قۇتقارىلعاندار اراسىندا ءتورت بالا بار, ولاردىڭ كىشىسى ءۇش جاستا عانا.
– ارىپتەسىم, سامات نۇروۆپەن بىرگە تاڭەرتەڭ جۇمىسقا بارا جاتقان ەدىك. جانسۇگىروۆ كوشەسىنىڭ بويىمەن كەلە جاتىپ, جەكە سەكتوردان شىققان قويۋ ءتۇتىندى بايقادىق. كەرى قاراي بۇرىلىپ, 657-ۇيگە قاراي جۇگىردىك. مونشا ورتەنىپ جاتىر ەكەن, ءورت ۇيگە قاراي تاراپ ۇلگەرگەن. ىشىندە ادامدار بولدى. ولار قاتتى ۇيىقتاپ جاتقاندىقتان, وتتى سەزبەگەن. ولاردى ۇيدەن تەرەزە ارقىلى الىپ شىعا باستادىق. الدىمەن بالالاردى, سودان كەيىن ەرەسەكتەردى شىعاردىق. وتاعاسى تۇپكى بولمەدەن اجەيدى شىعاردى, ءبىز ونى تەرەزە الدىندا كۇتىپ الدىق. سونىمەن قاتار قوسىمشا كومەكتى دە شاقىردىق. پاترۋلدىك ەكيپاج كەلىپ, جاقىن ماڭداعى ۇيلەردىڭ تۇرعىندارىن ەۆاكۋاتسيالاي باستادى. ءورتتىڭ ءبىر-بىرىنە جاقىن ورنالاسقان باسقا تۇرعىن ۇيلەرگە دە تارالۋ قاۋپى بولدى. قۇدايعا شۇكىر, ەشكىم زارداپ شەككەن جوق, – دەدى تۇركسىب اۋداندىق پوليتسيا باسقارماسىنىڭ ۋچاسكەلىك ينسپەكتورى جاينات مولداعالي.
ءورتتىڭ شىعۋ سەبەبىن ماماندار انىقتايدى.
– مەن پوليتسەيلەرگە قاتتى ريزامىن. ەگەر ولار بولماسا, ءبىز ءبارىمىز, بۇكىل وتباسىمىزبەن ورتەنىپ كەتەر ەدىك. جانىمىزدان ءوتىپ كەتپەي بىزگە كومەكتەسكەندەرىڭىز ءۇشىن كوپ راحمەت, – دەدى كوپبالالى انا. ءورت بولعان كۇنى وتاعاسى الەۋمەتتىك جەلىدە پوست جازىپ, وندا پوليتسيا قىزمەتكەرلەرىنە وتباسىن قۇتقارعانى ءۇشىن العىسىن بىلدىرگەنىن ەستەرىڭىزگە سالا كەتەيىك.
