كەشەگى جەلتوقساندا الاڭعا شىققان جاستاردىڭ تالابى دا ازاتتىققا ۇمتىلعان اۋىر جولداعى تاريحي وقيعا ەدى. قاندىقول كەڭەستىك بيلىك قارۋسىز شەرۋشىلەردى اياۋسىز باسىپ-جانشىعانىمەن جاستاردىڭ رۋحى جانشىلعان جوق. سول جاستاردىڭ مۇزدا جاققان الاۋ ۇشقىنى بۇكىل ەلگە تارالىپ كەتە مە دەپ قاۋىپتەنگەن بيلىك بارلىق جەردە جينالىستار ۇيىمداستىرىپ, الاڭعا شىققانداردى قوعامدىق ايىپتاۋعا كىرىسكەنى بەلگىلى. «ناشاقورلار, ىشكىشتەر, ۇكىمەتكە قارسى شىققان بۇزىقتار, ينتەرناتسيونالدىق تاربيەسى دۇرىس ەمەس» دەگەن نەشە ءتۇرلى ايىپتاۋلار ايتىلىپ, تۇگەل سوتتاۋ, جازالاۋ كەرەك دەگەن ۇسىنىستار ەستىلىپ جاتتى. بۇل ناۋقان سوناۋ تۇكپىردە جاتقان كاتونقاراعايداعى رىكوۆ مەكتەبىن دە اينالىپ وتپەدى. سونداي ءبىر جينالىستا ءسوز العان اۋداندىق پارتيا كوميتەتىنەن كەلگەن وكىلدىڭ «جاستارعا دۇرىس تاربيە بەرىلمەگەن, ەسىرتكى شەگىپ, اراق ءىشىپ, ەلدى ءبۇلدىردى» دەپ ەكپىندەتىپ سويلەگەنى ەسىمدە. كەيبىر مۇعالىمدەر باستارىن شۇلعىسا, ءبىرازى تومەن قاراپ وتىردى. شىدامادىم, ءىشىم قىج-قىج قايناپ, ورنىمنان تەز تۇرىپ: «قالاي عانا جاستاردى داتتايسىڭدار؟ ولار ەشقانداي ناركومان, ىشكىشتەر ەمەس. ولار شولاق ساياساتقا قارسى شىققان ۇلتتىق رۋحى مىقتى جاستار, ءبىز ولاردى جاقتاپ قورعاۋمىز كەرەك», دەدىم.
مەنى قولداپ ءوزىمنىڭ شاكىرتىم, قازاق ادەبيەتى ءپانىنىڭ مۇعالىمى ەرمەك ساحاريەۆ سويلەدى. «گالينا نيعىماشقىزى دۇرىس ايتادى, شولاق ساياساتتىڭ اسەرىنەن ىشكى بىتەۋ جارا جارىلىپ, شىقپاي قويمادى», دەدى.
ۇلتتىق قۇندىلىقتارىن قورعاپ, ءوز پىكىرىن بىلدىرمەك بولعان جاستاردىڭ بەيبىت ارەكەتىن داتتاۋ, قارالاۋ جينالىسىنىڭ سوڭى داۋىسقا سالۋمەن اياقتالدى. ال بىزگە قاتاڭ سوگىس بەرىلدى.
سويتكەن كەڭەس وداعى كوپ ۇزاماي-اق ىدىرادى. حالقىمىز اڭساعان تاۋەلسىزدىككە جەتتىك. مەنىڭ جاستارعا ايتارىم: قازاق بولىپ تۋدىڭ با, اناڭنىڭ اق ءسۇتىن ەمدىڭ بە, قازاققا ماڭگى-باقي قارىزبىن دەپ ساناۋىڭ كەرەك. ۇلتتىق رۋحتى كۇشەيتىپ, سالت-ءداستۇردى ناسيحاتتاۋعا, ءتىل مەن ءدىندى دامىتىپ, ۇرپاققا دۇرىس تاربيە بەرۋگە مىندەتتىمىز. ۇلتتىق, بىرلىك, ۇلتتىق سانا, ۇلتتىق ءتىل ءبىرىنشى ورىندا تۇرۋ كەرەك. ۇلتتىق رۋحىمىزدى تومەندەتپەيىك, ويلانايىق, سارالايىق, ساق بولايىق, اعايىن!
تاۋەلسىزدىگىمىز ماڭگىلىك بولسىن! كوك تۋىمىزدىڭ تۇعىرى مىقتى بولىپ, بيىكتە جەلبىرەي بەرسىن!
گالينا يبرايموۆا,
زەينەتكەر-ۇستاز
شىعىس قازاقستان وبلىسى,
كاتونقاراعاي اۋدانى,
كاتونقاراعاي اۋىلى
