ەلدىڭ ابزەليلوۆ اۋدانىندا الاپات ءورت ورىن العان. يشبۋلدينو اۋىلىنىڭ قىزىل كوشەسىندە مانسارداسى بار ءبىر قاباتتى عيمارات جانىپ كەتكەن. عيماراتتا قارتتار ءۇيى ورنالاسقان. ءورت سوندىرۋشىلەر جالىندى ەكى ساعات ىشىندە ءسوندىردى. ءتورت ادام سىرتقا ءوزى شىعىپ ۇلگەرگەن. جالىندا سوندىرگەننەن كەيىن عيماراتتان 11 ادامنىڭ دەنەسى تابىلدى. ولار قارتتار مەن مۇگەدەكتەر بولۋى مۇمكىن.
«قازا بولعاندار تۋرالى اقپارات ناقتىلانۋدا. ءورت ورنىنا باشقۇرستان رەسپۋبليكاسى بويىنشا رەسەي تجم باس باسقارماسىنىڭ باستىعى مارات لاتىپوۆ باردى. ءورتتى سوندىرۋگە 16 ادام مەن 6 تەحنيكا جۇمىلدىرىلدى», دەپ حابارلادى رەسپۋبليكانىڭ تجم ءباسپاسوز قىزمەتى. تەرگەۋشىلەر جۇمىسقا كىرىسىپ كەتتى. قازا تاپقاندار مەن زارداپ شەككەندەردىڭ تۋىستارىنا پسيحولوگيالىق كومەك كورسەتىلىپ جاتىر. اشىق اقپارات كوزدەرىنەن بەلگىلى بولعانداي, قارتتار ءۇيى 2019 جىلدىڭ 27 ناۋرىزىندا تىركەلگەن.
«ساعات 2:54-تە كەزەكشى پۋلتىنە 1960 جىلدارى سالىنعان, ىشىندە 16 ادام تۇرعان عيماراتتا ءورت شىققانى تۋرالى قوڭىراۋ ءتۇستى. ساعات 3:17-دە وقيعا ورنىنا حاليلوۆ بك ەرىكتى ءورت ءسوندىرۋ توبى كەلدى. بەس ادام ورتتەن الىپ شىعارىلدى. دابىل جۇيەسى قوسىلعانىمەن, 11 ادامدى قۇتقارۋ مۇمكىن بولمادى. مەن وقيعا ورنىندامىن. اۋداندا تج رەجيمى ەنگىزىلدى», دەپ مالىمدەدى ابزەليلوۆ اۋدانى باسشىسى يلدار نافيكوۆ.
