قىتاي حالىق رەسپۋبليكاسىنىڭ توراعاسى سي تسزينپين جەكە ءوزىنىڭ جانە قحر ۇكىمەتى مەن حالقىنىڭ اتىنان قاسىم-جومارت توقاەۆتى قازاقستان تاۋەلسىزدىگىنىڭ 29 جىلدىعىمەن قۇتتىقتادى.
– وتكەن جىلدىڭ قىركۇيەك ايىنداعى ءسىزدىڭ قىتايعا جاساعان مەملەكەتتىك ساپارىڭىز بارىسىندا قىتاي-قازاق قاتىناستارىنا ماڭگىلىك, جان-جاقتى ستراتەگيالىق سەرىكتەستىك مارتەبەسىن بەرۋگە ەكىجاقتى كەلىسىم جاسادىق. بۇل ەكىجاقتى ىنتىماقتاستىقتىڭ كوكجيەگىن كەڭەيتەدى. مەن قىتاي-قازاقستان قاتىناستارىن دامىتۋعا باسا ءمان بەرەمىن. سونىمەن قاتار ەكى ەلدىڭ يگىلىگى ءۇشىن بىرلەسىپ جۇزەگە اسىرىپ جاتقان ء«بىر بەلدەۋ – ءبىر جول» باعدارلاماسى اياسىندا جاڭا جەتىستىكتەرگە قول جەتكىزۋگە, ءوزارا قولداۋدى نىعايتۋعا جانە ستراتەگيالاردى تەرەڭدەتە وتىرىپ ۇشتاستىرۋعا وزىڭىزبەن بىرلەسىپ كۇش سالۋعا دايىنمىن, – دەلىنگەن قحر توراعاسىنىڭ جەدەلحاتىندا. ءسوز سوڭىندا سي تسزينپين دوستاس قازاقستاننىڭ قۋاتى ارتىپ, ءوسىپ-وركەندەۋىنە, ال حالقىنا باق-بەرەكە تىلەگەن.
جاپونيا يمپەراتورى نارۋحيتو ءوزىنىڭ قۇتتىقتاۋ حاتىندا قاسىم-جومارت توقاەۆقا قۇت-بەرەكە, قازاقستان حالقىنىڭ ءوسىپ-ونە بەرۋىنە تىلەكتەستىك بىلدىرگەن.
ساۋد ارابيا كورولى سالمان بەن ابدەلازيز ءال ساۋد جانە ساۋد ارابياسى كورولدىگىنىڭ تاق مۇراگەرى مۇحاممەد بەن سالمان ءال ساۋد قازاقستاننىڭ ودان ءارى دامىپ, گۇلدەنۋىن تىلەگەن.
ۇلىبريتانيا پاتشايىمى ءىى ەليزاۆەتا مەملەكەت باسشىسى قاسىم-جومارت توقاەۆتى تاۋەلسىزدىك كۇنىمەن قۇتتىقتادى.
– جوعارى مارتەبەلى پرەزيدەنت مىرزا, سىزدەردىڭ ۇلتتىق مەرەكەلەرىڭىزگە وراي جۇرەكجاردى قۇتتىقتاۋىمدى قابىل الىڭىز. سونداي-اق وسىنداي قيىن-قىستاۋ كەزەڭدە قازاقستان حالقىنا بار جاقسىلىقتى تىلەيمىن, – دەلىنگەن جەدەلحاتتا.
مەرەكە قارساڭىندا قازاقستان پرەزيدەنتىنىڭ اتىنا يسپانيا كورولى فەليپە, بەلگيا كورولى فيليپپ, ماروككو كورولى VI مۇحاممەد, قاتار مەملەكەتىنىڭ ءامىرى تاميم بەن حاماد ءال ءتاني, ومان سۇلتانى حايسام بەن تاريق, كامبودجا كورولى نورودوم سياموني قۇتتىقتاۋ حاتتارىن جولدادى.
وزبەكستان پرەزيدەنتى شاۆكات ميرزيوەۆ جەكە ءوزىنىڭ جانە وزبەك حالقىنىڭ اتىنان قاسىم-جومارت توقاەۆ پەن قازاقستاندىقتاردى ۇلتتىق مەرەكەمەن قۇتتىقتادى.
– قازاقستان حالقىنىڭ ءال-اۋقاتىن ارتتىرۋ جانە ەلىڭىزدىڭ حالىقارالىق ارەناداعى بەدەلىن ودان ءارى نىعايتۋ جولىنداعى جەتىستىكتەرىڭىزگە تاتۋ كورشىلەرىڭىز رەتىندە ەرەكشە قۋانامىز. اسىرەسە جاھاندىق پاندەميا جاعدايىندا ەلىڭىزدىڭ ەكونوميكالىق دامۋىن قامتاماسىز ەتۋگە جانە ونىڭ سالدارىن جويۋعا بايلانىستى قابىلداعان ءتيىمدى شارالارىڭىزعا ءتانتىمىز. سوڭعى جىلدارى ەكى ەل اراسىنداعى ءوزارا ءتيىمدى جانە ۇزاق مەرزىمدى قاتىناستاردى نىعايتۋعا باعىتتالعان بىرلەسكەن ءىس-قيمىلداردىڭ جاندانعانىن, سونداي-اق ونىڭ جاڭا دەڭگەيگە كوتەرىلگەنىن ەرەكشە اتاپ وتكىم كەلەدى, – دەلىنگەن وزبەكستان پرەزيدەنتىنىڭ جەدەلحاتىندا.
تاجىكستان پرەزيدەنتى ەمومالي راحمون تاۋەلسىزدىك كۇنىنە وراي ءوزىنىڭ جۇرەكجاردى قۇتتىقتاۋىن جىبەردى.
– ءبىز ەكى حالىق اراسىنداعى بەرىك, تاريحي بايلانىستاردى جوعارى باعالايمىز. ءوزارا كۇش جۇمىلدىرا وتىرىپ, تاجىك-قازاق ستراتەگيالىق سەرىكتەستىگىن دايەكتى, قارقىندى دامىتا الامىز دەپ سەنەمىن, – دەلىنگەن قۇتتىقتاۋ حاتتا.
تۇرىكمەنستان پرەزيدەنتى گۋربانگۋلى بەردىمۇحامەدوۆ جەكە ءوزىنىڭ جانە تۇرىكمەن حالقىنىڭ اتىنان تاۋەلسىزدىك كۇنىمەن قۇتتىقتاپ, قازاقستاننىڭ ءوسىپ-وركەندەي بەرۋىنە تىلەكتەستىك ءبىلدىردى.
تۇركيا پرەزيدەنتى رەجەپ تايپ ەردوعان قاسىم-جومارت توقاەۆتى جانە قازاقستان حالقىن تاۋەلسىزدىك كۇنىمەن قۇتتىقتاپ, تابىس تىلەگەن.
– ورتاق تاريحي, مادەني جانە باۋىرلاستىق تامىرىمىز بايلانىستىراتىن قازاقستانمەن اراداعى ستراتەگيالىق سەرىكتەستىك دەڭگەيىندەگى قارىم-قاتىناستاردىڭ جاڭا سالالاردا دا تۇرلەنىپ, باي تۇسكەنىنە قۋانىشتىمىز. قولايلى كۇنى قازاقستانعا ساپارمەن بارىپ, وزىڭىزبەن بىرگە جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ وتىرىسىنا قاتىسۋعا بەيىلدى ەكەنىمدى بىلدىرەمىن, – دەلىنگەن جەدەلحاتتا.
يران پرەزيدەنتى حاسان رۋحاني ءوزىنىڭ قۇتتىقتاۋىندا ەكى ەل اراسىنداعى قارىم-قاتىناستاردىڭ كۇشەيگەنىن, سونداي-اق, ءوزارا ىنتىماقتاستىقتى ودان ءارى دامىتۋعا الەۋەتىمىزدىڭ زور ەكەنىن جەتكىزگەن.
قازاقستاننىڭ تاۋەلسىزدىك كۇنىنە وراي قۇتتىقتاۋ جەدەلحاتتارىن موڭعوليا پرەزيدەنتى حالتمااگين باتتۋلگا, ءۇندىستان پرەزيدەنتى رام نات كوۆيند جولدادى.
كورەيا رەسپۋبليكاسىنىڭ پرەزيدەنتى مۋن چجە ين مەرەكەمەن قۇتتىقتاپ: ء«ارتۇرلى سالاداعى ىنتىماقتاستىقتىڭ ارقاسىندا ەكى ەل اراسىنداعى دوستىق بايلانىستار قارقىندى دامىپ كەلەدى. قازاقستانعا بىلتىر جاساعان ساپارىم ەكىجاقتى قاتىناستاردىڭ دامۋىنا تىڭ سەرپىن بەردى. COVID-19 پاندەمياسىنا بايلانىستى احۋال تۇراقتانعاننان كەيىن ءسىزدىڭ كورەيا رەسپۋبليكاسىنا جاسايتىن ساپارىڭىز ەكى ەل اراسىنداعى ستراتەگيالىق سەرىكتەستىكتى ودان ءارى تەرەڭدەتىپ, دامىتۋعا مۇمكىندىك بەرەدى دەپ ۇمىتتەنەمىن», دەگەن قۇتتىقتاۋ حاتىن جولداعان.
ۋكراينا پرەزيدەنتى ۆلاديمير زەلەنسكي مەملەكەت باسشىسى قاسىم-جومارت توقاەۆتى تاۋەلسىزدىك كۇنىمەن قۇتتىقتادى.
– تاۋەلسىزدىك جىلدارىندا قازاقستان رەسپۋبليكاسى ۋكراينانىڭ ورتالىق ازياداعى سەنىمدى سەرىگىنە اينالدى. تاۋەلسىز مەملەكەتتەرىمىز اراسىنداعى ەكىجاقتى ىقپالداستىق ءوزارا سەنىمگە جانە ەلدەرىمىزدىڭ ەگەمەندىگى مەن جەرىمىزدىڭ بۇتىندىگىن ساقتاۋعا نەگىزدەلىپ, ودان ءارى دامي بەرەدى دەپ سانايمىن, – دەلىنگەن جەدەلحاتتا.
سونىمەن قاتار قازاقستان تاۋەلسىزدىگىنىڭ 29 جىلدىعىنا وراي قاسىم-جومارت توقاەۆتىڭ اتىنا گرۋزيا پرەزيدەنتى سالومە زۋرابيشۆيلي, ماجارستان پرەزيدەنتى يانوش ادەر, يتاليا پرەزيدەنتى سەردجو ماتتارەللا, شۆەيتساريا پرەزيدەنتى سيمونەتتا سوممارۋگا, پولشا پرەزيدەنتى اندجەي دۋدا, فينليانديا پرەزيدەنتى ساۋلي نينيستيو, سەربيا پرەزيدەنتى الەكساندر ۆۋچيچ, يزرايل پرەزيدەنتى رەۋۆەن ريۆلين, ليتۆا پرەزيدەنتى گيتاناس ناۋسەدا, حورۆاتيا پرەزيدەنتى زوران ميلانوۆيچ, بولگاريا پرەزيدەنتى رۋمەن رادەۆ, مولدوۆا پرەزيدەنتى يگور دودون, مالتا پرەزيدەنتى دجوردج ۆەللا, سان-مارينونىڭ كاپيتان-رەگەنتتەرى الەسساندرو كاردەللي مەن ميركو دولچيني, كۋبا پرەزيدەنتى ميگەل دياس-كانەل بەرمۋدەس, ەگيپەت پرەزيدەنتى ابدەل فاتتاح اس-سيسي, پالەستينا پرەزيدەنتى ماحمۋد ابباس, وڭتۇستىك افريكا رەسپۋبليكاسىنىڭ پرەزيدەنتى ماتامەلا سيريل راماپوزا, تۋنيس پرەزيدەنتى كايس سايد, سەررا-لەونە پرەزيدەنتى دجۋليۋس ماادا بيو, ەۋرازيالىق ەكونوميكالىق كوميسسيا القاسىنىڭ توراعاسى ميحايل مياسنيكوۆيچ, شانحاي ىنتىماقتاستىق ۇيىمىنىڭ باس حاتشىسى ۆلاديمير نوروۆ, ۇجىمدىق قاۋىپسىزدىك شارتى تۋرالى ۇيىمنىڭ باس حاتشىسى ستانيسلاۆ زاس, يسلام ىنتىماقتاستىعى ۇيىمىنىڭ باس حاتشىسى يۋسەف ءال-وسەيمين, ەكونوميكالىق ىنتىماقتاستىق ۇيىمىنىڭ باس حاتشىسى حادي سۋلەيمانپۋر, بۇۇ باس حاتشىسىنىڭ ورتالىق ازيا بويىنشا ارنايى وكىلى ناتاليا گەرمان, ەۋرازيالىق دامۋ بانكىنىڭ باسقارما توراعاسى نيكولاي پودگۋزوۆ, ExxonMobil Global Projects Company پرەزيدەنتى نيل داففين, Eni كومپانياسىنىڭ باس اتقارۋشى ديرەكتورى كلاۋديو دەسكالتسي, رەسەي فەدەراتسياسى بىرلەسكەن يادرولىق زەرتتەۋلەر ينستيتۋتىنىڭ ديرەكتورى ۆيكتور ماتۆەەۆ, ەستونيانىڭ قازاقستانداعى ەلشىسى حەيتي مياەمەەس, پەنزا وبلىسىنىڭ گۋبەرناتورى يۆان بەلوزەرتسەۆ, بايقوڭىر قالاسى اكىمشىلىگىنىڭ باسشىسى كونستانتين بۋسىگين وزدەرىنىڭ قۇتتىقتاۋ حاتتارىن جولدادى.
فرانتسيا پرەزيدەنتى ەممانيۋەل ماكرون ەلىمىزدى تاۋەلسىزدىك كۇنىمەن قۇتتىقتاپ, قازاقستاننىڭ ءوسىپ-وركەندەي بەرۋىن تىلەگەن.
– بيىلعى جىل ءبىزدىڭ ەلدەرىمىزدىڭ ءبىر-بىرىنە جاقىنداي تۇسۋىمەن ەرەكشەلەندى. مەن بۇعان وتە ريزامىن. ەۋروپا وداعى مەن قازاقستان اراسىنداعى كەڭەيتىلگەن ىنتىماقتاستىق جانە سەرىكتەستىك تۋرالى كەلىسىم 2020 جىلدىڭ 1 ناۋرىزىنان باستاپ ءوز كۇشىنە ەندى, – دەپ جازادى فرانتسيا پرەزيدەنتى. سونداي-اق ول قازاقستاننىڭ بيىل ءولىم جازاسىن جويۋدى كوزدەيتىن ازاماتتىق جانە ساياسي قۇقىقتار تۋرالى حالىقارالىق پاكتىنىڭ ەكىنشى فاكۋلتاتيۆتى حاتتاماسىنا قول قويعانىن, ەكونوميكا سالاسىنداعى ىنتىماقتاستىق جونىندەگى جول كارتاسى بويىنشا جاڭا جوبالار پاندەميانىڭ كەسىرىنەن كەيىنگە شەگەرىلگەنىمەن, ونىڭ ىسكە اسىرىلۋىنا قاتىستى جۇمىستار جالعاسىپ جاتقانىن اتاپ وتكەن. سونىمەن قاتار ەممانيۋەل ماكرون ءوز قۇتتىقتاۋ حاتىندا نۇر-سۇلتان قالاسىندا فرانتسۋز ءبىلىم بەرۋ مەكەمەسىن اشۋعا بايلانىستى جوبادا ىلگەرىلەۋ بار ەكەنىن جازعان.
ازەربايجان پرەزيدەنتى يلحام اليەۆ تە تاۋەلسىزدىك كۇنىمەن قۇتتىقتاپ, جۇرەكجاردى تىلەگىن جولدادى.
– قازاقستان رەسپۋبليكاسىنىڭ مەملەكەتتىلىگىن نىعايتىپ جانە حالقىنىڭ ءال-اۋقاتىن جاقسارتىپ, الەۋمەتتىك-ەكونوميكالىق, مادەنيەت سالالارى بويىنشا دامۋى, سونداي-اق ەلىڭىزدىڭ حالىقارالىق ارەنادا ابىرويىنىڭ ارتۋى ءبىزدى قۋانتادى. ءبىزدىڭ بىرلەسكەن كۇش-جىگەرىمىزدىڭ ارقاسىندا ازەربايجان مەن قازاقستان اراسىنداعى دوستىق پەن ىنتىماقتاستىق ورىستەپ, ءبىزدىڭ ستراتەگيالىق ارىپتەستىگىمىز مورالدىق قۇندىلىقتارى مەن ءداستۇرى ورتاق حالقىمىزدىڭ ەركىنە سايكەس ودان ءارى دامي بەرەدى دەپ سەنەمىن, – دەلىنگەن قۇتتىقتاۋ حاتتا.
بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو ءوزىنىڭ قۇتتىقتاۋ حاتىندا ەگەمەندىك جىلدارى قازاقستاننىڭ الەۋمەتتىك-ەكونوميكالىق جانە گۋمانيتارلىق سالالار بويىنشا ايتارلىقتاي دامىعانىن, حالىقارالىق قوعامداستىق تاراپىنان مويىندالعانىن اتاپ وتكەن.
– بەلارۋس قازاقستانمەن اراداعى جىلدان-جىلعا نىعايىپ, جەتىلدىرىلىپ, جاڭا مازمۇنعا يە بولىپ كەلە جاتقان بەرىك سەرىكتەستىك بايلانىستاردى شىن مانىندە جوعارى باعالايدى. مەملەكەتتەرىمىز اراسىندا قالىپتاسقان ءوزارا سەنىم, قولداۋ مەن اشىقتىق قازىرگى زامانعى كۇردەلى سىن-قاتەرلەرگە بىرگە قارسى تۇرۋعا, بەلارۋس-قازاق حالىقتارىنىڭ يگىلىگى جولىنداعى كوپجاقتى جانە ءتيىمدى ىنتىماقتاستىقتى كەڭەيتۋگە مۇمكىندىك بەرەتىنىنە سەنىمدىمىن, – دەلىنگەن الەكساندر لۋكاشەنكونىڭ حاتىندا.
ارمەنيا پرەزيدەنتى ارمەن ساركيسيان قاسىم-جومارت توقاەۆتىڭ اتىنا جولداعان قۇتتىقتاۋ حاتىندا مەملەكەت باسشىسىنىڭ قىزمەتىنە تابىس, قازاقستان حالقىنا بەيبىتشىلىك, باق-بەرەكە تىلەي وتىرىپ: «ارمەنيا رەسپۋبليكاسى مەن قازاقستان رەسپۋبليكاسىنىڭ اراسىنداعى ءوزارا سەنىم مەن قولداۋعا نەگىزدەلگەن ىنتىماقتاستىقتىڭ ەكى حالىقتىڭ يگىلىگى ءۇشىن ودان ءارى دامي بەرەتىنىنە نىق سەنىمدىمىن», دەپ جازعان.
ارمەنيا پرەمەر-ءمينيسترى نيكول پاشينيان قازاقستان تاۋەلسىزدىگىن جاريالاعان كەزدەن بەرى حالىقارالىق ارەناداعى ورنىن تابىستى نىعايتىپ, ساياسي جانە الەۋمەتتىك-ەكونوميكالىق سالالاردا ايتارلىقتاي جەتىستىككە جەتكەنىن ايتقان.
– ارمەنيا مەن قازاقستاننىڭ دوستىق قاتىناستارى ەكى حالىقتىڭ مۇددەسى ءۇشىن ەكىجاقتى فورماتتا دا, حالىقارالىق ۇيىمدار مەن ينتەگراتسيالىق بىرلەستىكتەر اياسىندا دا ودان ءارى دامي بەرەدى دەپ سەنەمىن, – دەلىنگەن جەدەلحاتتا.
سونىمەن قاتار قازاقستاننىڭ تاۋەلسىزدىك كۇنىنە وراي مەملەكەت باسشىسى مەن قازاقستان حالقىن تمد اتقارۋ كوميتەتىنىڭ توراعاسى – اتقارۋشى حاتشىسى سەرگەي لەبەدەۆ, رەسەي فەدەراتسياسى سىرتقى بارلاۋ قىزمەتىنىڭ ديرەكتورى سەرگەي نارىشكين قۇتتىقتاپ, باق-بەرەكە تىلەگەن.
لاتۆيا پرەزيدەنتى ەگيلس لەۆيتس ءوز قۇتتىقتاۋ حاتىندا ەلدەرىمىز اراسىنداعى ەكىجاقتى قارىم-قاتىناستاردىڭ دوستىق جانە سىندارلى سيپاتىن اتاپ وتكەن.
– ريگادا قازاقستان ەلشىلىگىنىڭ اشىلۋى ەكى ەل اراسىنداعى ىنتىماقتاستىقتى ودان ءارى نىعايتۋ ماقساتىنداعى ماڭىزدى قادام بولدى. لاتۆيا مەن قازاقستان اراسىنداعى ءوزارا ءىس-قيمىلدى ەكىجاقتى ىنتىماقتاستىق شەڭبەرىندە, ەۋروپالىق وداق پەن ورتالىق ازياداعى كەلىسىم بويىنشا, سونداي-اق بۇۇ مەن باسقا دا كوپجاقتى قۇرىلىمدار اياسىندا كەڭەيتە بەرەمىز دەپ سەنەمىن, – دەلىنگەن جەدەلحاتتا.
ەستونيا پرەزيدەنتى كەرستي كاليۋلايد قازاقستاندىقتاردى تاۋەلسىزدىك كۇنىمەن قۇتتىقتاپ, ەكى ەل ورتاسىنداعى ىنتىماقتاستىق ءوزارا تابىستى سالالار بويىنشا ودان ءارى دامي بەرەدى دەپ ۇمىتتەنەتىنىن جەتكىزگەن.
رۋمىنيا پرەزيدەنتى كلاۋس ۆەرنەر يوحاننيس ءوز قۇتتىقتاۋ حاتىندا قاسىم-جومارت توقاەۆقا جانە قازاقستان حالقىنا دەنساۋلىق, بەيبىتشىلىك پەن اماندىق تىلەگەن.
– مەن رۋمىنيانىڭ 2003 جىلى استانادا قول قويىلعان سەرىكتەستىك جانە ىنتىماقتاستىق تۋرالى دەكلاراتسيا نەگىزىندە ءبىزدىڭ ەلدەرىمىز اراسىنداعى ەكىجاقتى قارىم-قاتىناستاردى ودان ءارى دامىتۋعا نيەتتى ەكەنىن ناقتىلايمىن, – دەلىنگەن جەدەلحاتتا.
كيپر رەسپۋبليكاسىنىڭ پرەزيدەنتى نيكوس اناستاسياديس قاسىم-جومارت توقاەۆتى جانە قازاقستان حالقىن تاۋەلسىزدىك كۇنىمەن قۇتتىقتادى.
– قازاقستان COVID-19 پاندەمياسىنان تۋىنداعان بۇرىن-سوڭدى بولماعان جاھاندىق قيىندىقتارعا قاراماستان, ءوزىڭىز باستاماشى بولعان رەفورمالار جولىن ودان ءارى جالعاستىرا بەرەتىنىنە نىق سەنىمدىمىن, – دەپ جازعان ن.اناستاسيديس.
