاسىنداعى بايلانىستاردى ودان ءارى كەڭەيتۋدى ۇسىندى.
"بىرلەسكەن كلينيكا اشىلسا, جاقسى بولار ەدى. ونى نە تالدىقورعان وڭىرىنەن, نە الماتى وڭىرىنەن اشۋدى قاراستىرۋعا بولادى. ءبىز ءوز تاراپىمىزدان قاجەتتى قولداۋ كورسەتەمىز. وبلىس تۇرعىندارى ءۇشىن مۇنداي زامانۋي كلينيكانىڭ اشىلۋى قولايلى ءارى پايدالى بولار ەدى. ەلەكترونيكا وندىرەتىن ونەركاسىپ ورنىن قۇرۋعا بولادى. تۋريزم سالاسىندا ىنتىماقتاستىق ورناتىپ, مادەني بايلانىستار اياسىن كەڭەيتۋگە بولادى. وسى ءتورت باعىت ءبىزدىڭ ەكى جاقتى ءوزارا ءتيىمدى بايلانىستارىمىزدى ىلگەرىلەتەدى دەپ ويلايمىز", دەدى ا.باتالوۆ.
باس كونسۋل دا وبلىس باسشىسىنىڭ بۇل ۇسىنىستارى ءتيىستى لاۋازىمدى تۇلعالارعا جەتكىزىلىپ, تالقىلاناتىنىنا سەندىردى. جانە كەزدەسۋدە قوس تاراپتان كونسترۋكتيۆتى ديالوگ بولعانى ءۇشىن العىسىن ءبىلدىردى. اماندىق باتالوۆ جيىندى قورىتىندىلاپ, ىنتىماقتاستىق اياسىن ودان ءارى كەڭەيتۋگە دايىن ەكەندىگىن جەتكىزدى.
ەسكە سالساق, وڭتۇستىك كورەيالىق "حيوندە" كومپانياسىمەن 2018 جىلى مەموراندۋم جاسالعان. سول كەزدەن بەرى تالدىقورعان قالالىق كوپسالالى اۋرۋحاناسىنىڭ بازاسىندا "حيوندە" كلينيكاسىنىڭ ماماندارى قايىرىمدىلىق اكتسيالارىن وتكىزىپ ءجۇر. تراۆماتولوگيا, ورتوپەديا, حيرۋرگيا, كارديولوگيا, نەۆرولوگيا, تەراپيا, ۋزي-دياگنوستيكا باعىتتارىندا پاتسيەنتتەر قابىلداۋى جۇرگىزىلەدى. سوڭعى 2 جىلدا تالدىقورعان قالاسىندا جانە قاراتال اۋدانىندا 2700-دەي ادام تەگىن قارالعان, 1200 ادام ەم قابىلداعان, 37 وپەراتسيا جاسالىپ, دارىگەرلەر ءۇشىن 60 ماستەر-كلاسس وتكىزىلگەن. بۇل جۇمىستار كەلەسى جىلى دا جالعاستىرىلادى.
