قازاقستان قارجىگەرلەر قاۋىمداستىعى 2020 جىلدىڭ ون ايىنا ساراپ جاساعان. قاۋىمداستىق دەرەگى بويىنشا, بيىل 10 ايدا ساقتاندىرۋ كومپانيالارىنىڭ اكتيۆتەرى 21 پايىزعا كوبەيگەن. سونىڭ ىشىندە ءومىردى ساقتاندىرۋشى كومپانيالاردىڭ ۇلەسى 31 پايىزعا ارتىپتى. اكتيۆتەردى ءوسىرۋ بويىنشا CK Nomad Life كوش باستايدى ەكەن. اتالعان كومپانيانىڭ 10 ايداعى تابىسى 54 پايىزعا نەمەسە 71,8 ملرد تەڭگەگە وسكەن. سەكتوردىڭ 10 ايداعى تازا تابىسى – 105,7 ملرد تەڭگە. بۇل 2019 جىلدىڭ ءدال وسى كەزەڭىمەن سالىستىرعاندا 52 پايىزعا كوپ. جالپى تابىستىڭ 40 پايىزى «ەۆرازيا» سق-عا تيەسىلى بولىپ شىققان.
«2020 جىلدىڭ 10 ايىندا ساقتاندىرۋ كومپانيالارى 459,7 ملرد تەڭگەگە ساقتاندىرۋ سىياقىلارىن جينادى. بۇل بىلتىرمەن سالىستىرعاندا 10,5 پايىزعا كوپ. ساقتاندىرۋ سىياقىسىنداعى ءومىردى ساقتاندىرۋشى كومپانيالار ۇلەسى 39,0 پايىزعا دەيىن ءوستى (بىلتىر 37,7 پايىز بولعان).
ساقتاندىرۋ تولەمدەرى 125,9 ملرد تەڭگە بولدى (بىلتىر 123,7 ملرد تەڭگە بولعان). الايدا تازا ساقتاندىرۋ سىياقىسىنىڭ سوماسى 81,6 ملرد-تان 78,5 ملرد تەڭگەگە دەيىن قىسقاردى. تسيفرلارداعى بۇل ايىرماشىلىق تاۋەكەلدەردى قايتا ساقتاندىرۋمەن بايلانىستى.
سەكتوردىڭ قاڭتار-قازان ارالىعىنداعى تازا تابىسى – 105,7 ملرد تەڭگە. بىلتىرعى جالپى تابىس 78,4 ملرد تەڭگە بولعان. بيىل تابىستىڭ ەسەلەپ ارتۋى – ينۆەستيتسيالىق باستامالاردان مول تابىس تۇسۋىمەن بايلانىستى. 2020 جىلى سەكتوردىڭ ساقتاندىرۋدان تاپقان تابىسى – 42 ملرد تەڭگە بولسا, ينۆەستيتسيادان تاپقان تابىسى 46,2 ملرد تەڭگە بولىپ وتىر» دەلىنگەن قاۋىمداستىق مالىمدەمەسىندە.
بۇل رەتتە سەكتور اكتيۆتەرىنىڭ ورتاشا كىرىستىلىگى بيىل 7,9 پايىزعا جاقسارعان. بىلتىر بۇل كورسەتكىش 6,3 پايىزدى كورسەتىپ ەدى. ال كاپيتالدىڭ ورتاشا كىرىستىلىگى (RoAE) 13,8 پايىزدان 17,5 پايىزعا دەيىن ۇلعايعان. قاۋىمداستىق زەرتتەۋىنشە, نارىقتاعى 28 كومپانيانىڭ 27-ءسى وڭ رەنتابەلدىلىككە (تيىمدىلىك) يە ەكەن.
