جەر جاھاندى شارلاعان كوروناۆيرۋستىڭ كەسىرىنەن سپورتتىق سايىستاردىڭ بارلىعى دا بەلگىلەنگەن ۋاقىتىندا وتپەي قالعانى بەلگىلى. سولاردىڭ قاتارىندا وليمپيا ويىندارى مەن پاراليمپيادا دا بار. بيىل جالاۋى جەلبىرەۋگە ءتيىس ايتۋلى جارىستار كەلەسى جىلعا شەگەرىلدى. وسىنداي قولايسىزدىقتاردىڭ سالدارىنان جاپونياعا تاعى تا ءبىراز شىعىندانۋىنا تۋرا كەلەدى.
ەندى ولار بايراقتى باسەكەلەردى جوعارى دەڭگەيدە ۇيىمداستىرۋعا قاجەتتى قارجى مولشەرىن ءبىرشاما كوبەيتۋدى قۇپ كورىپ وتىر. تارقاتىپ ايتساق, سپورتتىق نىساندار مەن وليمپيادا قالاشىعىن جەتىلدىرۋگە 2,85 ميلليارد, كوروناۆيرۋستىڭ الدىن-الۋ شارالارىنا 931 ميلليون, جارىستىڭ اشىلۋ مەن جابىلۋ راسىمدەرىنە 931 ميلليون دوللار جۇمسالۋ كوزدەلۋدە. جارىسقا قاجەتتى جالپى سوممانىڭ 6,97 ميللياردىن ۇيىمداستىرۋ كوميتەتى مەن 6,787 ميللياردىن توكيو بيلىگى جاپسا, قالعان قاراجات جاپونيانىڭ بيۋدجەتى ەسەبىنەن جۇمسالادى.
سونىمەن قاتار, مارافون مەن سپورتتىق ءجۇرىس جارىستارىنىڭ توكيودان ساپپورو قالاسىنا اۋىستىرىلۋىنا بايلانىستى حالىقارالىق وليمپيادا كوميتەتى (حوك) تاراپىنان قوسىمشا 193 ميلليون دوللار بولىنەدى.
ەستەرىڭىزگە سالا كەتەيىك, وليمپيا ويىندارى 2021 جىلدىڭ 23 شىلدەسى مەن 8 تامىزى ارالىعىندا وتسە, پاراليمپيادا 24 تامىز بەن 5 قىركۇيەك ارالىعىندا ۇيىمداستىرىلادى.
