سونىمەن قاتار رۋحاني كەشكە پارتيانىڭ 2017 جىلدان بەرى جىل سايىن وتكىزىپ كەلە جاتقان «اۋىلىم – التىن تۇعىرىم» ونلاين-بايقاۋىنىڭ جەڭىمپازدارى مەن قاتىسۋشىلارى جينالدى. «اۋىل تاقىرىبى – ەشقاشان تاۋسىلمايتىن, ەش شەكاراسى جوق, ەشتەڭەمەن شەكتەلمەيتىن كۇردەلى تاقىرىپ ەكەنىنە كوزىمىز جەتە ءتۇستى. اۋىلدىڭ قاسيەتى مەن كيەسىن كورسەتۋدىڭ جاقسى ءبىر جولى – ادەبي كونكۋرستار ارقىلى دارىپتەۋ ەكەنى بەلگىلى. اۋىل تاقىرىبىن ءسوز ەتكەن ەڭ مىقتى شىعارمالارعا ونلاين-بايقاۋ جاريالادىق. پوەزيا, پروزا, دراما جانرلارى بويىنشا وتكەن بايقاۋعا ەلگە تانىمال اقىن-جازۋشىلار قازىلىق ەتتى. بۇل يگى باستاما داستۇرگە اينالىپ, جىل سايىن وتكىزىلىپ كەلەدى. سول ارقىلى ەل اراسىنان قانشاما مىقتى جاس تالانتتار جارىققا شىقتى», دەدى پارتيا توراعاسى ءا.بەكتاەۆ.
اقىن, ادەبيەتتانۋشى د.كاپ ۇلىنىڭ ايتۋىنشا, ۇلتتىق نەگىز, ۇلتتىق بولمىس حاقىنداعى تولعامنىڭ كورىنىسىن اقىن-جازۋشىلاردىڭ شىعارماسىنان كورۋگە بولادى. قازاقتىڭ ءسوز ونەرى ىقىلىم زامانداردان قالىپتاسىپ, رۋحاني نەگىزىمىزگە اينالىپ, ۇلت رەتىندەگى تانىم-تۇسىنىكتەن, بولمىس-بىتىمنەن, تۇتاستىقتان ەش ۋاقىتتا اجىراماي كەلەدى. جىراۋلاردىڭ تولعاۋلارى, جىرشىلاردىڭ توكپەسى, ءتىپتى كۇيشىلەردىڭ ساۋساعىنان توگىلگەن كۇمبىرلى كۇيدىڭ وزىندە ۇلتتىق ءنار, ۇلتتىق بوياۋ, ۇلتتىق سارىن مەن ۇلتتىق قۇندىلىق اجىراماي, ءبىرتۇتاس, ۇندەسىپ تۇرادى.
كەش بارىسىندا اقىندار ولەڭ وقىپ, كۇيشىلەر كۇي ورىنداپ, انشىلەر دومبىرادا انمەن شاشۋ شاشتى. سونداي-اق جاس اقىن-جازۋشىلار پارتيا قاتارىن تولىقتىرىپ, مۇشەلىككە ءوتتى.
